Nya ajôô a ne na, bia bese bia nyiñ vôme beta “ôkôs” a zu vuñ; Yésus a nga loene beta ôkôs ate na ‘beta étibela’a.’ (Matthieu 24:21) Teke jam éziñ bi ne bo asu na beta ôkôs ate a bo teke lôt. Ve bi ne bo jam éziñ asu na bi nyii biabebien. Jé bi ne bo?

Éyoñe Yésus Krist a nga bo Nkañete ya Nkôle Yôp, a nga ve abendé di: “Tata’a jeñan [Éjôé] Zambe, a zôsô wé.” (Matthieu 6:33) Aval avé bi ne tôñ abendé éte?

Tata’a jeñan Éjôé Zambe. Nalé a tinane na Éjôé Zambe nje bia taté telé ôsu a biôm bivo’o bise. (Matthieu 6:25, 32, 33) Amu jé? Amu Éjôé Zambe nje étam é ne mane vaa minju’u mise bone be bôt ba tôbane mie, sa ke mona môt.

Tata’a jeñan zôsô wé. Bia yiane jeñ a ngul ése na bi tôñe metiñ a miñye’elane mi Zambe. Amu jé? Amu nge bi tyi’i na bia bisi ki, nge ke na bia bo avale bia yi, bia ye tôban amala. (Minkana 16:25) Éyoñe bia tôñe memvinda me Zambe, bia ve nye nlem avak, biabebien bia bi fe abui bibotan.​—Ésaïe 48:17, 18.

Tata’a jeñan Éjôé Zambe, a zôsô wé. Yésus a nga kate bia na, abui mam e ne bo na bi vuan mam ma dañe mfi, a simesane na, bia yiane jeñ abui moné asu na nlem ô bômbô bia si. Bevo’o be ne saé a lôte nné asu na be jalé  miñyiane ya menda me bôte map, be telé ki Éjôé Zambe mvus.​—Matthieu 6:19-21, 25-32.

Ve Yésus a nga ka’ale ba bese ba telé Éjôé Zambe ôsu na ba ye bi mam mese ma sili be éyoñe ji, a bu’uban abui bibotane melu ma zu.​—Matthieu 6:33.

E ne été na éyoñe Yésus a mbe a kobô’ô beyé’é bé ya ntete mimbu ôsu na be taté jeñe Éjôé Zambe a zôsôô wé, be nji yen ane minju’u miap mia man été été. Ve Yéhôva a nga ba’ale be. Aval avé?

Mbôle be mbe be tôñe’e metiñe me Zambe, be nga kui na be ba’ale bebien mfuban a sa’ale minju’u bôte ba bisi ki metiñe me Zambe ba tôbane mie. Ndi nlem be mbe be bili Éjôé Zambe é nga volô be na be dañe minju’u mise be nga tôbane mie, to’o mi mia dañe ayaé. Nde fe Zambe a nga ve be “ngul é ne tee ave’ane” asu na be dañe minju’u mite.​—2 Becorinthien 4:7-9.

Bekristen ya ntete mimbu ôsu be nga tôñ abendé Yésus a nga ve be na be taté jeñ Éjôé Zambe. Jôm ete nje be nga kañete mbamba foé y’Éjôé Zambe mesi mese be mbe be yeme’e. (Becolossien 1:23) Ye bôte befe ba bo ésaé éte den?

Ôwé! Bengaa be Yéhôva ba yeme na éyoñ é nto étun a na Éjôé Zambe é mbeme zu tyam émo ji. Jôm ete nje ba ve ngule jap ése na be tôñ abendé Yésus di: “Mbamba foé ya [Éjôé] Zambe nyô a ye katebane si se, a ye bo meyoñe mese ndem; wôna asu’ulane de aye bo.”​—Matthieu 24:14.

Wo ye nyoñe mbamba foé ate aya? Bia ve wo ngule nyule na ô vu bôte ya tisone ya Bérée, e Macédoine. Éyoñe nlômane Paul a nga kañete be mbamba foé ya Éjôé, be nga “nyoñ mbamba foé a évévé ése.” Be nga ‘tu’a fase mintilan’ asu na be yem nge jam be nga wôk é mbe bebela, a tôñe mam be nga yé’é.​—Mam Minlôman 17:11, 12.

Wo fe ô ne vu be. Nge ô taté jeñ Éjôé Zambe a zôsô wé, wo ye nyii womiene den, a wo ye nyiñe mvo’é été melu ma zu.