Ke yan bokum biyu’ e duw ndariy be’ nri manang e fulweg ko re deer ney. Ere bokum milyon e girdi’ ni ur m’ad u boch e m’ar nib mom ni ma af. Machane munmun ma aram me nang e piin llowan’ e tin riyul’ u murung’agen e re n’ey. Ra pirieged ni m’ar e ba ga’ ni ma sum u boch ban’en ni bod rogon e bayking ara virus. Nap’an ni tamilang e re n’ey u wan’uy, ma aram e n’en ni ke ayuwegey ke yag ni ngan taleg ara ni tafalaynag boor mit e m’ar. Re n’ey e ke yag ni nge ayuweg bokum bilyon e girdi’ ni nge n’uw nap’an e yafos rorad miki fel’ boch fithik’ i dowrad.

Machane uw rogon boch e deer nib ga’ fan? Ga be lemnag ma mang angin nra yib ngom ni faan ga ra guy rogon ni ngam nang e fulweg ko pi deer ni baaray?

• Mini’ Got?

• Mini’ Jesus Kristus?

• Mang Gil’ilungun Got?

• Ra uw rogon e par boch nga m’on?

Bokum milyon e girdi’ ni kar pirieged e fulweg ko pi deer ney ma ke yag ni nge fel’ boch e par rorad. Ku arrogom nrayog ni nge yib angin ngom e fulweg ko pi deer ney.

Sana ra lungum u wan’um, ‘Uw rogon nrayog ni ngan pirieg e tin riyul’ u murung’agen boch ban’en?’ Bin riyul’ riy e, be munmun ma be gel e mo’maw’ riy ni ngan nang e tin riyul’ u murung’agen boor ban’en. Mang fan?

Boor e girdi’ nder pagan’rad ko am, ara pi siyobay, ara girdien e news, ara pi n’en ni bay ko Internet, ara TV ni nge yog e tin riyul’ ngorad. Ke mo’maw’ ni ngan nang ko be yog e girdi’ e tin riyul’ fa kemus ni yad be weliy e tin bay u lanin’rad, ara yad be mithag boch ban’en, ara yad be ban. Bochan ndakuriy e pagan’ u thilin e girdi’ nge ku bochan ni kki yoor ban’en nde riyul’ ni yibe weliy, ma aram fan ndakir taareban’ e girdi’ ko tin riyul’ ara angin nra yib ngorad.

Yugu aray rogon e pi n’en be buch, machane rayog ni ngam pirieg e fulweg ko tin th’abi ga’ fan e deer ni bay rogon ko yafos rodad. Uw rogon? Aram e ngam rin’ boch ban’en ni ka ga ma rin’ u nap’an ni ga be gay e fulweg u boch e deer ni gathi rib ga’ fan.

Bin riyul’ riy e, gubin e rran ni ga ma guy rogon ni ngam nang e tin riyul’. Am lemnag e n’en ni buch rok Jessica. I gaar: “Rib kireb e kel ngak bochi pin ni fakag ni 12 e duw rok. Mus ni nge kay ban’en ni bay buchuuw e kel riy ma rayog ni nge yim’.” Ba t’uf ni nge nang Jessica ndabi m’ar fak ko ggan ni be chuw’iy. Ki ulul ngay ni gaar: “N’en som’on ni gu ma rin’ e gu ma beeg e yol u dow e kahol ko chugum ni gu be chuw’iy, ya nge yag nug nang e n’en ni kan ngongliy riy. Tomuren ma aram mug fal’eg i gay murung’agen, mu kug non ngak e girdi’ ko gin kan ngongliy e pi chugum nem riy ni bochan e nge yag nug nang ko ke maathuk buchuuw e kel ko re n’em fa dawor. Kug ma gay boch ban’en u murung’agen fare chugum u yugu boch e company ya nge yag nug nang ko rayog ni nge pagan’ug ko fa gin ni kan ngongliy fare chugum riy fa danga’.”

Pi deer ni ga ma guy rogon ni ngam nang e fulweg riy e sana gathi rib ga’ fan ni bod e tin ma guy Jessica rogon ni nge nang e fulweg riy. Machane baaray boch ban’en nrayog ni ngam rin’ ya nge yag nim nang e fulweg ko pi deer rom:

• Mu guy rogon ngam nang e tin riyul’.

• Mu gay yugu boch ban’en u murung’agen fare n’em.

• Mu gay ngam nang ko gin ga be fek boch ban’en riy e rayog ni nge pagan’um ngay fa danga’.

Re n’ey e ku rayog ni nge ayuwegem ni ngam nang e tin riyul’ e fulweg u boch e deer nib ga’ fan u murung’agen e yafos rodad. Uw rogon?

Nap’an ni be gay Jessica e tin riyul’ u Bible, ma aram miki rin’ e n’en ma rin’ u nap’an ni be gay murung’agen e ggan ni ma m’ar fak ngay. I yog ni gaar, “Bochan ni ug fal’eg i beeg ma gu be gay murung’agen boch ban’en, ma aram e n’en ni ayuwegeg ni nggu pirieg e tin riyul’ u lan e Bible.” Bokum milyon e girdi’ ni kar filed e n’en ni be yog e Bible u murung’agen e pi deer ni baaray ni bod rogon Jessica. Pi deer nem e:

• Mang fan ni gad bay?

• Mang e ma buch rodad u nap’an ni kad m’ad?

• Mang fan ni gad ma gafgow?

• Mang e be rin’ Got ya nge yag ni taleg gubin e gafgow?

• Uw rogon ni nge yib e felfelan’ nga lan e tabinaw rodad?

Rayog ni ngam pirieg e fulweg ko pi deer ney nge yugu boch e deer ni faan ga ra beeg e Bible mag fal’eg i gay murung’agen boch ban’en u online ko www.pr418.com.