Icishinka ca kuti inshita ileisa ilyo ifintu fili no kwafya sana mu calo kwati ni filya cingaba nga kuli icinkukuma. Yesu aitile iyi nshita ukuti “ubucushi ubukalamba.” (Mateo 24:21) Ubucushi bukalamba bukaba fye mpanga yonse, kanshi takwakabe ukwa kubutukila. Nomba finshi twingacita pa kuti tukapusuke?

Ilyo Yesu Kristu alelanda Ilyashi lya pa Lupili atile: “Intanshi mulefwaya ubufumu [bwa kwa Lesa] no bulungami bwakwe.” (Mateo 6:33) Bushe kuti twafwaya shani Ubufumu bwa kwa Lesa no bulungami bwakwe intanshi?

Intanshi mulefwaya Ubufumu bwa kwa Lesa. Aya amashiwi yalelangilila ukutila, Ubufumu bwa kwa Lesa e bo tulingile ukubikako sana amano ukucila icintu icili conse. (Mateo 6:25, 32, 33) Mulandu nshi tufwile ukucitila ifi? Pantu abantu te kuti bapwishe amafya yonse ayo tukwata. Ubufumu bwa kwa Lesa fye e bwingapwisha amafya yonse ayo tukwata

Mulefwaya ubulungami bwakwe. Tufwaya ubulungami bwa kwa Lesa nga tule-esha na maka ukukonka amafunde ya kwa Lesa na mashinte ya mafunde yakwe. Mulandu nshi tufwile ukulafwaila ubulungami bwakwe? Ni co bonse nga tulecita fye ifyo tulefwaya, ifintu mu calo kuti fyabipa. (Amapinda 16:25) Nomba nga tulekonka ifyo Lesa atweba, tulalenga asekelela kabili na ifwe bene tukalaba ne nsansa.—Esaya 48:17, 18.

Mulefwaya Ubufumu bwa kwa Lesa no bulungami bwakwe. Yesu asokele abantu ukuti  bamo bakaleka ukubika amano ku Bufumu bwa kwa Lesa no kutendeka ukumona kwati indalama e shingabacingilila. Bambi nabo babika sana amano ku kuisakamana ica kuti tabakwata ne nshita ya kucita ifya kwa Lesa.—Mateo 6:19-21, 25-32.

Yesu alandile ukuti, bonse abatungilila Ubufumu bwa kwa Lesa, bakakwata ifyo bakabila pali ino nshita kabili bakapaalwa ilyo bakakwata umweo wa muyayaya ku ntanshi.—Mateo 6:33.

Nangu ca kuti abasambi ba kwa Yesu abakubalilapo balefwaya Ubufumu intanshi, tabalekele ukucula. Na lyo line Yehova alebafwa. Bushe alebafwa shani?

Yehova alibapeele amafunde ayalebafwa ukuba ne mibele iisuma ne ci calengele belakwata amafya ayalekwata abantu abashaleumfwila Lesa. Alibapeele isubilo lya kuti bakaba mu Bufumu bwakwe, kabili ili isubilo lyalebafwa na lintu balekwata amafya ayakalamba sana. Na kabili Lesa alebapeela “amaka yacila aya bantunse” ayalebafwa ukushipikisha amafya.—2 Abena Korinti 4:7-9.

Abena Kristu bakubalilapo balyumfwilile ifyo Yesu abebele ukuti bafwile ukubika Ubufumu intanshi, kabili balibilile imbila nsuma konse uko baleikala. (Abena Kolose 1:23) Bushe kwaliba abacita ifi na pali ino nshita?

Ee! Inte sha kwa Yehova balishiba ukuti nomba line Lesa ali no kukanda bonse abacita ifyabipa. E ico balabombesha ukukonka ifunde Yesu atupeele ilya kuti: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

Bushe na imwe mwakulakutika ku mbila nsuma? Tulemukoselesha ukulapashanya abantu abaleikala mu musumba wa bena Makedonia uwa Berea, abaliko mu nshita ya batumwa. Ilyo umutumwa Paulo abilile imbila nsuma iya Bufumu kuli bena, ‘bafwaishe nga nshi ukupokelela amashiwi ya kwa Lesa.’ Lyena “balefwailisha mu Malembo” pa kuti bashininkishe nga ca kutila fyonse ifyo balebasambilisha fyali fya cine, kabili pa numa ya ifi balitendeke ukucita ifyo balesambilila.—Imilimo 17:11, 12.

Na imwe bene kuti mwacita ifyo bacitile. Nga mulefwaya Ubufumu bwa kwa Lesa no bulungami bwakwe intanshi, akalamwafwa no kumucingilila kabili mukengila mu calo cipya umukaba umutende umuyayaya.