Sa kaagid na paagi, madali na niyatong maeksperyensiyahan an sarong mapandestrosong “bagyo,” inapod iyan ni Jesus na panahon nin “dakulang kasakitan.” (Mateo 24:21) Dai ta basta-basta madudulagan an kasakitan na iyan. Pero, may magigibo kita tanganing makaligtas. Ano iyan?

Sa saiyang Sermon sa Bukid, itinao ni Jesu-Cristo an pagbuot na ini: “Kaya padagos na hanapon nguna an Kahadian [nin Diyos] saka an saiyang katanusan.” (Mateo 6:33) Paano ta iyan magigibo?

Hanapon nguna an Kahadian nin Diyos. Nangangahulugan ini na dapat na mas mahalaga sa sato an Kahadian nin Diyos kisa sa ano pa man na bagay. (Mateo 6:25, 32, 33) Taano? Huling dai talaga kayang solusyunan kan mga tawo an mga problema kan katawuhan. An Kahadian nin Diyos sana an may kakayahan na magresolber kaiyan.

Hanapon an saiyang katanusan. Dapat niyatong hinguwahon na mamuhay kauyon kan matanos na mga pagbuot asin prinsipyo nin Diyos. Taano? Huling kun kita an madesisyon para sa satong sadiri kun ano an tama asin sala, kapaha-pahamak an magigin resulta kaiyan. (Talinhaga 16:25) Sa ibong na lado, kun mamumuhay kita kauyon kan mga pamantayan nin Diyos, dai ta lang mapapaugma an Diyos kundi makikinabang man kita.—Isaias 48:17, 18.

Padagos na hanapon nguna an Kahadian nin Diyos saka an saiyang katanusan. Nagpatanid si Jesus na puwedeng maiwara kan iba an saindang pokus, na iniisip na magigin tiwasay sinda pag dakul sindang  ginaganar na kuwarta. An iba man tibaad mapangibabawan na marhay kan mga kahaditan sa buhay kaya mayo na sindang panahon para hanapon an Kahadian nin Diyos.—Mateo 6:19-21, 25-32.

Alagad, nanuga si Jesus na an mga nagsusuportar sa Kahadian nin Diyos tatawan kan mga pangangaipo ninda ngunyan asin magkakamit nin daing katapusan na mga bendisyon sa maabot.—Mateo 6:33.

Maski ngani hinanap nguna kan mga disipulo ni Jesus kan inot na siglo an Kahadian nin Diyos saka an saiyang katanusan, dai ninda nahiling sa bilog nindang buhay an katapusan kan gabos na kulog asin pagsakit. Pero naprotektaran sinda. Paano?

Namuhay sinda kauyon kan matanos na mga pamantayan nin Diyos, asin iyan an nagprotektar sainda sa mga kadipisilan na inagihan kan mga nagbaliwala sa mga sinabi nin Diyos. An saindang makusog na pagtubod na maabot an Kahadian nakatabang sainda na maatubang dawa an pinakamasakit na mga problema. Saka tinawan sinda nin Diyos nin “puwersa na urog kisa sa ordinaryo” tanganing makatagal sinda.—2 Corinto 4:7-9.

Sinunod kan mga Kristiyano kan inot na siglo an pagbuot ni Jesus na hanapon nguna an Kahadian. Ihinulit ninda an maugmang bareta kan Kahadian sa gabos na lugar na nadumanan ninda. (Colosas 1:23) Igwa daw nin naggigibo kaiyan ngunyan?

Igwa! Aram kan mga Saksi ni Jehova na halipot na sana an panahon na natatada bago tapuson kan Kahadian nin Diyos an presenteng sistemang ini nin mga bagay. Kaya ginigibo ninda an gabos para utubon an sinabi ni Jesus: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.”—Mateo 24:14.

Ano an magigin reaksiyon mo sa maugmang bareta na nadangog mo? Lugod na an gibuhon mo kapareho kan ginibo kan mga nakaistar sa siyudad nin Berea sa Macedonia kan inot na siglo. Kan sabihon sainda ni apostol Pablo an maugmang bareta kan Kahadian, “interesadong marhay sindang nagdangog” sa mensahe asin inako iyan. Dangan, ‘maingat nindang siniyasat an Kasuratan’ para aramon kun baga totoo an mga nadangog ninda, asin naghiro sinda kauyon kan saindang nadangog.—Gibo 17:11, 12.

Puwede mo man na gibuhon iyan. Paagi sa paghanap nguna kan Kahadian nin Diyos asin kan saiyang katanusan, mapoprotektaran ka ngunyan saka magkakamit nin nagdadanay na katuninungan asin katiwasayan sa maabot.