Ywytu wato sakpo hap ewy watokosap hamo. Miꞌi hap etiat Iesui henoi Miꞌi hawyi ti aru poꞌog̃ topyhuꞌat hoꞌopot wuatꞌi eꞌāt piat hap kai e. (Mateu 24:21) Miꞌi hoꞌopot wato hap pupi ȳt watuwemig̃ kuapꞌi. Maꞌato miꞌi hap pupi watuwekawiano kuap. Maꞌato kat koꞌi asom waku watunug̃.

Yityꞌok tote Iesui toꞌe — Poꞌog̃ waku torānia kai ti eweiꞌaira eipyꞌa pyi āt kaꞌap Tupana eiporekuat no yn hap iꞌewȳte ewetunug̃ imikyꞌesat ri hawyi aru yne kat koꞌi kat koꞌi poꞌog̃ tomij̃um kai Tupana tum hamuat ehepe. (Mateu 6:33, TNM) Aikotā̃ me asom watunug̃ kuap iꞌe hap ewy.

Poꞌog̃ waku torānia kai ti etiꞌaira epyꞌa pyi āt kaꞌap Tupana eporekuat no yn hap. Miotā̃ e hap puo pyi aimūꞌe terān poꞌog̃ waku torānia kai Tupana Morekuat kape aiwanentup hap. (Mateu 6:25, 32, 33) Kat pote asom poꞌog̃ waku watuwanentup Tupana Morekuat kape. Kat pote Tupana Morekuat yn imomã kuap mesūwat yi totiat saꞌag̃ koꞌi wȳwo hap.

Waku etunug̃ imikyꞌesat ri. Niatpo pykai maꞌato waku watunug̃ Tupana woꞌonãpin hap ewy. Karāmpe aiwewi neꞌi watiꞌaira waku rakat ȳt nakuꞌi rakat pote miꞌi hap upi wahoꞌopot hamo. (Porowepiu 16:25) Maꞌato karāmpe watimontypot Tupana woꞌonãpin hap pote watimowepīt hamo miꞌi iꞌewȳte aheig̃neꞌen hap poꞌog̃ waku hamo hawyi aiwepīt hamo. — Isaia 48:17, 18.

Poꞌog̃ waku etiꞌaira epyꞌa pyi āt kaꞌap erewanentup etunug̃ Tupana eporekuat no hap kape yn. Hawyi waku etunug̃ imikyꞌesat ewy. Iesui henoi iraniaꞌīn mītꞌīn iꞌatuekareꞌen kahato terān iꞌewȳte iꞌatuedinheiro kahato terān. Miꞌitā̃ mote aru uheig̃neꞌen hap waku raꞌyn iꞌatuꞌe. Iꞌewȳte iraniaꞌīn teꞌeruwanentup kahato taꞌatumiꞌu taꞌatuesokpe koꞌi hap kape miꞌi pote teꞌeruwanentup kahatoꞌi Tupana Morekuat hap kape. — Mateu 6:19-21, 25-32.

Maꞌato Iesui toꞌe — Pȳwo. Tupana Morekuat montypot haria ti aru wuatꞌi eꞌāt pe toig̃ iꞌatukosap hamuat e. Iꞌewȳte taꞌatusāt kahato hamuat taꞌatupoitȳro hap koꞌi e. —  Mateu 6:33, TNM.

Iesui Potmūꞌeria tunug̃ aikotā̃ Mateu 6:33 piat hap ewy. Maꞌato taꞌatuhoꞌopot re iꞌewȳte niatpo te iꞌatuete. Maꞌato taꞌatumontypot mesūwat woꞌonãpin hap upi teꞌeruwekawiano. Aikotā̃ me asom.

Tupana woꞌonãpin ȳt montypotꞌi haria ete niatpo poꞌog̃ iꞌatuete. Maꞌato Iesui Potmūꞌeria taꞌatumontypot Tupana woꞌonãpin hap upi teꞌeruwekawiano miꞌi hap koꞌi pupi. Taꞌatumohey kahato Tupana Aiporekuat no hamuat hap ete. Miꞌi hap iꞌatupowȳro kahato sēse niatpo hap koꞌi akit hamo. Iꞌatupowȳro hamo Tupana tum iꞌatuepe topaꞌãu kat pote ahesaika hap toig̃neꞌen Tupana paꞌãu kaipyi hap. Ȳt aipīt yi kawiat kaipyiꞌi. —  2 Kurintiu 4:7-9.

Saꞌawyi wuaria Iesui mohey sēse haria tunug̃ aikotā̃ Mateu 6:33 piat hap ewy te. Miꞌiria teꞌerenentup kahato Tupana Morekuat hap kape. Miꞌi pote taꞌatuhenoi henoi kahato miꞌi hap etiat aj̃umpe tukupteꞌen mītꞌīn hap upi. (Korosi 1:23) Maꞌato korā̃ uwe asom miꞌi hap inug̃.

Ieuwa Ehay Enoi Haria tunug̃ miꞌi hap kat pote taꞌatukuap Tupana Morekuat yn imomã saꞌag̃ koꞌi wȳwo hamuat hap ȳt pyaꞌi raꞌyn hap. Miꞌi pote niatpo pykai taꞌatunug̃ aikotā̃ Iesui mienoi hap ewy. Mekewat eꞌāt pe owokai uhehay wakuat aikotā̃ Tupana topyhuꞌat Morekuat no wuatꞌi mītꞌīn muo yi wato hap oktān hap tuwemoherep. Miꞌi hap koꞌi toran naꞌyn hawyi ti aru ikahuro hap eꞌāt sēse putꞌokꞌe raꞌyn e Iesui. —  Mateu 24:14.

Korā̃ etikuap taꞌyn Tupana Morekuat etiat hawyi kan etunug̃ terān. Uruikyꞌesat kahato etunug̃ aikotā̃ tawa Pereia Masetunia piaria minug̃ hap ewy hap. Karāmpe Pauru henoi iꞌatuepe Tupana Morekuat etiat hawyi miꞌiria ti Tupana Ehay wakuat ikyꞌesat kahato. Tupana etiat taꞌatukuap terān koitypuo pȳwo pe koitypuo ȳtꞌi hap taꞌatukuap terān. Miꞌi hawyi taꞌatukuap hawyi taꞌatunug̃ aikotā̃ Tupana Ehay piat hap ewy raꞌyn. — Iesui Potmūꞌeria 17:11, 12.

Miꞌi hap ewy etunug̃ kuap wy. Tupana Morekuat kape ti erenentup iꞌewȳte etunug̃ imikyꞌesat ewy hawyi etipuenti hamuat sej̃am iheg̃ kahato rakat hamo kat pote eꞌieg̃neꞌen hap korā̃ waku pe hamo iꞌewȳte nusuken note wy.