Jesu ke Kgoši ya Mmušo wa Modimo.

Luka 1:31-33 e re: “Leina la gagwe o mmitše Jesu. Yena yoo e tla ba yo mogolo gomme o tla bitšwa Morwa wa Yo Godimodimo; Jehofa Modimo o tla mo nea sedulo sa bogoši sa Dafida tatagwe, o tla buša e le Kgoši ntlong ya Jakobo ka mo go sa felego gomme Mmušo wa gagwe o ka se fele.”

Jesu o be a dula a botša batho ka Mmušo wa Modimo.

Mateo 9:35 e re: “Jesu a tšea leeto la go ya le metse le metsana ka moka, a ruta disinagogeng tša bona, a bolela ditaba tše dibotse tša Mmušo, a fodiša mohuta o mongwe le o mongwe wa bolwetši le mohuta o mongwe le o mongwe wa bofokodi.”

Jesu o ile a botša balatedi ba gagwe gore ba tla bona ka eng gore Mmušo wa Modimo o kgauswi le go tla mo lefaseng.

Mateo 24:7 e re: “Gobane setšhaba se tla tsogela setšhaba gomme mmušo wa tsogela mmušo; go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe.”

Ga bjale balatedi ba Jesu ba ruta batho ka Mmušo wa Modimo lefaseng ka moka.

Mateo 24:14 e re: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”