Maʉ̃ kĩrãkʼa dayirãma uru «pʉãdrʉ zromata». Maʉ̃ra Jesubara trʉ̃gabʉ «zʉbʉria zromata» (Mateo 24:21). Dayirã naʉ̃ pʉãdrʉ zromaneba ẽdrʉ ẽ mina dayirãba jʉrʉseabʉ sama mirʉita. ¿Kʼãrẽta oibara?

Jesukristoba Katumane Bedʼea bia Jaradara, naʉ̃ta jarasi: «Kʼãwũãena, nããra jʉrʉidua Daizeze Nokʼota adewara iya aripe omarẽãbʉta» (Mateo 6:33). ¿Naʉ̃bara kʼãrẽta jarakĩrãbʉ?

«Kʼãwũãena nããra jʉrʉidua Daizeze Nokʼota». Naʉ̃ba jarakĩrãbʉ Daizeze Nokʼora audre yibiata nekʼãrẽ baduira (Mateo 6:25, 32, 33). ¿Kʼãrẽa mawũã krĩchadaibara? Dayirã ẽbẽrabara bedʼea zroma naʉ̃ drʉadebʉra ara obeda ẽ. Daizezebʉrʉ jõma ara oseabʉ.   

«Iya aripe omarẽãbʉta» nããra jʉrʉibara. Naʉ̃ba jarakĩrãbʉ dayirã zarea oibarata iyi leyba jarabʉta akʉza Daizeze Bedʼearadebemaba jarabʉta ũrĩta. ¿Kʼãrẽa? Dayirãba dayikʉza jidabʉbʉrʉ saʉ̃ta biata akʉza saʉ̃ta bia ẽãta mawũãra bia wã ẽ bayi (Proverbios 16:25). Mamina Jeowaba jarabʉta ũrĩpanʉbʉrʉ iyita sobiabiyi akʉza dayirãta bia wãñi (Isaías 48:17, 18).

¿Kʼãrẽa Jesubara jarasi: «Kʼãwũãena nããra jʉrʉidua Daizeze Nokʼota adewara iya omarẽãbʉta»? Mawũã jarasi ʉ̃kʉrʉ ẽbẽrarãba krĩchapanasi baera plata mejãcha erbʉbʉrʉ aduʼa bʼaita. Ʉ̃kʉrʉra mejãcha krĩcha  zroma obʼaita nekʼãrẽ ũduita ãyi bia bʼaita maʉ̃ba ewari neẽbayi Daizeze Nokʼodebema nãã bʉeita (Mateo 6:19-21, 25-32).

Mamina, Jesubara jarasi Daizeze Nokʼoarebʉ ẽbẽrarãbara nekʼãrẽ jõma erbaita adewara ãya nebia ũduita idi ewade akʉza ʉ̃ra zeide (Mateo 6:33).

Jesu kʼaidubemaraba nããra jʉrʉsidamina Daizeze Nokʼota akʉza aripe osidamina, ãyara ũdu ẽ basi zʉbʉria taʉdogota. Mamina ãyara ũdusida aduʼapanaita. Maʉ̃ra, ¿sãwũã ũdusida?

Ãya Daizezeba zokʼabʉta ũrĩsida baera zʉbʉriada ẽ basi wuabema ẽbẽrarã Jeowaba jarabada ũrĩna ẽ kĩrãkʼa. Jesu kʼaidupanʉrabara Daizeze Nokʼo zeita wãrĩnu ĩjãpanʉ baera awuantasida ãyi bedʼea zroma erpananara. Akʉza Daizezeba diasi «zarea zromara» ãya awuantadamarẽã (2 Corintios 4:7-9).

Kristianora siglo nabemarabara ũrĩsida Jesuba zokʼadara Daizeze Nokʼodebema nããra jʉrʉita. Bedʼea bia Daizeze Nokʼo ʉ̃rʉbemata jaradiasida ãyibʉmae (Colosenses 1:23). ¿Bʉka idi ewadera maʉ̃rane kĩrãkʼa opanʉra?  

Mawũã. Jeowa ʉ̃rʉ Kʼawuabipanʉrãbara kʼawuapanʉ Daizeze Nokʼoba naʉ̃ drʉade kayirua opanʉra jõma makenaira arakʼaitabata. Maʉ̃ kʼarea zarea opanʉ aripe odaita Jesuba naʉ̃ bedʼea jaradata: «Kʼãwũã bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kʼawuadʼaya, mobebʉrʉ zeya ewari nʉmʉta jõĩrã» (Mateo 24:14).

¿Bʉara kʼãrẽta oi naʉ̃ bedʼea bia ũrĩbʉrʉdera? Kʼarebabʉ abarika omarẽã ẽbẽrarã pʉwʉrʉ Berea, Macedonianebema kĩrãkʼa, maʉ̃ pʉwʉrʉra nabema siglobasi. Bedʼea bia Daizeze Nokʼodebema ʉ̃rʉ ũrĩsidadera Pabloba jaradiadata, aramaʉ̃ta ũrĩkĩrã ũrĩsida akʉza Daizeze Bedʼea ewariza akʉsida, mama jarabʉra wãrĩnu kʼawuaita adewara maʉ̃ta oũdubisida (Hechos 17:11, 12).

Bʉabida abarika oseabʉ. Nããra jʉrʉibara Daizeze Nokʼota adewara iya aripe omarẽãbʉta, mawũã ora ũduyi sama mirʉita adewara kʼarebata idi ewade akʉza ʉ̃ra zeide neneẽãbayi adewara aduʼabayi ewari jõmaʉ̃nẽ.