Lo sawo di’etshi, takasɛndingola djembetelo yakasha Yeso. Djembetelo shɔ mɛnyaka hwe dia Diolelo diaki Nzambi diakashikikɛma l’olongo ndo Yeso Kristo mbele Nkumekanga kadiɔ.

Bible mbutaka dia kam’akɔshi Yeso lowandji, nde akatshanya Satana l’ɛdiɛngɛ ande oma l’olongo. Wonya ɔnɛ, vɔ wokoka monga la shɛngiya paka la nkɛtɛ, ɔkɔkɔ wɛnya lande na kele awui wa kɔlɔ efula wekɔ lo salema la nkɛtɛ ntatɛ oma ko 1914.​—Ɛnyɛlɔ 12:7, 9.

Kaanga mbataleke ndana akambo wa l’andja, Yeso lele Nkumekanga ka Diolelo diaki Nzambi ambosalaka awui efula dia nkimanyiya anto wa la nkɛtɛ k’otondo. Diɛsɛ la olimu wa mbetsha anto Bible wakambema l’andja w’otondo wakatatshi Yeso, anto efula wekɔ lo mbeka ndo wekɔ lo nkamba l’atɔndɔ wa lo Bible lo lɔsɛnɔ lawɔ la lushi la lushi. (Isaya 2:2-4) Miliyɔ y’anto wambeka woho wa monga la kanyi y’ɔlɔlɔ lo dikambo di’olimu, woho wa ndowanya nsɛnɔ ya nkumbo yawɔ ndo wa ngɛnangɛna la diangɔ dia l’emunyi koko aha mbetawɔ dia diɔ monga kɛnɛ koleki ohomba lo nsɛnɔ yawɔ. Anto asɔ wekɔ lo mbeka woho wa ndjakondjiyɛ wahɔ oma ko nshi nyɛ ndo wekɔ lo nkoma anto w’ɛlɔlɔ wakombola Nzambi dia vɔ monga ambolami wa Diolelo diande.

Kaanga mbele Yeso ambotatɛka nɔmbɔla l’olongo, mandji y’ana w’anto yaakalɔmbɔla la nkɛtɛ. Koko, Nzambi akatɛ Yeso ate: “Tshɔka tolee l’atei wa atunyi ayɛ.” (Osambo 110:2) Keema edja, Yeso ayɔlɛndja atunyi ande tshɛ ndo ayosha anto walanga nkitanyiya Nzambi ekimanyielo.

Keema edja, Diolelo diaki Nzambi diayosala awui anɛ:

• Diayolanya ɔtɛmwɛlɔ wa kashi. Ɛtɛmwɛlɔ wekɔ lo mbetsha awui wa kashi lo dikambo dia Nzambi ndo kɛsɔ ambetɛ nsɛnɔ y’anto edika w’edika. Bible mbɛdikaka ɔtɛmwɛlɔ wa kashi la womoto la numba. Elanyelo kande kayonga dindjɛyi le anto efula.​—Ɛnyɛlɔ 17:15, 16.

• Diayokomiya mandji y’ana w’anto. Diolelo diaki Nzambi diayokomiya mandji y’ana w’anto tshɛ.​—Ɛnyɛlɔ 19:15, 17, 18.

• Diayonya anto wa kɔlɔ. Ko kayotota dia wanɛ watshininala dia nsala awui wa kɔlɔ ndo watona nkitanyiya Nzambi? “Koko akanga wa kɔlɔ wayonyɛma oma la nkɛtɛ.”​—Tokedi 2:22.

• Diayolanya Satana l’ɛdiɛngɛ. Satana la ɛdiɛngɛ hawotonga l’akoka wa “minganyiya wedja nto.”​—Ɛnyɛlɔ 20:3, 10.

Ko kakɔna kayolembetshiya awui asɔ tshɛ le wanɛ wetawɔ Diolelo diaki Nzambi?

Lo mbolɛ oko Nkumekanga l’olongo, Yeso ayosala akambo efula oleki omboledi tshɛ w’ɔna onto. Nde ayolɛ kaamɛ la anto 144 000 wakasɔnama oma l’atei w’anto. (Ɛnyɛlɔ 5:9, 10; 14:1, 3) Nde ayoyashikikɛ dia lolango la Nzambi lekɔ lo salema la nkɛtɛ. Kakɔna kayosalɛ Diolelo diaki Nzambi anto wa la nkɛtɛ?

• Diɔ diayonya hemɔ ndo nyɔi. “Ndooko onto lodjashi lɛkɔ layota ate: ‘Dimi lekɔ la hemɔ,’” ndo “nyɔi hatoyala nto.”​—Isaya 33:24; Ɛnyɛlɔ 21:4.

• Diɔ diayosala dia wɔladi ndo lotui tshitshi la mɛtɛ monga. “Wɔladi wa anayɛ wayonga efula,” ndo “vɔ wayodjasɛ onto l’onto l’ɛse k’ɔkɔdi ande wa vinyɔ ndo l’ɛse k’osongo ande wa fingo, ndo ndooko onto layowaotsha wɔma.”​—Isaya 54:13; Mika 4:4.

• Diɔ diayosala dia onto tshɛ monga l’olimu wa dimɛna. “Ɛsɔnami ami wayɔngɛnangɛnaka lo yɛdikɔ y’efula la olimu wa anya awɔ. Vɔ hawotɛna paa wɛnɛna.”​—Isaya 65:22, 23.

• Diɔ diayokandola ekakatanu wendana la nkɛtɛ. “Oswe wa shɛnga ndo nkɛtɛ y’ofumbo yayɔngɛnangɛna, ndo laandja l’oswe layonga l’ɔlɔ ndo layɔmɔnga oko dɛmbɔlɛmbɔ dia safra.”​—Isaya 35:1.

• Diɔ mbetshaka anto kɛnɛ kahombawɔ nsala dia ndjɔsɛna pondjo. “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.”​—Joani 17:3.

Nzambi kombolaka dia wɛ ndjɔngɛnangɛna l’ɛtshɔkɔ ɛsɔ. (Isaya 48:18) Sawo diayela diayɛnya kɛnɛ kakokayɛ nsala kakianɛ dia monga l’atei w’anto wayoyokondja ɛtshɔkɔ wa diambo wa lo nshi yayaye.