O ta ũu, o mĩtũkĩ ithyonthe tũkilye kũkimwa nĩ “kĩuutani” kya ngelekany’o kĩla Yesũ wakĩtie “thĩna mũnene.” (Mathayo 24:21) Vaiĩ ũndũ tũtonya kwĩka tũikethĩwe nĩ thĩna ũsu mũnene. Ĩndĩ ve ũndũ tũtonya kwĩka tũkesũvĩa. Nĩ ũndũ mwaũ ũsu?

Nthĩnĩ wa Ũtavany’a wa Kĩĩmanĩ, Yesũ aumisye ũtao ũũ: “Endeeai ĩndĩ kũmantha mbee Ũsumbĩ [wa Ngai] na ũlũngalu wake.” (Mathayo 6:33) Tũtonya kwĩka ũu ata?

Kwa kũmantha mbee Ũsumbĩ wa Ngai. Ũu nĩ kwasya kana twaĩlĩte kwona Ũsumbĩ wa Ngai ta kyo kĩndũ kĩla kya vata vyũ. (Mathayo 6:25, 32, 33) Nĩkĩ? Nĩkwĩthĩwa vaiĩ ĩvinda andũ makamina mathĩna ala mekw’o. No Ũsumbĩ wa Ngai ũtonya kwĩka ũu.

Kwa kũmantha ũlungalu wake. Twaĩlĩte kũtata ũndũ tũtonya tũatĩĩe mĩao na myolooto ya Ngai ya ũlũngalu. Nĩkĩ twaĩlĩte kwĩka ũu? Kĩtumi nũndũ twanyuva kwĩtw’ĩĩa ne ithyĩ kĩla kĩseo na kĩla kĩthũku, maũndũ mailea kũthũka. (Nthimo 16:25) Ĩndĩ twanyuva kũatĩĩa myolooto ya Ngai, tũkamũtanĩthya na maũndũ maitũ makaaĩla.—Isaia 48:17, 18.

Endeea kũmantha mbee Ũsumbĩ wa Ngai na ũlũngalu wake. Yesũ amanyĩisye kana andũ amwe nĩmatonya kwelelũka nũndũ wa kũsũanĩa kana kũmantha mbesa mbingĩ nĩkũtonya kũmaetee ũtanu.  O na aisye kana, andũ amwe no maeke mawĩmakĩo ma nthĩ ĩno mamavĩngĩĩse nginya maĩwe nĩ ĩvinda ya kũmantha Ũsumbĩ wa Ngai.—Mathayo 6:19-21, 25-32.

Kĩvathũkany’o na andũ asu, Yesũ aisye kana ala makwataa mbau Ũsumbĩ wa Ngai makeanĩaw’a mavata moo ũmũnthĩ, na mayĩthĩwa na wĩkwatyo wa kũtanĩa moathimo maingĩ mũno ungu wa Ũsumbĩ wa Ngai.—Mathayo 6:33.

O na kũtw’ĩka amanyĩw’a ma Yesũ ma ĩvinda ya atũmwa nĩmamanthaa mbee Ũsumbĩ wa Ngai na ũlũngalu wake, makwie matanamba kwona mũminũkĩlyo wa mathĩna. Ĩndĩ maĩ asũvĩĩku. Ũu nĩ kwasya ata?

Nĩmaatĩĩa myolooto ya ũlũngalu ya Ngai, na kwĩka ũu nĩkwamasũvĩie maikakwatwe nĩ mathĩna ala makwatie andũ ala mataamwĩthukĩĩsya Ngai. Nũndũ maĩ na mũĩkĩĩo mũlũmu kana Ũsumbĩ wa Ngai ũkooka, nĩmeethĩiwe matonya kũmĩanĩsya na mathĩna maito mũno. O na ĩngĩ, Ngai nĩwamanengie “vinya ũvĩtũkĩte wa mũndũ” nĩ kana momĩĩsye.—2 Akolintho 4:7-9.

Aklĩsto ma ĩvinda ya atũmwa nĩmaatĩĩie mwĩao wa Yesũ wa kũmantha Ũsumbĩ mbee. Nĩmatavanisye ũvoo mũseo wa Ũsumbĩ kĩla vandũ kĩsionĩ kyoo. (Akolosai 1:23) Vo ve andũ mekaa ũu ũmũnthĩ?

Ĩĩ. Ngũsĩ sya Yeova nĩsyĩsĩ kana vatialĩte ĩvinda ĩnini Ũsumbĩ wa Ngai wanange nthĩ ĩno ya Satani. Kwoou nĩsyĩkaa kyonthe kĩla itonya syĩke kwosana na kĩĩ Yesũ wawetie yĩla waisye: “Ũvoo ũũ mũseo wa Ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya ũivika.”—Mathayo 24:14.

We ũkeeka ata wooka kũtavw’a ũvoo mũseo? Twĩkwĩsũva wĩke o ta andũ ma ndũa ya Velia ĩla yaĩ kĩsionĩ kya Masetonia. Yĩla andũ asu meewie mũtũmwa Vaulo aitavany’a ũvoo mũseo ĩũlũ wa Ũsumbĩ wa Ngai, nĩmeetĩkĩlile “ĩla ndeto na mea maingĩ.” Na ĩtina wa ũu, “nĩmakunĩkĩlaa Maandĩko” nĩ kana maĩkĩĩthye kana maũndũ ala matavaw’a nĩ ma w’o, na maiatĩĩa kĩla meemanyĩsya.—Meko ma Atũmwa 17:11, 12.

O naku no wĩke tamo. Wamantha Ũsumbĩ wa Ngai na ũlũngalu wake mbee, ũkekalaa wĩ mũsũvĩĩku, na ĩvinda yũkĩte ũkekalaa wĩ na mũuo na ũte na mũisyo tene na tene.