An realite, nou tou nou pe viv dan en lepok kot en “tanpet” pe vini. Zezi ti apel sa “tanpet” en “gran ladetres.” (Matye 24:21) Nou pa pou kapab evit sa ki pou arive. Me i annan en keksoz ki nou kapab fer pour nou ganny proteze. Ki nou devret fer?

Dan son Sermon lo Montanny, Zezi Kri ti donn sa konsey: “Kontinyen rod Rwayonm [Bondye] ek son ladrwatir premye.” (Matye 6:33) Ki mannyer nou fer sa?

Rod Rwayonm Bondye premye. Sa i vedir ki Rwayonm Bondye i devret sa keksoz pli enportan dan nou lavi. (Matye 6:25, 32, 33) Akoz? Parski imen pa kapab rezourd bann problenm ki dimoun pe fer fas avek, zis Rwayonm Bondye ki kapab fer sa.

Rod son ladrwatir. Nou devret fer zefor pour viv dapre bann lalwa ek prensip drwat Bondye. Akoz? Parski si nou desid pour nou menm sa ki byen ek sa ki mal, nou pou ganny en kantite problenm. (Proverb 16:25) Par kont, si nou swiv bann standar Bondye, nou pa pou zis fer li plezir me nou pou osi ganny bann byenfe.​—Izai 48:17, 18.

Kontinyen rod Rwayonm Bondye ek son ladrwatir premye. Zezi ti averti nou konsernan bann keksoz ki kapab distrer nou, parey tay deryer larzan akoz nou krwar ki nou pou an sekirite. Lezot i kapab sitan trakase  avek bann problenm lavi ki zot napa letan pour rod Rwayonm Bondye.​—Matye 6:19-21, 25-32.

Par kont, Zezi ti promet ki bann ki siport Rwayonm Bondye pou ganny sa ki zot bezwen la konmela e en kantite benediksyon a lavenir.​—Matye 6:33.

Menm si bann disip Zezi dan premye syek ti rod Rwayonm Bondye ek son ladrwatir premye, douler ek soufrans ti ankor egziste dan zot letan. Me zot ti ganny proteze. Ki mannyer sa?

Zot ti viv annakor avek standar drwat Bondye e sa ti protez zot kont bann problenm ki bann ki pa ti obei bann standar Bondye ti gannyen. Vi ki zot ti annan lafwa ki Rwayonm Bondye pou vini, sa ti ed zot fer fas menm avek bann gro problenm. Bondye ti donn zot sa “lafors . . . ki pli pwisan ki [zot] prop lafors” pour ki zot kontinyen andire.​—2 Korentyen 4:7-9.

Bann Kretyen dan premye syek ti obei lord Zezi pou rod Rwayonm premye. Zot ti anons sa bon nouvel lo Rwayonm partou dan zot rezyon. (Kolosyen 1:23) Eski i annan dimoun ki pe fer sa ozordi?

Wi! Temwen Zeova i rekonnet ki i pa reste bokou letan pour Rwayonm Bondye met en lafen avek sa move lemonn. Alor zot fer tou sa ki zot kapab pour obei sa ki Zezi ti dir: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.”​—Matye 24:14.

Eski ou pou aksepte sa bon nouvel? Nou ankouraz ou pour fer parey bann zabitan dan lavil Bere, Masedwann dan premye syek. Ler zapot Pol ti anons sa bon nouvel Rwayonm avek zot, zot ti aksepte sa mesaz “avek bokou lentere.” Apre, zot ti “egzamin Lekritir” pour vwar si sa ki zot ti’n tande i vre e zot ti aplik sa ki zot ti aprann.​—Akt 17:11, 12.

Ou kapab fer parey ou osi. Si ou rod Rwayonm Bondye ek son ladrwatir premye, ou pou ganny proteze la konmela e ou pou viv anpe e an sekirite pour touzour a lavenir.