Eena wahn way, aala wi di liv eena wahn ayrya weh wahn bad “staam” wahn hit. Jeezas mi seh da staam wahn bee wahn taim a chrobl. (Machyu 24:21) Wi noh ga no way wi ku goh fi eskayp da staam. Bot wi ku du sohnting fi protek wiself. Da weh dat?

Eena Jeezas Sermon pahn di Mongt, ih mi gi wi dis inschrokshan: “Weh unu fi aym fa fos, da fi bee paat a di kingdom a hevn ahn liv rait, laik how hihn waahn.” (Machyu 6:33) How wi ku du dat?

Aym fers fi bee paat a di Kingdom a Gaad. Dat meenz dat Gaad Kingdom fi bee moa impoatant tu wee dan eniting els. (Machyu 6:25, 32, 33) Wai wi shuda feel da way? Bikaaz hyoomanz jos kyaahn solv aala dehn oan prablemz. Onli Gaad Kingdom ku du dat.

Liv rait, laik how Gaad waahn. Wi shuda chrai wi bes fi liv akaadn tu Gaad raichos laa ahn prinsipl dehn. Wai? Bikaaz if wi disaid fi wiself weh rait ahn weh rang, wi wahn mek bad disizhanz ahn wi wahn haftu pay di prais. (Proverbs 16:25) Pahn di ada han, if wi liv bai Gaad standadz, wi wahn mek hihn hapi ahn wee wiself wahn benifit tu.—Isaiah 48:17, 18.

Kip aan di aym fers fi bee paat a Gaad Kingdom ahn fi liv rait. Jeezas mi waan wi dat lata dischrakshan deh weh mait mek sohn peepl feel laik dehn ku bee sayf if dehn mek az moch moni az dehn kud. Ada peepl mait  foakos soh moch a dehn taim an enerji pahn dehn evriday prablemz dat dehn noh ga no taim fi aym fi bee paat a Gaad Kingdom.—Machyu 6:19-21, 25-32.

Bot Jeezas mi pramis dat enibadi weh sopoat Gaad Kingdom wahn ga evriting weh dehn need now ahn dehn wahn injai lata blesinz eena di fyoocha.—Machyu 6:33.

Eevn doa Jeezas disaipl dehn eena di fers senchri mi-di aym fi bee paat a Gaad Kingdom ahn fi liv rait, dehn neva si di en a aal payn ahn sofarin eena fi dehn taim. Bot dehn mi stil fain protekshan. How?

Dehn mi liv bai Gaad raichos standadz, ahn dat mi protek dehn fahn di prablemz weh peepl sofa wen dehn noh lisn tu Gaad. Fi dehn schrang fayt dat di Kingdom wahn kohn mi help dehn fi fays di moas seeryos prablemz. Ahn Gaad mi gi dehn “di reel grayt powa” soh dat dehn kuda mi bayr op.—2 Korintyanz 4:7-9.

Di Kristyan dehn eena di fers senchri mi obay Jeezas koman fi aym fers fi bee paat a di Kingdom. Dehn mi preech di Kingdom gud nyooz aal oava di paat a di werl weh dehn mi liv. (Koloashanz 1:23) Enibadi di du dat tudeh?

Yes! Jehoava Witnisiz andastan dat onli lee bit a taim lef bifoa Gaad Kingdom bring wahn en tu dis sistem a tingz. Soh dehn du evriting weh dehn kud fi du di werk weh Jeezas mi prafesai: “Di Gud Nyooz bowt di kingdom a hevn wahn geh preech oava di hoal werl soh dat aala di nayshan dehn ku yehr di chroot, ahn den di en wahn kohn.”—Machyu 24:14.

How yoo wahn rispan tu di gud nyooz? Wi bayg unu fi kapi di egzampl a di peepl weh mi liv da di Masidoanyan siti a Bereeya eena di fers senchri. Wen dehn mi hyaa di gud nyooz bowt di Kingdom fahn di apasl Paal, dehn mi eega fi aksep di mesij. Den “evri day dehn stodi di Skripcha” fi si if weh dehn mi hyaa da chroo, ahn dehn mi staat tu liv akaadn tu weh dehn mi laan.—Aks 17:11, 12.

Yoo ku du di saym ting. Aym fers fi bee paat a Gaad Kingdom ahn fi liv rait. If yu du dat yu wahn fain sayfti ahn protekshan now, ahn yu wahn injai pees ahn bee sayf fareva eena di fyoocha.