Tö sā hī ngaich meuk in ngam urěh ātiköl tö minë tö vënyu inlahngen tö Yēsū, ngam lökten hī ngaich akahakūö tö ngam Pūlngö ngam Tēv nö ngaich nö hayöng nö löktö el halīöngö ngaich Yēsū Rācha e.

Vë-eny nang hī ngam Paipöl, unôichrit inlahen Yēsū nö vīlöng nö Rācha ngaich suktö më Sī-ö tö më hol ò anga-aṅ nö ing panam. Tö ngö manah angū-ö tö ò min hēk nö öt havanlöre nö chuh el halīöngö. Angū-ö ngih tökiröng lāinyngen nö kūö yòh nö sīöphökūöre minë kanihngen löktö kūö ik 1914.—Inmeukhömat 12:7, 9.

Pòrô ngaich töngamuh në ötlanöökö nö sīöphökūöre ing panam, sön pöri ngam Rācha ngam Pūlngö ngam Tēv nö pōyen tī nö hayööken më tarik. Keuheūtngöre chūök nö ing panam ngam inköptö mat ngam Paipöl ngam tö vënyu tö Yēsū. Pōyen yip tarik tö yöölen kūö inkööpö mat ngam Paipöl. (Isayā 2:2-4) Köönyu ṙôken ngaich tarik tö ṙamlōn nö el minë mikūönöre, lööngö mufē inrē i alaha ngam kinmānö hēk pësa. Vailöre ngaich töngamuh minë tinrīken cha kūö inkööpö mat ngam Paipöl ngaich halēn ngam tinrīkenre nö iyöng el öp Pūlngö ngam Tēv ip yamih ṙētak.

Rultenre ngaich ang Yēsū nö hayöng nö el halīöngö, römöng hayöng pöri tarik nö ikūö ngih panam. Kētö chööngö pöri ngam Tēv nö in Yēsū nö ngö ṙô: “Hayöng Man ellōn yip tökunyaha elmat tö meh.” (Salmai 110:2) Ngaich an min Yēsū nö ahetngö yip tökunyaha elmat tö ngam Pūlngö ngam Tēv. Yip hamòltö ellōnre pöri nö hang minë ṙô ngam Tēv, ngaich kēngen nup töng sitih min anga-aṅ kanihngen cha.

Asuh nup min la-en ngam Pūlngö ngam Tēv?

• Ahetngen minë tövaich tinlööken. Kaheūkö minë tövaich tinlööken nö mi-inyihköre tö ṙô ngam Paipöl, minë tö hòṅ röhten inhetngö min. Nup tinlööken mahaköptö inlahen ngam Tēv nö minyôiny aṅ hēk kamëtö kanihngen yip tarik inrē, anū-ö min tinlööken tö ahëtiyö. Pōyen min yip töhaṙivlōn tö kūö inhetngö u.—Inmeukhömat 17:15, 16.

• Ahëtiyö min në inyööngö tö tarik. Ahetngö minë taṙòkhöre inyööngö tö tarik min ngam Pūlngö ngam Tēv.—Inmeukhömat 19:15, 17, 18.

• Ahëtiyö min yip tötlöök tarik. Sitih inlahen min yip tö örheūheu nö kēken nup tötlöök la-en hēk öt hang chööngö ngam Tēv inrē. Vë-eny nang hī an ngam Paipöl tö cha min nö ‘Röökiṙen nö ṙā-ang ikūö ngih panam.’—Inchōḵ-oṙô 2:22.

• Ahëti min ngam Sī-ö tö yip tötlöök ma-ahānga ò inrē. Öt hēk min ngam Sī-ö tö më tötlöök ma-ahānga “nö hachīl vē pumnāmö tarik.”—Inmeukhömat 20:3, 10.

Asuh nup min yanöölen yip hamô-en ngam Pūlngö ngam Tēv nö löktö in u?

Löktö el halīöngö min ngam Rācha ang Yēsū nö kētö nup taṙòkhöre nup tötkô nö kahëtö më tarik mahayöng töngamuh. Katöllöng yip 1,44,000 ṙôken tarik nö ṙa-ang ing panam, yip hamòlṙen ò min nö hayöng. (Inmeukhömat 5:9, 10; 14:1, 3) Ngaich an min Yēsū nö hateungngö minë kuilōn ngam Tēv nö ing panam. Ta-a chěi töi ngëichkö yanöölen më tarik nö löktö in ngam Pūlngö ngam Tēv?

• Kē-ěyö min ngam invah tö ngam kinpaha. “Öt ngö ṙô min yip aṅ panam, vahav chin,” hēk “öt ōtngöre min inrē ngam kinpaha.”—Isayā 33:24; Inmeukhömat 21:4.

• Kumtö tökô-en lanāmö hēk kumchikṙen. ‘Pōyen min nup kanôlòṙen yip kūön meh kikōnyö,’ hēk ‘Kö ūichhakṙen inrē min cha-a nö el katòh vāin re, el katòh anychīr re inrē; öt hĕng tak min pumnëken cha.’—Isayā 54:13; Maika 4:4.

• Kē-ěvkūö min yip tarik tö minë tölöök la-en. “Marô-òten yip min katöllö chu nö kumchikngenre nö i nup vahīṙen kuntī cha. Öt chök alaha yip min nö la-evṙen.”—Isayā 65:22, 23.

• Halööktitvö min minë elkahôiṙen. “Ṙāmölōn min öp elinchōn töp chūökö inrē töngesngö; ṙāmölōn ngam tönyalnyi inrē, pöpnyöre kūö ṙòng inrē sā pūl.”—Isayā 35:1.

• Haköptu min cha-a tö cha nö hòṅ sitih inlahen yěn hòṅ teūngen töm nômö tö örheūheu aṅ. “Ngih ön nômö tö-örheūheu-aṅ, ngam mikahkūö cha tö Meh, Öm tökô-en Tēv; akahakūö inrē tö ngam tahīntö Meh, Yēsū Kristū.”—Yôhan 17:3.

Lōnu ngam Tēv tö meh öm teūngen tö në tö ngatī inkòlô. (Isayā 48:18) Vënyu nang in min ip yamih ātiköl tö hī öi hòṅ sitih inlahen hòṅ hī min öi teūngen töm tövai maheūkköre ip yamih ṙētak.