Ro baboine kako, kero wer roi ḇemnis wam doḇer nari myun. Yesus dap na ḇe ’kandera ḇeba’. (Matius 24:21) Kokam na kopok kokrenbur kandera ḇeba ine ḇa. Mboi, bisa kofrur roi nari ḇekadaunwarek ko. Rosairirya?

Rofyor Yesus Kristus dawos faya ro urek, danun kaku radine, ”Mkosewar bepon [Karajan] Allah ma [kakaku] ḇyedi.” (Matius 6:33) Moḇsa koso anun ine rai?

Kosewar ḇepon Karajan Allah. Ine iso komam Karajan Allah ḇe roi ḇefandun syadi ro roi ḇesena. (Matius 6:25, 32, 33) Rosai ḇefnai ya? Kukro snonkaku sya sipok sifrur samswen sena fa nakrenbur si ḇa. Karajan Allah monda naiso ḇefrur roi ine.

Kosewar kakaku Ḇyedi. Kosewar kaku fa kokenem imnis Allah parenta ma farkankin ḇekaku Ḇyena. Rosai ḇefnai ya? Kukro kokinfir fa kofrur roi ḇekaku ma ḇesasar ro mankunko ido, nari koḇye ḇa. (Amsal 16:25) Imbape, kokenem imnis Allah marisen Ḇyena ido, nari kofrur fa imarisen ma kosmai payamyum.​—Yesaya 48:17, 18.

Kosewar ḇepon pdef Karajan Allah ma roi ḇekaku ro mamam Ḇyena. Yesus ḇyuk swarapepen ḇepon ḇo doḇe nari sia sisewar roi ḇese ma skara nari skain pyum syadi rofyor sismai pipi nabore. Ḇesesya wer simkakwarek  syadi kenem sena, inja sna swaf oḇa fa sisewar ḇepon Karajan Allah.​—Matius 6:19-21, 25-32.

Imbape, Yesus ikofen kaku ḇo doḇe snonkaku ḇesaramper Karajan Allah nari sismai roi sfandun ro fafisu ine ma barakas ḇekain fyoro ro ras ḇarpon iyama.​—Matius 6:33.

Yesus manfamyan ḇyesi ro abad randak siwara smam papupes ya ryama ḇaim ro fafisu sena, mboi sisewar ḇepon Karajan Allah ma roi ḇekaku ro mamam Ḇyena. Rarirya, sismai kadaun. Kadaun sairiri?

Sikenem imnis Allah marisen Ḇyena, inja nane nkadaunwarek si ro samswen ḇekur snonkaku ḇemewer ḇesouser roi Allah ikofen na. Sikyar nako Karajan Allah nari ryama, inja fafisu sismai samswen ḇemarḇak ro kenem sena, sisusu ḇa. Ma Allah ḇyuk faro si ’papoik ḇeba syadi’ insa sisambraḇ pdef.​—2 Korintus 4:7-9.

Snonkaku Kristen ḇero abad randak siwara, sisouser Yesus parenta ḇyena fa sisewar ḇepon Karajan Allah. Sḇaryas ankinem ḇepyum Karajan ro moḇ ḇebor ro supswan ine. (Kolose 1:23) Mam ono sisya sakfrur roi ine ro baboine ke?

Imbo! Saksi-Saksi Yahwe sifawi fafisu ya fyanam kaku kwar faro Karajan Allah fa kyakok dunya ḇeḇarḇor ine. Inja, sisewar kaku fa sisouser Yesus parenta ḇyenane: ”Ankinem ḇepyum kuker Karajan ine nari sḇaryas na ro supswan ine ḇesiper, insama ḇyesaksi faro er syakam, insape papupes ya ryama.”​—Matius 24:14, NW.

Rofyor rwower ankinem ḇepyum ine kwar, rosai na wafrur ya? Nkanun ḇe Au fa wakfrur raris kawasa ḇero mnu Berea, ro Makedonia moḇ sifrur raya. Fafisu srower ankinem ḇepyum ḇekur Karajan Allah ro Manwawan Paulus i kwar, ’simnaf wos ya kuker sne ḇemarisen syadi’. Ramnai ’sfarkor mnis kaku Refo ya’ fa sḇukikara rosai srower kwar anna nkaku ke roḇa, ma sifrur na ro kenem sena.​—Farfyar 17:11, 12.

Bisa wakfrur raris si kako ḇae. Swewar ḇepon Karajan Allah ma roi ḇekaku ro mamam Ḇyena ido, nari wasmai kadaun ro fafisu ine kako ma ro ras naiwama, nari wasmai payamyum ḇekain fyoro-fyoro.