Son a ponda, biso̱ pe̱ di me̱nde̱ be̱ne̱ “mùdi” munde̱ne̱ mwena Yesu a bele̱no̱ ná “ndenge̱ ninde̱ne̱.” (Mateo 24:21) Di titi ná di ńa ni ndenge̱ ninde̱ne̱ mīla. Nde je ná di bola lambo ná di sunge longe̱ lasu o niponda. Nje so̱ e?

O ekwal’ao omo̱ń a Mundongo, Yesu a boli din jome̱le̱ ná: “Bińo̱ se̱le̱ nde pulise̱ janea la Loba na te̱me̱ lao la sim.” (Mateo 6:33) Ne̱ni bola nika e?

Se̱le̱ nde pulise̱ Janea la Loba. Nik’e mapula nde o kwala ná Janea la Loba nde langame̱n be̱ mweńa buka mambo me̱se̱ o longe̱ lasu. (Mateo 6:25, 32, 33) Ońola nje e? Ońolana bato ba benama ba titi ná ba bo̱le̱ mitakisan ma mbel’a moto. Janea la Loba buka te̱ nde je ná di bola y’ebolo ende̱ne̱.

Pulise̱ te̱me̱ lao la sim. Jangame̱n po̱ngo̱ miwe̱n me̱se̱ ná di die̱le̱ longe̱ lasu bupisane̱ mambenda na bete̱sedi be te̱m ná sim ba Loba. Ońola nje e? Ońolana di no̱ngi te̱ bedomsedi ná di mate̱se̱ye̱ biso̱me̱ne̱ nje ye bwam na nje ye bobe, nik’e me̱nde̱ nde ya bepuma ba bobe. (Minia 16:25) Nde o diwengisan, di die̱le̱ te̱ longe̱ lasu bupisane̱ bete̱sedi ba Loba, di si me̱nde̱ buka te̱ bwese̱ Loba muńe̱nge̱, nde biso̱me̱ne̱ pe̱ di me̱nde̱ tombwane̱.​—Yesaya 48:17, 18.

Benga se̱le̱ pulise̱ Janea la Loba na te̱me̱ lao la sim. Yesu ome̱le̱ biso̱ ná bato bō̱ ba  me̱nde̱ lo̱ndo̱be̱ na din jo̱nge̱le̱ ná be ná ba be̱ne̱ mbo̱le̱ yete̱na ba tule̱ mo̱ni. Bape̱pe̱ ba me̱nde̱ jese̱le̱ ná mitaka ma longe̱ mi ńo̱se babo̱ o dikala lena ba si me̱nde̱no̱ pe̱ be̱ne̱ ponda o pulise̱ Janea la Loba.​—Mateo 6:19-21, 25-32.

Nde Yesu a kakane̱ ná ba bena ba masue̱le̱ Janea la Loba ba me̱nde̱ be̱ne̱ nje e mapule̱ babo̱ tatan, nde ba kusa pe̱ minam kie̱le̱ ni maye̱.​—Mateo 6:33.

To̱ná bokwedi ba Yesu ba ebwe’a mbu yaboso ba se̱le̱no̱ nde pulise̱ Janea la Loba na te̱me̱ lao la sim, ba s’e̱n su la ndutu na take. Nde ba ta ba be̱ne̱ betatedi. Ne̱ni e?

Nika ba tano̱ ba die̱le̱ longe̱ labu bupisane̱ bete̱sedi be te̱m ná sim ba Loba, nika e ta e tata babo̱ na mitakisan mena mi ta mi ko̱ye̱ ba bena ba si ta ba sengane̱ Loba. Dube̱ labu di bam ná Janea la Loba di me̱nde̱ po̱, longwane̱ babo̱ o lembe̱ mitakisan minde̱ne̱. Loba a boli pe̱ babo̱ “ngińa ni pakapakan” ná ba we̱le̱ o lembe̱.​—2 Korinto 4:7-9.

Kriste̱n ya ebwe’a mbu yaboso i bupe̱ byanedi ba Yesu ba se̱le̱ pulise̱ Janea. Ba te̱ dikalo la myango ma bwam ma Janea o wase o ni pond’abu. (Kolose 1:23) Mo̱ bato be bena ba mabole̱ nika we̱nge̱ e?

E! Mboṅ a Yehova i bi ná ponda ni dia ná Janea la Loba di ye e titi pe̱ ndongo. Ońola nika, ba mabola nje ye̱se̱ beno̱ ná ba bola o die̱le̱ longe̱ labu bupisane̱ ben byala ba Yesu: “Min myango ma bwam ma janea mi me̱nde̱ langwabe̱ o wase ńe̱se̱ o be̱ mboṅ ońola matumba me̱se̱; denge̱ su di mapo̱.”​—Mateo 24:14.

Ne̱ni o me̱nde̱no̱ kasa myango ma bwam e? Di mome̱le̱ wa o jembilane̱ bato ba Berea o Makedonia ba ebwe’a mbu yaboso. Ponda ba sengino̱ myango ma bwam ma Janea Paulo a langwedino̱ babo̱, ba kasi mo̱ “na mulema mwe̱se̱.” Ombusa nika, ba ‘wasi betiledi’ ná ba be̱ mbaki na nje beno̱ o senga, na babo̱ ba po̱ngulane̱ pe̱ malonge̱ mabu bupisane̱ nje bokono̱.​—Bebolo 17:11, 12.

Wa pe̱ we ná o bola mulemlem. O se̱le̱ te̱ pulise̱ Janea la Loba na te̱me̱ lao la sim, o me̱nde̱ kusa betatedi tatan, o tombwane̱ pe̱ musango na mbo̱le̱ kie̱le̱ ni maye̱.