মসিগা মান্ননা ঐখোয়গী মতমদা য়াম্না কনবা “নোংলৈ নুংশিৎ” কুম্বা অমা লাক্কদৌরি। মদুবু যীশুনা “শাথিবা অৱা অনা” হায়না কৌরম্মী। (মাত্থি ২৪:২১) ঐখোয় পুম্নমক্না হায়রিবা অৱা অনা অসি শোয়দনা থেংনরগনি। অদুবু মসিদগী ঐখোয় ইশা ঙাকথোকচনবা পাম্বৈশিং লৈ। মদু করি করিনো?

যীশুনা চীংথক্তা মীয়ামদা পীখিবা পাউতাক অদুদা “অহানবদা ঈশ্বরগী নিংথৌ লৈবাক অমসুং মহাক্কী ধর্ম্মচেনবা থিয়ু” হায়না হায়রম্মী। (মাত্থি ৬:৩৩) পাউতাক অসি ঐখোয়না করম্না ইঞ্জবা য়াগনি?

অহানবদা ঈশ্বরগী নিংথৌলৈবাক থিয়ু। মসিগী অর্থদি ঐখোয়না অতোপ্পা পুম্নমক্তগী ঈশ্বরগী নিংথৌলৈবাক্না হেন্না মরুওইনা লৌগদবনি হায়বনি। (মাত্থি ৬: ২৫, ৩২, ৩৩) অসুম্না করিগী হায়বা য়ারিবনো? মরমদি, ঐখোয়না থেংনরিবা সমস্যাশিং অসি মীওইবা অমত্তনা কোকহনবা ঙমদে। মসিবু কোকহনবা ঙমগদবদি ঈশ্বরগী নিংথৌলৈবাক খক্তননি।

মহাক্কী ধর্ম্মচেনবা থিয়ু। ঐখোয়না ঈশ্বরগী অচুম্বা য়াথং অমসুং নিয়মশিং ইঞ্জনবা ঙমজবা থাক্তা হোৎনগদবনি। মদু করিগী মরুওইরিবনো? মরমদি, ঐখোয় ইশানা অচুম অরান লেপচরবদি মদুগী মহৈ অফবা ওইরোই। (পাউরৌ ১৬:২৫) অদুবু, ঐখোয়না ঈশ্বরগী চৎন পথাপশিং ঙাক্না চৎচরবদি ঈশ্বরবু পেলহনবা খক্তা নত্তনা ঐখোয় ইশাগী কান্নবসু ওই।—যিশাইয়া ৪৮:১৭, ১৮.

অহানবদা ঈশ্বরগী নিংথৌলৈবাক অমসুং মহাক্কী ধর্ম্মচেনবা থিরগা লৈয়ু। মীওই খরনদি শেল য়াম্না তানবনা মখোয়গী পুন্সিদা নুংঙাইবা ফংগনি হায়না খল্লি। মদুনা মরম ওইরগা মখোয়গী পুক্নীং চোইথোকখিবা য়াই হায়না যীশুনা মাঙজৌননা খঙহল্লম্মী।  অতোপ্পা খরনা অমুক পুন্সিগী লাঙতক্নবশিংদা পুক্নীং লুপশিনখিবদগী মখোয়না ঈশ্বরগী নিংথৌলৈবাক থিনবগী মতম লৈতে হায়না খনবা য়াই।—মাত্থি ৬:১৯-২১, ২৫-৩২.

অদুম ওইনমক, ঈশ্বরগী নিংথৌলৈবাকপু শৌগৎচবশিংনা মখোয়গী হৌজিক হৌজিক্কী দরকার ওইবশিং ফংগনি অমসুং তুংদা মশীং থীঙমদ্রবা থৌজাল কয়াসু ফংগনি হায়না যীশুনা ৱাশক্লম্মী।—মাত্থি ৬:৩৩.

অহানবা সতাব্দিদা লৈরম্বা যীশুগী সেবোকশিংনা ঈশ্বরগী নিংথৌলৈবাক অমসুং মহাক্কী ধর্ম্মচেনবা থিজখি। অদুবু মখোয়না হিংলিঙৈ মতমদা অৱা অনা পুম্নমক্কী অরোয়বা উবদি ফংখিদে। অদু ওইরবসু মখোয়না হীরম কয়াদা কান্নবা ফংখি। মদু করম্না ফংখিবগে হায়বদু য়েংসি।

মখোয়না ঈশ্বরগী অচুম্বা চৎন পথাপশিং ইঞ্জখি। মদুনা মরম ওইরগা ঈশ্বরনা হায়বা ইনদবদগী থেংনবা খুদোংচাদবশিংদগী ঙাকথোকচবা ঙমখি। নিংথৌলৈবাক অদু শোয়দনা লাক্কনি হায়বগী অচেৎপা থাজবা লৈবনা মখোয়না য়াম্না ৱাবা ফীভম কয়া মাইয়োক্নবা ঙমখি। অদুদসু নত্তনা খুদোংচাদবশিং অদু মাইয়োক্নবা ঙম্নবা ঈশ্বরনা মখোয়দা “অথোইবা পাঙ্গল” পীবিখি।—২ কোরিন্থীয়া ৪:৭-৯.

অহানবা সতাব্দিদা লৈরম্বা খৃষ্টানশিংনা ঈশ্বরগী নিংথৌলৈবাক হান্না থিজদুনা যীশুগী য়াথং ইনখি। নিংথৌলৈবাক্কী নুংঙাইবা পাউ অদু মখোয়না লৈরিবা মফমশিংদুদা শীনবা থুংনা শন্দোক্লম্মী। (কোলোসীয়া ১:২৩) হায়রিবা থবকসি ঙসিদি কনানা তৌরিবগে?

থবক অসি ঙসি যেহোবাগী সাক্ষীশিংনা তৌরি। ঈশ্বরগী নিংথৌলৈবাক্না হৌজিক লৈরিবা তাইবংপানসিগী অরোয়বা পুরক্কদবা মতম য়াম্না নকখ্রে হায়বা মখোয়না খঙই। মরম অদুনা যীশুনা হায়রম্বা “নিংথৌ লৈবাক্কী অফবা ৱাপাউ অসি জাতি পূম্নমক্তা সাক্ষী ওইননবা তাইবংপান অপূম্বদা শন্দোক্কনি; অদুগা অরোইবা মতম অদু লাক্কনি” হায়বা ৱাফমসি মখোয়না ইল্লগা চৎনবা য়াম্না কন্না হোৎনৈ।—মাত্থি ২৪:১৪.

নুংঙাইবা পাউ অসি ফংলবা মতুংদা নহাক্না করি তৌগদগে? অহানবা সতাব্দিদা মেসিদোনিয়াগী বেরীয়া সহরদা লৈরম্বা মীশিংদুগী মতৌ তমজনবা অদোম্বু পুক্নীং থৌগৎচরি। পাখোনচৎপা পোলদগী নুংঙাইবা পাউদু তাবা মতমদা মখোয়না “য়াম্না খৌরাংনা লৌশিনখি।” মদুদগী মখোয়না তারিবা পাউদু চুমব্রা হায়না‘শাস্ত্রদা কূপ্না থিজিনখি।’ চুমলে হায়বা খঙলবা মতুংদা মখোয়না তম্লিবশিংদু ইঞ্জখি।—পাখোনচৎপশিংগী থবক ১৭:১১, ১২.

অদোমসু মখোয়গী মতৌ তমজবা য়াই। অহানবদা ঈশ্বরগী নিংথৌলৈবাক অমসুং মহাক্কী ধর্ম্মচেনবা থিজবনা হৌজিক হৌজিক খক্তা নত্তনা তুংদসু শান্তি লৈবা অমসুং তংদু লৈতাবা পুন্সি ফংগনি।