Kumban shu ong, ngi baroh ngi im ha ka por kaba ka “erïong” kaba jur bha ka la jan wan, kaba u Jisu u khot ka “kordit bah.” (Mathaïos 24:21) Ngim lah ban lait na kane ka kordit bah, hynrei ngi lah pat ban leh eiei ban ïada ïalade. Kaei kata?

Ha kawei na ki jinghikai ba pawnam jong u Jisu, u la hikai kumne: “Phin ïa wad shuwa ïa ka Hima U Blei bad ïa ka hok jong u.” (Mathaïos 6:33) Kumno ngin leh ïa kata?

Wad shuwa ïa ka Hima U Blei. Kane ka mut ba ka Hima U Blei ka dei ban long kaba kham kongsan ban ïa kaei kaei ruh. (Mathaïos 6:25, 32, 33) Balei ngi dei ban sngew kumta? Namar ki briew kim lah ban weng ïa ki jingeh jong u bynriew. Dei tang ka Hima U Blei kaba lah ban leh ïa kata ka kam kaba eh.

Wad ïa ka hok jong u. Ngi dei ban pyrshang ban im katkum ki aiñ bad ki hukum jong U Blei. Balei? Namarba lada ngi rai hi dalade ïa kaei kaba bha bad ïa kaei kaba sniew, ngi lah ban bakla. (Proberb 16:25) Ha kawei pat ka liang, lada ngi im katkum ki jinghikai jong U Blei, ym tang ba ngi pynsngewbha ïa u, hynrei ngi ïoh jingmyntoi ruh ïalade.—Isaïah 48:17, 18.

Ïai wad shuwa ïa ka Hima U Blei bad ïa ka hok jong ka. U Jisu u la maham ba don kiban shah pynthame ha ka spah; bad ki pyrkhat ba ka jingkamai spah kan wanrah jingsuk bad  jingshngaiñ ïa ki. Katba kiwei pat, namarba ki khuslai palat ïa ka jingim kim don por shuh ban wad ïa ka Hima U Blei.—Mathaïos 6:19-21, 25-32.

Hynrei, u Jisu u la kular lypa ba kito kiba kyrshan ïa ka Hima U Blei kin ïoh ïa ki jingdonkam jong ki mynta, bad kyrhai ki jingkyrkhu ha ka lawei.—Mathaïos 6:33.

Wat la ki synran jong u Jisu kiba im ha ka spah snem banyngkong ki la wad shuwa ïa ka Hima U Blei bad ïa ka hok jong u, ki khlem ïohi ïa ka jingkut jong ki jingjynjar. Hynrei ki la ïoh jingïada. Kumno?

Ki la im katkum ki jinghikai jong U Blei bad kata ka la ïada ïa ki na ki jingeh kiba la mad da kito ki bym suidñiew ïa kaei kaba U Blei u ong. Ka jingngeit baskhem jong ki ha ka Hima ka la ïarap ïa ki ban ïaleh wat ïa ki jingeh kiba shaba palat, bad U Blei u la ai ha ki ïa ka bor bah khnang ba kin lah ban shah ïa ki jingeh.—2 Korinth 4:7-9.

Ki Khristan ha ka spah snem banyngkong ki la kohnguh ïa ka hukum u Jisu ban wad shuwa ïa ka Hima U Blei. Ki la ïalap ïa ka khubor jong ka Hima U Blei ha kylleng ki jaka. (Kolossai 1:23) Don mano mano ba leh ïa kata mynta?

Hooid, ki Nongsakhi U Jehobah ki sngewthuh ba don sa tang khyndiat ka por shuwa ba ka Hima U Blei kan pynkut noh ïa ki jingsniew jong kane ka pyrthei. Te ki leh katba lah ban kohnguh ïa kine ki kyntien jong u Jisu: “Te ïa kane ka gospel jong ka hima yn ïalap ha ka pyrthei baroh, ïa kaban long ka jingphla ha ki kynja bynriew baroh; ynda kumta keiñ kan jia kata kaba kut.” —Mathaïos 24:14.

Hato phi la pdiang ïa kane ka khubor babha? Ngi kyntu ïa phi ban pyrthuhbud ïa ki nong Beria kiba im ha ka spah snem banyngkong. Haba ki la ïohsngew ïa ka khubor babha shaphang ka Hima na u Apostol Paul, ki la shah shkor bad ki la ïit bniah na ki jingthoh bakhuid ban pynshisha la ka dei ne em kumta. Nangta, ki la pdiang bad ki sa leh ïa kaei kaba ki la tip.—Ki Kam 17:11, 12.

Phi lah ban leh kumjuh. Da kaba wad shuwa ïa ka Hima U Blei bad ïa ka hok jong u, phin ïoh jingïada mynta, bad ïa ka jingsuk jingshngaiñ kaba shi junom ha ka lawei.