Íwari, «búntikʉnʉ waʼmʉ minpasʉkwéy» zana nari nakʉn nuga ni. Jesuseʼ yanari: «Sʉmʉ du zanuʼ nanʉngwa ni» (Mateo 24:21). Eméy naʼzanuʼ nʉngwa reʼgawkwéy neki nanuʼ neki, ʉnkwa awkwéy niwikʉnʉna ni. Azi nikamʉ kawʉnno.

Jesukrístuseʼ gaʼkʉnamʉ waseyna neyka eméy níkʉkwa yana ni: «Reʼgukʉngwasi Chukumana bema gwasiri minsaʼgwi takʉn núkʉkwa, awiri Niwipawseʼ nanʉyʉʼkin reʼgúkʉya neyka» (Mateo 6:33). Azi gwasi izanʉnno.

«Reʼgukʉngwasi Chukumana bema gwasiri minsaʼgwi takʉn núkʉkwa». Niwipawseʼ Reʼgukʉngwasi Chusana bema gwasiri awʉtari ʉnkaʼchwamʉ kawa ni gwasi neyka ni (Luka 12:22, 29-31). Iari eméy nikamʉ kawʉnno. Niwipawseʼ nʉʼkin chʉwi zanamʉ kʉchunha awkwéy kʉnʉna nameʼ, ikʉseʼri eméy nikʉkwéy kʉnanuʼ neyka ni.

«Niwipawseʼ nanʉyʉʼkin reʼgúkʉya neyka» takʉn núkʉkwa. Émari Niwipáw zʉgaʼkʉnamʉ awiri a zʉkunsamʉ ayéy uzweinʉngwa meʼzánʉkwa gwasi neyka ni. Iari eméy nikamʉ kawʉnno. Duna awiri du nanuʼ neyka nʉʼn zʉʼn ʉnkʉreʼgukʉnarwe meʼzánʉkwa nʉndi, du nanuʼ neyka zʉʼn ʉnkʉtákʉkwa nʉngwa ni (Proverbios 16:25). Ey ʉweʼki, Jeuwaseʼ yay zweykwa nanʉndi, zeyzey aʼkusiri dugwi nari zweykwa nanʉngwa ni (Isaías 48:17, 18).

Jesuri iari «Reʼgukʉngwasi Chukumana bema gwasiri minsaʼgwi takʉn núkʉkwa awiri Niwipawseʼ nanʉyʉʼkin reʼgúkʉya neyka» tákʉkwa yanʉnno. Iʼngwiri ɉwi zʉʼn nʉkʉnanʉn du naʼzakino aʼzari nʉ́nkʉri, Niwipawzey neyka awʉ́ʼ reʼbori azoriza nameʼ ey yana ni.  Iʼngéygwiri inʉ gugín nʉkʉnanʉngwa aʼzari Niwipawseʼ Reʼgukʉngwasi Chusana takʉkwari awkwéy nʉkʉnanuʼ náy aʼzʉna ni (Luka 12:22-31, 33, 34).

Ey ʉweʼki, Niwipawseʼ Reʼgukʉngwasi Chusana twiré kʉyari inʉ gugín kʉnariri, tʉkin pari sʉmʉ ɉuna kʉnanʉngwa ni, Jesuseʼri waseyna ni (Mateo 6:33).

Jesú kʉriwiʉya ɉina Niwipawseʼ Reʼgukʉngwasi Chusana awiri aseʼ nanʉyʉʼkin reʼgúkʉya neyka minsin wintana neki, chʉwi zanamʉ kʉchori ʉwa neyka winchuʼ nʉnna ni. Ey ʉweʼki, du winaʼzʉnna ni. Iari du aʼzʉnnʉnno.

Niwipáw zʉkunsamʉ noʼsi zoyana nameʼ, ikʉ Jeuwá aʼnoʼkuʼ neyka azi chʉwi aʼzanʉndi, akingwi neki winaʼzanuʼ nʉnna ni. Tʉkin pari Reʼgukʉngwasi Chukumana naka awʉngwa nanʉnno winaʼzʉnnameʼ, buníʼgʉmʉ ingumʉ́n winʉkʉnareʼki, kaʼnugwenʉkwéy kʉnanʉngwasi kaʼmʉkana una ni. Awiri, «Niwipawseʼ nʉʼkin ɉumamʉ ingumʉ́n aʼzʉna wésʉya» aʼmechʉkwéy kʉnanʉngwasi aʼwe una ni (2 Corintios 4:7-9).

Kristianu Jesú ʉnwichaki winkwana nʉnnari a yay Niwipawseʼ Reʼgukʉngwasi Chusana minsin wintʉga nʉnna ni. Ema sí duna gaʼkʉnamʉ zʉnáy winwasey una ni (Colosenses 1:23). Íwari eméy winniga ey kwʉya no.

¡Ey kwʉya ni! Jeuwá sí gaʼyeyka ɉinari Niwipawseʼ Reʼgukʉngwasi Chusánari du zanuʼ neykari bin zanuʼgwi kʉreʼguka awʉngwa ná winaʼzʉna ni. Ey ʉwameʼ, Jesú yanáy zweinʉngwa winaʼzʉna ni: «Duna gaʼkʉnamʉ Sakuku Reʼgukʉngwa sí kaʼgʉ́mʉseʼ tʉgʉnsa akwʉn nugáy wasey ukumʉngwa ni. Ey unigeʼri, akowna ʉnzanika awʉngwa ni» (Mateo 24:14).

Duna gaʼkʉnamʉ nʉnoʼkwa unigeʼri, ma azi nʉnikʉngwa no. Ikʉ birin zanʉn Beréa winkwʉya nʉnna niʼnáy niʼnari niweʼzʉnin. Apóstol Pábruseʼ duna gaʼkʉnamʉ wásʉya winnoʼkwa uyeʼri, winhaguzari ipana awiri «gaʼkʉnámʉseʼ yeyka du sekʉnariri», winʉkʉnoʼsi riwiana neykari ayéy winʉnkuzoya una ni (Hechos 17:11, 12).

Akingwi nikʉkwéy mikʉnariza ni. Niwipawseʼ Reʼgukʉngwasi Chusana awiri aseʼ nanʉyʉʼkin reʼgúkʉya minsin nʉtakʉndi, iwa minkwa awiri tʉkin pari áʼkwakin tanʉ meʼzanʉngwa ni.