Di mésmu manera, nos tudu nu sta kuazi ta ben pasa pa un grandi “tenporal”, ki Jizus txoma di ‘un grandi frónta’. (Mateus 24:21 ) Nu ka ta pode fuji di kel grandi frónta. Má, nu pode faze algun kuza pa nu skapa. Kuzê ki nu pode faze?

Na kel diskursu ki Jizus faze na un monti, el fla: ‘Nton, nhos kontinua ta buska Reinu i justisa di Deus primeru.’ (Mateus 6:33 ) Modi ki nu ta faze kel-li?

Buska Reinu di Deus primeru. Kel-li krê fla ma Reinu di Deus debe ser kel kuza más inportanti na nos vida. (Mateus 6:25, 32, 33 ) Pamodi ki nu debe pô-l na primeru lugar? Pamodi ómis ka ta konsigi rezolve prublémas di mundu. É sô Reinu di Deus ki pode faze-l.

Buska se justisa. Nu debe faze nos midjór pa nu vive sima kes lei justu di Deus ta fla. Pamodi? Pamodi si nu disidi pa nos kabésa kuzê ki é dretu ô mariadu, nu ta ten maus rezultadu. (Provérbios 16:25 ) Má, si nu vive sima leis di Deus ta fla, nu ta agrada Deus i tanbê nu ta ten un vida más filís. — Isaías 48:17, 18.

Kontinua ta buska Reinu i justisa di Deus primeru. Jizus aviza ma alguns algen ta  fikaba distraídu, pamodi es ta atxa ma si es ten txeu dinheru es ta sta suguru. Otus pode fika preokupadu dimás ku kuzas di dia-dia ki es ta fika sen ténpu i forsa pa poi Reinu di Deus na primeru lugar. — Mateus 6:19-21, 25-32.

Má, Jizus promete ma kes ki ta apoia Reinu di Deus ta ten tudu kes kuza ki es meste gósi i na futuru es ta ben ten bensons ki ka ta kaba. — Mateus 6:33.

Nbóra kes disiplu di Jizus ta buskaba Reinu di Deus i se justisa primeru, es ka odja dór ku sufrimentu ta kaba na ses ténpu. Má es protejedu. Modi?

Es vive sima kes lei justu di Deus ta manda. Pur isu, kel-li proteje-s di txeu prubléma ki kes algen ki ka obi ku Deus pasa pa es. Ses fé fórti ma Reinu ta binha, djuda-s aguenta ti kes prubléma más difísil. I Deus da-s ‘kel puder alén di normal’ pa es pode lidaba ku kes prubléma. — 2 Coríntios 4:7-9.

Kes kriston na ténpu di apóstlus buska Reinu primeru sima Jizus manda. Es prega notísias sábi di Reinu na tudu lugar ki tinha algen. (Colossenses 1:23 ) Ten algen ki sta faze kel-li oji?

Sin! Tistimunhas di Jeová ta kridita ma falta poku ténpu pa Reinu di Deus ben kaba ku kel mundu mau li. Pur isu, es ta faze tudu kel ki es pode pa faze kel trabadju ki Jizus pâpia di el: ‘Kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’ — Mateus 24:14.

Kuzê ki bu ta faze dipôs di obi notísias sábi? Nu ta insentiva-u pa bu imita kes algen ki ta viveba na sidadi di Berea na Masedónia. Kantu apóstlu Polu pâpia ku es di kes notísia sábi di Reinu, es seta se mensaji “ku tudu interesi”. Dipôs, es ‘studa Skrituras’ ku kuidadu pa es odjaba si kel ki es obi éra verdadi, i es faze sima es prende. — Atus 17:11, 12, BPK.

Bu pode faze mésmu kuza. Si bu buska Reinu di Deus i se justisa primeru, bu ta resebe proteson gósi i bu ta ten suguransa i pas pa tudu ténpu na futuru.