Yaa mangóson joni jngo huracán jmeni xi jeme kʼoakoa̱n. Kui je kjoañʼai xi nʼio tse xi kinchja̱ni Jesús (Mateo 24:21). Kʼianga kjoaʼaínená ngatsʼiaa kjoañʼai jebi, jméni xi koa̱n sʼiaan nga tjóʼalee yaoná.

Kʼianga kinchja̱ya je Jesús ya jngo sonnindo, i kitso: “Títjon tijnyísjao je kjoatéxomale Niná, kao kjoakixile” (Mateo 6:33). Jmé xi tsoyanile jebi.

Kui títjon kjoásjee je Chjotaxále Niná. Kui xi tsonile nga kui títjon si̱kʼéjnaa je Chjotaxále Niná (Mateo 6:25, 32, 33). Ánni. Nga̱ alikui kʼoakoa̱nná nga ñá chja̱ʼaxian kjoa xi tjín sonʼnde, tojé Chjotaxále Niná xi koa̱nle kjoaʼaxin ngayeje kjoa xi tjín.

Tosi tonda kjoásjee kjoatéxomakixile Niná. Kui xi tsonile nga si̱tjosoán kjoatéxomale Niná kao kjoafaʼaitsjen xi tsjoá. Ánni. Tsa tsín si̱tjosoán kʼoa tsa toñá xi kuixónñá jmeni xi ndatjín kao xi chʼaotjín, alikui ndasʼin kuichomani (Proverbios 16:25). Kʼoa tsa si̱tjosoán je kjoatéxomale Jeobá, tsjoa kjoáyaa kon kʼoa ndasʼin kuiyoaa (Isaías 48:17, 18).

Ánni nga kʼoakitsoni je Jesús nga tosi tonda kjoásjee je “kjoatéxomale Niná, kao kjoakixile”. Kuinga kʼoakitsoni nga tjínkʼa xi kʼoasʼin sikjaʼaitsjen nga kui tao̱n xi ndasʼin sikatío.  Kʼoa tjínkʼa xi nʼio sikjáojin nga koasjai josʼin koa̱njngíʼa yaole kʼoa alikui tisʼenile nichxin nga xále Niná sʼin (Mateo 6:19-21, 25-32).

Tonga je Jesús kʼoakitso nga tsín jme xi koa̱ntsínle je xi kui títjon Chjotaxále Niná koasjai kʼoa tsee kjoanichikontʼain so̱kole nichxin xi nroaján (Mateo 6:33).

Ningalani kui títjon Chjotaxále Niná tsakásjai je chjotatjenngile Jesús nga siglo 1, alikui kitjoxin je kjoañʼai nga kui nichxin. Ninga kʼoalani, jméni xi tsakinyakao nga nda kisatio kon.

Kui je kjoatéxomale Niná tsakinyakao nga tsínkui kjoa kitsaojin je kjoa xi kisʼele ʼyani xi tsín kjoatéxomale Jeobá kitjenngi. Nga kisʼele kjoamakjain tʼatsʼe Chjotaxále Niná kui xi tsakinyakao nga kichokjoanile ninga tse kjoa jaʼatojin. Kuinga kichokjoanile nga̱ jé Niná kitsjoale “nganʼio xi nʼio tse” (2 Corintios 4:7-9).

Je chjotale Cristo xi tsakatio nga siglo 1 kui títjon Chjotaxále Niná tsakásjai. Kitsoyason je énnda xi tʼatsʼe Chjotaxále Niná jñani tsakatio (Colosenses 1:23). A tjín je chjota xi kʼoatisʼin tsoyason Énle Niná nichxin xi tiyoaa ndʼaibi.

Jaon. Je testigole Jeobá majinle nga jeme koatexoma i̱ Sonʼnde je Chjotaxále Niná. Kuinga sítjosonni jmeni xi kitso je Jesús, kʼianga kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14).

Kʼoa ji, jósʼiain kʼianga kuinóʼyai je Énle Niná. Koaan chjénngilai je chjota xi tsakatio nga siglo 1 xi Macedonia tsʼe, naxinandá xi Berea nchja̱ni. Kʼianga kinrʼoé nga kitsoyason pastro Pablo nʼio koanndosinle je Énle Niná kʼoa kiskotʼayajin “je xo̱n Escritura” tsa kʼoatjín jme xi kinrʼoé kʼoa kisitjoson jmeni xi koanjinle (Hechos 17:11, 12).

Koaan kʼoati sʼiain tsanda ji. Kʼiatsa kui títjon kjoásjai je Chjotaxále Niná kao kjoatéxomakixile, ndasʼin kuijnai ndʼaibi, kʼoa nichxin xi nroaján alikui tixkón kuijnani, nga̱ sʼee kjoanyʼán ngantsjai nichxin.