Adan an sans, nou tout ka rété asou chimen an « tanpèt » ki ka fè gwo déga, ki Jézi aplé « gran tribilasion » (Matié 24:21). Sa enposib chapé anlè chimen tribilasion-tala. Men pwotéjé kònou, sa posib. Kisa pou fè ?

Adan Diskou’y anlè mòn-lan, Jézi ba konsin sékirité-tala : « Kontinié chèché Wayòm-lan èk jistis Bondié an prèmié » (Matié 6:33). Ki manniè suiv konsin-tala ?

Chèché wayòm Bondié an prèmié. Sa lé di, fòk wè wayòm Bondié pli enpòwtan ki tout bagay (Matié 6:25, 32, 33). Poutji fòk konsidéré’y konsa ? Paskè lézòm enkapab menm réglé pwoblèm limanité. Sé sèlman wayòm Bondié ki pé réyalizé gwo travay rèd-tala.

Chèché jistis Bondié. Fodré nou rèspèkté lwa épi prensip jis Bondié ka ba nou. Pou kisa ? Pas lè nou ka désidé nou menm sa ki bien oben sa ki mal, sa pa bon menm ba nou (Pwovèb 16:25). Okontrè, lè nou ka viv an akò épi prensip Bondié, non sèlman nou ka fè Bondié plézi, men nou ka trapé anpil bienfè (Izayi 48:17, 18).

Kontinié chèché Wayòm-lan èk jistis Bondié an prèmié. Jézi di, détwa moun pa té kèy wè lenpòwtans fè sa, pas yo té kay pansé touvé lasékirité lè yo ka chèché genyen plis lajan. Dòt té kèy lésé lentjétid lavi-a pran tout tan-yo, kifè yo pa té kèy ni tan pou « chèché » wayòm Bondié-a (Matié 6:19-21, 25-32).

 Men, Jézi pwonmèt sé moun-lan ki té kèy soutni wayòm Bondié, yo té kèy risivwè sa ki nésésè adan lavi-yo jòdi-jou é an patjé bienfè adan lavni (Matié 6:33).

An 1^ié sièk-la, magré sé disip Jézi-a té ka chèché Wayòm épi jistis Bondié an prèmié, yo pa wè lasoufwans disparèt pandan yo té vivan. Men, yo trapé pwotèksion. Ki manniè ?

Yo té ka rèspèkté sé prensip jis Bondié-a, sa ki té ka pwotéjé yo di pwoblèm sé moun-lan ki pa té ka kouté Bondié té ka jwenn. Anplis di sa, yo té bien asiré ki Wayòm-lan té kèy vini, sé sa ki té kèy endé yo sipòté éprèv, menm sé pli rèd-la. Anfen, Bondié té ka ba yo « puisans-lan ki fò pasé sa ki nòwmal » pou yo pé sa afwonté sé difikilté-a (2 Korentjen 4:7-9).

Sé krétjen 1^ié sièk-la obéyi koumandman Jézi : yo chèché mété Wayòm-lan an prèmié. Yo préché bon nouvèl Wayòm-lan tout koté yo té ka viv (Kolosien 1:23). Ès i ni moun ka fè sa jòdi-jou ?

Wi ! Sé Témwen Jéova-a ka konprann i pa rété anpil tan pou wayòm Bondié détwi monn-tala. Sé pou sa yo ka fè tou sa yo pé pou akonpli travay-la Jézi ba yo-a lè i di : «Yo kay préché bon nouvèl Wayòm-lan toupatou anlè latè, pou sèvi témwayaj pou tout nasion. Apré sa, sé kéy lafen » (Matié 24:14).

Koumanniè zòt kèy réyaji a bon nouvèl-tala ? Nou ka ankourajé zòt imité san pèd tan sé moun-lan ki viv an 1^ié sièk-la : moun ki té ka viv Béré, an vil Masédwàn. Lè apòt Pòl palé yo di bon nouvèl Wayòm-lan, yo asèpté mésaj-la « pas yo té toujou présé tann pawòl-la ». Apré, yo ‘pran tan èkzanminé sé Ékriti-a’ pou yo vérifié si sa yo tann té vré. Épi, yo mété an pratik sa yo té aprann (Ak 17:11, 12).

Zòt pé fè kon yo. Si zòt ka chèché Wayòm-lan èk jistis Bondié an prèmié, dépi aprézan zòt kèy touvé an pwotèksion é zòt kèy konnèt plita lapé épi lasékirité pou toujou.