Maaʼulu yaa, alüʼülaasü wanainmüin wanee kasa müsü aka saaʼin wanee wawai keemashaatasü maʼin. Tia shia tü müliaa miyoʼusükat naashin Jesuu (Mateo 24:21). Mayaapejeʼe nnojoluin süpüla wounjulaain süpüleerua tia müliaa antajatkat, eeshii süpüla walatüin süchikumüin. ¿Kasa waaʼinrajatka süpüla wountuin tia?

Soʼu nikirajüin Jesuu saaʼu wanee namüna, müshi nia: «Jaaʼinmaa waneepia sukuwaʼipa nuluwataaya Maleiwa otta tü kasa anakat noʼuluʼu» (Mateo 6:33, TNM). ¿Kasa nüküjeeka achiki Jesuu?

Jaaʼinmaa waneepia «Sukuwaʼipa Nuluwataaya Maleiwa». Tü nüküjeekalü achiki Jesuu, shia kojutuleeinjatüin maʼin wamüin Nuluwataaya Maleiwa suulialeʼeya kasa süpüshuaʼa (Mateo 6:25, 32; Mateo 6:33, TNM). Waaʼinrüinjatü tia süka isain süchiki wayuu sunouteʼerüin süpüshuaʼa tü kasa mojusü alatakat sainküin mma. Niaʼala neʼe Maleiwa eekai süpüla anouteʼerüin tia.

Jaaʼinmaa waneepia «tü kasa anakat noʼuluʼu» Maleiwa. Tü nüküjeekalü achiki Jesuu shia wachajaainjatüin maʼin sukuwaʼipa süpüla woonooin sümaa tü nünüikikat Maleiwa, süka jamüin, wayale aneeküin tü anakat jee tü mojukat süpüla waaʼinrüin, nnojoleerü anain wakuwaʼipa (Proverbios 16:25). Eekajasaʼa woonoole sümaa tü nümakat Jeʼwaa, talateechi nia wamaa otta aneerü wakuwaʼipa (Isaías 48:17, 18).

¿Jamüsü waaʼinmaainjatka waneepia «Sukuwaʼipa Nuluwataaya Maleiwa otta tü kasa anakat noʼuluʼu» naashin Jesuu? Nüküjain Jesuu eein na eekana süpüla jülüjajain naaʼin aneerüin nakuwaʼipa kachiiruale naaʼin washirü. Eetaashii na  shapaakana aaʼin waneepia saaʼu tü nepijaainjatkalü aaʼu sümaa motuin naaʼin naaʼinmaainjatüin waneepia naʼyataainka nümüin Maleiwa (Mateo 6:19-21, 25-32).

Nüküjapejeʼe Jesuu aneerüin maʼin nakuwaʼipa na jülüjakana aaʼin waneepia Sukuwaʼipa Nuluwataaya Maleiwa otta wainmeerü kasa anasü neʼreetkat nutuma Maleiwa (Mateo 6:33, TNM).

Mayaapejeʼe naaʼinmaain waneepia na nikirajüinkana Jesuu Sukuwaʼipa Aluwatawaa nutuma Maleiwa otta tü kasa anakat noʼuluʼu, nnojotsü neʼrüin sajaʼttüin tü kasa mojusükat nakalioʼu. Eʼrapajaʼa naya kasa anasü nutuma Maleiwa.

Süka noonooin sümaa tü nümakat Maleiwa nnojoishii naya eʼrüin tü müliaa neʼrakat na moonooinkana sümaa nünüiki Maleiwa. Süka neʼitaain maʼin naaʼin sünain nüikaleʼerüinjatüin Maleiwa Sukuwaʼipa Aluwatawaa, nachecherüin naaʼin soʼunnaa tü kasa eekai sülatüin namüin otta naapüin Maleiwa namüin yalayalaa aaʼin süpüla nountuin tia (2 Corinto 4:7-9).

Na anoujashii namaiwajannuukana naaʼinmaasü waneepia tü naʼyataainkat nümüin Maleiwa otta naküjain sümüin wayuu tü pütchi anasükat süchiki Nukuwaʼipa Maleiwa sünain Aluwatawaa (Colosas 1:23). ¿Jaraliiche na aküjakana maaʼulu tü pütchi anasükat sainküin mmaka?

Naya na aküjaliikana pütchi nüchiki Jeʼwaa. Natüjaa aaʼu sülüʼülüin sükalia süpüla najaʼttirüin Maleiwa süpüshuaʼa tü kasa mojusü eekat yaa mmapaʼa. Müshijeseʼe naaʼinrüin tü nümakat Jesuu soʼu nümüin: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14).

¿Kaseerü paaʼinraka paapapa süchiki tü pütchi anasükat? Anasü püshatüle nakuwaʼipa na anoujashii eejanakana namaiwa chaa Berea, suluʼu tü mmakat Macedonia. Nüküjapa Pablo namüin süchiki Nukuwaʼipa Maleiwa sünain Aluwatawaa, kapülasü naaʼin tia pütchikat, «naashajeʼerawalin waneepia tü karaloukta nüchikimaajatkat Maleiwa süpüla natüjaainjatüin saaʼu müleka müleʼeya tü münakat namüin» otta naaʼinrüin süpüshuaʼa tü nekirajaakalü anain (Aluwataaushikana 17:11, 12).

Eesü süpüla paaʼinrüin tia. Paaʼinmaale waneepia Sukuwaʼipa Aluwatawaa nutuma Maleiwa otta tü kasa anakat noʼuluʼu, eʼreechi pia kasa anasü maaʼulu otta aneerü pukuwaʼipa jee jimateerü paaʼin mapeena.