God biNahatʼaʼ éí Jesus Bee biNaatʼáanii.

Luke 1:​31-33: “Jesus bee yídíízhiił. Éí ayóó átʼéii nilı̨́į doo, áádóó Aláahdi Ayóóʼátʼéii biYeʼ yolyée doo; bizhéʼé David naatʼáanii nilı̨́ı̨́dą́ą́ʼ bee bóhólnííh nítʼééʼ yę́ę Bóhólníihii Diyin God beididooʼááł, áko hoolʼáágóó Jéíkab bidineʼé yá hooʼáał doo, áádóó bee bóhólníihgo bił hazʼáanii doo ninítʼiʼ da dooleeł.”

God biNahatʼaʼ éí Jesus yee naʼnitinígíí bił ahídéétʼiʼ.

Matthew 9:35: “Áko nítʼééʼ kin hadaasʼáágóó índa kin naazhjaaʼgóó tʼáá ałtso kéédahatʼínígíí kin yiiʼ áłah nídaadleehí naaznilgóó Jesus nazhʼnitingo, áádóó yáʼąąshii bee bóhólníihgo bił hazʼáanii baa haneʼ yáʼátʼéehii baa hojilneʼgo, índa diné bitahgóó naałniih bąąh dahólóonii tʼáá ałtso, áádóó ka nidaakaígíí tʼáá ałtso hadaałtʼé áńdajidleʼgo tázhdííyá.”

Jesus bídahoołʼaahii hahgo God biNahatʼaʼ baa hodoolzhishgo yichʼįʼ ííshjání áyiilaa.

Matthew 24:7: “Háálá ałʼąą dineʼé ałchʼįʼ nídahidiibáah doo, áádóó łahgo nihokááʼ bee bóhólníihgo bił hazʼáanii índa nááná łaʼ nihokááʼ bee bínááhólníihgo bił nááhástʼáanii yił ałchʼįʼ nídahidiibáah dooleeł, índa łahgóó dahodichin doo, áádóó achʼįʼ nidahwiiʼnáa doo, áádóó niʼ nídahidiʼnáah doo.”

Jesus bídahoołʼaahii éí kʼad God biNahatʼaʼ kéyah nidahoneesʼą́ą́góó yee ndaʼnitin.

Matthew 24:14: “Áádóó yáʼąąshii bee bóhólníihgo bił hazʼáanii baa Haneʼ Yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso bee hwéédahodoozįįł biniyé bee hoł dahodoonih, áko áadi índa nihodoogááł.”