Ke bendar iya, siti “ribut” ke amat balat deka nyadi. Jesus ngambarka nya baka “penusah ti besai.” (Matthew 24:21) Kitai enda ulih nyeliahka utai tu, tang kitai ulih ngereja sekeda utai ngambika ulih dilindung. Nama ulih digaga kitai?

Dalam Cheramah Atas Bukit, Jesus madahka, ‘Tang giga dulu Perintah Petara enggau pengelurus Iya.’ (Matthew 6:33) Baka ni kitai ulih nitihka pesan Jesus?

Ngemeratka Perintah Petara. Reti nya, Perintah Petara patut nyadi utai ti pemadu beguna ba pengidup kitai. (Matthew 6:25, 32, 33) Nama kebuah? Laban mensia enda ulih mutarka penanggul ke ditapi sida. Semina Perintah Petara ulih mutarka nya.

Ngemeratka utai ti bendar ba mata Petara. Kitai patut enggau naka ulih nitihka adat enggau prinsip Petara. Nama kebuah? Enti kitai deka nentuka nama utai ti betul enggau salah kediri empu, kitai baka ke nginti penusah. (Jaku Dalam 16:25) Tang enti kitai idup nitihka chara ke diasuh Petara, kitai ukai aja ngenyenangka ati Iya, tang mega deka bulih mayuh berekat.—Isaiah 48:17, 18.

Seruran beberatka Perintah Petara enggau utai ti bendar ba mata Iya. Jesus madahka sekeda orang engka dilimpangka, lalu berunding sida deka selamat enti ngembuan mayuh  duit. Ke bukai nya, engka kelalu irau enggau penanggul ba pengidup nyentukka nadai awak ngemeratka Perintah Petara.—Matthew 6:19-21, 25-32.

Jesus besemaya enti kitai nyukung Perintah Petara, utai ke diguna kitai diatu deka dijaga lalu kitai deka ngasaika mayuh berekat nyentukka jemah ila.—Matthew 6:33.

Bala murid Jesus ba abad ti keterubah enggau naka ulih beberatka Perintah Petara, sereta utai ti bendar ba mata Iya. Taja pan sida enda meda nama pengujung semua penusah enggau pemerinsa, sida deka dijaga. Baka ni?

Ketegal sida ngasika Perintah Petara, sida ulih dilindung ari penanggul ke ditapi orang ke enda ngasika adat Petara. Sida amat pechaya Perintah Petara deka datai, lalu tu nulung sida mengkang tegap taja pan lebuh napi penguji ti pemadu berat. Petara mega meri sida “kuasa ti besai” ngambika ulih napi mayuh macham penanggul.—2 Korint 4:7-9.

Orang Kristian abad ti keterubah nitihka pesan Jesus enggau ngemeratka Perintah Petara. Sida ngerembaika Berita Manah pasal Perintah Petara ba sebarang endur. (Kolosi 1:23) Kati bisi orang bukai ngereja nya kemayaharitu?

Bisi! Saksi-Saksi Jehovah nemu enda lama da agi, Perintah Petara deka ngujungka penyai ba dunya tu. Nya alai, sida enggau naka ulih ngereja pengawa ke disebut Jesus: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14)

Nama digaga nuan pengudah ninga berita manah tu? Kami mai nuan nitihka teladan orang Beria ba abad ti keterubah. Lebuh rasul Paul madahka Berita Manah pasal Perintah Petara, sida “ransing amat” nerima pesan nya. Sida mega “mansik Bup Kudus” kena nunjukka berita ke ditusui nya endang utai ti bendar. Udah nya, sida ngereja pengawa ti sejalai enggau utai ke dipelajar sida.—Kereja Rasul 17:11, 12.

Nuan mega ulih ngereja utai ti sama. Enti nuan beberatka Perintah Petara enggau utai ti bendar ba mata Iya, nuan deka dilindung ari diatu lalu ngasaika pengidup ke jemah ila ti bisi pemaik enggau pengelikun.