ចូរសម្រេចចិត្តគាំទ្ររាជាណាចក្ររបស់ព្រះនៅពេលឥឡូវនេះ!
សូមស្រមៃគិតថាមានព្យុះសង្ឃរាដ៏ខ្លាំងមួយកំពុងធ្វើដំណើរឆ្ពោះទៅតំបន់អ្នក។ ពួកអាជ្ញាធរប្រកាសការព្រមានជាបន្ទាន់ថា៖ «ចេញទៅ! រកទីជម្រកឥឡូវនេះទៅ!» តើអ្នកគួរធ្វើអ្វី? អ្នកពិតជាចង់ទៅកន្លែងដែលមានសុវត្ថិភាពមែនទេ?
តាមពិត យើងគ្រប់គ្នារស់នៅចំផ្លូវរបស់ព្យុះសង្ឃរាក្នុងន័យធៀប ដែលលោកយេស៊ូហៅថាគ្រា«ទុក្ខវេទនាជាខ្លាំង»។ (ម៉ាថាយ ២៤:២១) យើងមិនអាចគេចផុតពីគ្រានោះបានទេ។ ប៉ុន្តែយើងអាចធ្វើអ្វីមួយដើម្បីការពារខ្លួនយើង។ តើនោះជាអ្វី?
ក្នុងសុន្ទរកថានៅលើភ្នំ លោកយេស៊ូគ្រិស្តបានជូនការណែនាំនេះថា៖ «ដូច្នេះ ចូរបន្តស្វែងរករាជាណាចក្រនិងសេចក្ដីសុចរិតរបស់ព្រះជាមុន ហើយលោកនឹងផ្ដល់របស់ទាំងនេះឲ្យអ្នក»។ (ម៉ាថាយ ៦:៣៣) តើយើងអាចធ្វើដូច្នេះយ៉ាងដូចម្ដេច?
ស្វែងរករាជាណាចក្ររបស់ព្រះជាមុន។ នេះមានន័យថាយើងគួរចាត់ទុករាជាណាចក្ររបស់ព្រះគឺសំខាន់ជាងអ្វីៗទាំងអស់។ (ម៉ាថាយ ៦:២៥, ៣២, ៣៣) ហេតុអ្វីយើងគួរមានទស្សនៈដូចនោះ? ដោយសារមនុស្សមិនអាចដោះស្រាយបញ្ហារបស់ខ្លួនឡើយ។ មានតែរាជាណាចក្ររបស់ព្រះប៉ុណ្ណោះដែលអាចដោះស្រាយបញ្ហាដ៏ស្មុគស្មាញរបស់មនុស្សជាតិ។
ស្វែងរកសេចក្ដីសុចរិតរបស់ព្រះ។ យើងត្រូវខំអស់ពីសមត្ថភាពដើម្បីរស់នៅស្របតាមច្បាប់និងគោលការណ៍ដ៏សុចរិតរបស់ព្រះ។ ហេតុអ្វី? ពីព្រោះបើយើងសម្រេចចិត្តដោយខ្លួនឯងអំពីអ្វីដែលខុសនិងអ្វីដែលត្រូវ នោះនឹងនាំឲ្យមានលទ្ធផលអាក្រក់ក្រៃលែង។ (សុភាសិត ១៦:២៥) ប៉ុន្តែបើយើងរស់នៅស្របតាមខ្នាតតម្រារបស់ព្រះ យើងមិនគ្រាន់តែធ្វើឲ្យលោកពេញចិត្តប៉ុណ្ណោះទេ តែខ្លួនយើងនឹងទទួលប្រយោជន៍ផងដែរ។—អេសាយ ៤៨:១៧, ១៨
ចូរបន្តស្វែងរករាជាណាចក្រនិងសេចក្ដីសុចរិតរបស់ព្រះជាមុន។ លោកយេស៊ូបានព្រមានថាអ្នកខ្លះអាចបានត្រូវបង្វែរអារម្មណ៍ ហើយគិតថាការរកលុយឲ្យបានច្រើនបំផុតនឹងនាំឲ្យពួកគេមានសុវត្ថិភាព។ អ្នកឯទៀតប្រហែលឲ្យកង្វល់អំពីជីវិតពង្វក់ចិត្តពួកគេដល់ម្ល៉េះបានជាពួកគេគ្មានពេលដើម្បីស្វែងរករាជាណាចក្ររបស់ព្រះ។—ម៉ាថាយ ៦:១៩-២១, ២៥-៣២
ក៏ប៉ុន្តែ លោកយេស៊ូសន្យាថាពួកអ្នកដែលគាំទ្ររាជាណាចក្ររបស់ព្រះនឹងមានអ្វីដែលពួកគេត្រូវការនាពេលឥឡូវនេះ ហើយសប្បាយនឹងពរជារៀងរហូតនៅថ្ងៃអនាគត។—ម៉ាថាយ ៦:៣៣
ទោះជាពួកអ្នកកាន់តាមរបស់លោកយេស៊ូនៅសតវត្សរ៍ទី១បានស្វែងរករាជាណាចក្ររបស់ព្រះនិងសេចក្ដីសុចរិតរបស់លោកជាមុនក៏ដោយ តែពួកគេមិនឃើញការឈឺចាប់និងទុក្ខវេទនាទាំងអស់បានត្រូវកម្ចាត់ចោលក្នុងជីវិតពួកគេទេ។ ប៉ុន្តែពួកគេបានទទួលការការពារ។ តើតាមរបៀបណា?
ពួកគេបានរស់នៅស្របតាមខ្នាតតម្រាដ៏សុចរិតរបស់ព្រះ ហើយនេះបានការពារពួកគេពីការពិបាកផ្សេងៗដែលមនុស្សខ្លះមានដោយសារមិនអើពើនឹងប្រសាសន៍របស់ព្រះក្នុងគម្ពីរ។ សេចក្ដីសង្ឃឹមដ៏រឹងមាំដែលពួកគេមានទៅលើរាជាណាចក្រនឹងជួយពួកគេឲ្យប្រឈមមុខនឹងទុក្ខវេទនាដ៏ខ្លាំងបំផុត។ ម្យ៉ាងទៀត ព្រះផ្ដល់ឲ្យពួកគេនូវ«ឫទ្ធានុភាពដែលលើសពីធម្មតា»ដើម្បីពួកគេអាចស៊ូទ្រាំ។—កូរិនថូសទី២ ៤:៧-៩
តើអ្នកនឹងស្វែងរករាជាណាចក្ររបស់ព្រះជាមុនឬទេ?
នៅសតវត្សរ៍ទី១ គ្រិស្តសាសនិកបានយកចិត្តទុកដាក់ចំពោះការព្រមានរបស់លោកយេស៊ូ ឲ្យស្វែងរករាជាណាចក្ររបស់ព្រះជាមុន។ ពួកគេបានផ្សព្វផ្សាយដំណឹងល្អនៅទូទាំងតំបន់របស់ពួកគេ។ (កូឡុស ១:២៣) តើមានអ្នកណាដែលកំពុងធ្វើដូច្នេះនៅសព្វថ្ងៃឬទេ?
មាន! សាក្សីព្រះយេហូវ៉ាដឹងថាមិនសល់ពេលច្រើនទេមុនទីបញ្ចប់នៃរបៀបរបបពិភពលោកនេះមកដល់ ហេតុនេះពួកគេខំអស់ពីសមត្ថភាពដើម្បីធ្វើកិច្ចការដែលលោកយេស៊ូបានបង្គាប់ដែលថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។—ម៉ាថាយ ២៤:១៤
តើអ្នកនឹងតបឆ្លើយយ៉ាងណាចំពោះដំណឹងល្អ? យើងលើកទឹកចិត្តអ្នកឲ្យធ្វើតាមពួកអ្នកនៅសតវត្សរ៍ទី១ដែលរស់នៅក្រុងបេរៀ នាស្រុកម៉ាសេដូន។ ពេលពួកគេបានឮដំណឹងល្អអំពីរាជាណាចក្រពីសាវ័កប៉ូល ពួកគេទទួលដំណឹងនោះ«ដោយក្ដីរំភើប»។ រួចមក ពួកគេ«បានពិនិត្យមើលបទគម្ពីរ»ឲ្យដឹងថាដំណឹងនោះគឺស្របនឹងបទគម្ពីរឬយ៉ាងណា ហើយក្រោយមកពួកគេបានធ្វើតាមអ្វីដែលពួកគេបានរៀន។—សកម្មភាព ១៧:១១, ១២
អ្នកអាចធ្វើដូចគ្នាដែរ។ ដោយស្វែងរករាជាណាចក្រនិងសេចក្ដីសុចរិតរបស់ព្រះជាមុន អ្នកនឹងទទួលការការពារនៅពេលឥឡូវនេះ ហើយនៅអនាគតអ្នកអាចសប្បាយរីករាយនឹងសន្តិភាពនិងសន្តិសុខដែលមិនសាបសូន្យឡើយ។
លោកអ្នកក៏ប្រហែលជាចូលចិត្តដែរ
អំពីយើង
ហេតុអ្វីគួររៀនគម្ពីរ?
គម្ពីរផ្ដល់ចម្លើយចំពោះចម្ងល់អំពីជីវិតដល់មនុស្សរាប់លានអ្នកនៅទូទាំងពិភពលោក។ តើលោកអ្នកចង់បានចម្លើយដែរឬទេ?
ភ្ញាក់
របៀបរកផ្លូវដែលនាំឲ្យមានសុភមង្គល សេចក្ដីសង្ឃឹម
មនុស្សជាច្រើនពិបាកមានសុភមង្គល បើពួកគេមិនច្បាស់អំពីអនាគតរបស់ខ្លួននិងរបស់មនុស្សជាទីស្រឡាញ់។
