Jezun kosli khunna dili, tem ami fattlea lekhant polloilem. Tor hea khunna vorvim Devachem Raj sorgar suru zalam ani Jezu hea Rajeacho Raza zaun asa mhunn amkam kollon ieta.

Jezu Devachea Rajeacho Raza zaun, Soitanak ani tachea noxttea dutank sorgar thaun bhair uddoitolo mhunn Bible-ant boroilʼlem ani toxench zalem. 1914 thaun Soitan ani tache noxtte dut hea prithumeruch asat. Teach pasot tednam thaun hea prithumer vaittponn vaddot asa.​—Prokasovnni 12:7, 9.

Hea sonvsarachi poristhiti vaitt zait asa, punn Devachea Rajeacho Raza Jezu Kristan sonvsarbhor aslolea lokank zaiti modot kelea. Zoxem, tannem sanglolea pormonnem aiz sonvsarbhor Bible xikoupachem kam cholta. Hea vorvim zaito lok Bible-antlim totvam zannam zatat ani aplea sodanchea jivitant him totvam lagu korunk xiktat. (Izaias 2:2-4) Familint khuxal koxem ravchem, toxench famili poros sirvisek vo girestkaiek chodd mhotv kiteak diunchem nhoi tem aiz lakʼkhamnim lok xiktat. Oxem kelʼlean tankam aiz faido zata ani Devak aplea Rajeant zai toslim munxam tim zaunk pavtat.

Jezu sorgar Raj choloita tem khorem, punn prithumer munis odhikar choloita. Tori astana Devan Jezuk sanglam: “Tujea xotrum voir razvott choloi.” (Stotr 110:2) Tea pasot Jezu beginuch Devachea soglea virodheank marun uddoitolo ani khalti asat tankam tanchea soglea trasantlim soddoitolo.

Tea vellar Dev aplea Rajea udexim

• Khottea dhormancho bhosm kortolo. Bible-ant khottea dhormank ek kolvont vo xindoll bail mhunnttloli asa. Ani beginuch ticho nas zauncho asa. Jea dhormamnim Deva vixim khotti xikounn xikoun, lokancher vojeacho bhar ghatla tancho Dev nas kortolo. Ani oxem zata tednam zaite lok ojap zatole.​—Prokasovnni 17:15, 16.

• Munxancho odhikar kabar kortolo. Dev aplea Rajea udexim soglea munxancho odhikar kabar kortolo.​—Prokasovnni 19:15, 17, 18.

• Noxttea lokancho nas kortolo. Je lok vaittponn kortat ani Devachem aikonk sodhinant tanchem kitem zatolem? Dev ‘noxtteank dhortorevele kaddttolo’ mhunn Bible sangta.​—Mhonnʼnneo 2:22.

• Soitan ani tachea noxttea dutanchem nisonntton kortolo. Soitan ani tachea noxttea dutam lagim ‘raxttrank anik fosounk zaunchem na.’​—Prokasovnni 20:3, 10.

Hea udexim Devachea Rajeak tenko ditat tankam koslim besanvam mellttollim?

Khoincheach munxa lagim korunk zaunk na tem Jezu Devachea Rajeacho Raza zaun kortolo. Tachea sangata 1,44,000 zannam raj choloitolim, zankam munxam modlim vinchun kaddlolim asat. (Prokasovnni 5:9, 10; 14:1, 3) Prithumer Devachi khuxi purnn zata mhunn to khatri korun ghetolo. Tor Devachea Rajea udexim prithumer aslolea munxank koslim besanvam mellttolim?

• Duens ani moron aschem na. “Thoinsor ravpi konnuch ‘apunn boro na mhonn’ sangcho na” ani “moronn anink aschem na.”​—Izaias 33:24; Prokasovnni 21:4.

• Khori xanti ani surokxa astoli. “Tujea bhurgeank bhogunk melltoli xantichi bhorti” ani “zonn-eklo ap-aple dak-veliche savllek ani ap-aplea anjirachea zhadda ponda bostolo, konn konnak tras diuncho na.”​—Izaias 54:13; Mika 4:4.

• Dhadosponn melltta toslem kam astolem. “Mhojim vinchlolim aplea hatanchim follam khatolim. Tim nirfollim vavurchim nant.”​—Izaias 65:22, 23.

• Vatavoronn nitoll astolem. ‘Oronnem ani suki-korddi zomin khuxal zatoli, padd zomin sontostoli ani sallkamnim fulon ietoli.’​—Izaias 35:1.

• Lokamnim sasnak jieunk kitem korunk zai tea vixim tankam xikonk mellttolem. “Sasnachem jivit mellonk tannim tuka, ekleach khorea Devak, ani zaka tunvem dhaddla, tea Jezu Kristak vollkhon ghevop gorjechem asa.”​—Juanv 17:3.

Him besanvam tumkam mellʼllolim Devak zai. (Izaias 48:18) Tor him besanvam mellonk tumi kitem korunk zata tem fuddlea lekhant somzailam.