Ka la bilfu, d fãa na n maana kaset ne yell sẽn wõnd woto, a Zeezi sẽn bool tɩ ‘to-kãsenga.’ (Matiye 24:21) Zĩig ka be d sẽn tõe n zoe n kẽng n paam n põs to-kãsengã ye. La d tõe n maana bũmb n tõog n põs yellã sasa. Bõe la d tõe n maane?

A Zeezi sẽn wa n sõsd ne nebã tãngã zugã, a yeelame yaa: “Bɩ y rengd n baood Wẽnnaam Rĩungã ne b tɩrlmã wakat fãa.” (Matiye 6:33) Wãn to la d tõe n maan dẽ?

Reng n bao Wẽnnaam Rĩungã. Rat n yeelame tɩ yaa Wẽnnaam Rĩungã n tog n yɩ bũmb ning sẽn tar yõod n tɩ yɩɩd ne tõndã. (Matiye 6:25, 32, 33) Bõe yĩnga? Bala, ãdem-biisã pa tõe n welg b zu-loeesã b toor ye. Yaa Wẽnnaam Rĩungã bal n na n tõog n maan dẽ.

Reng n bao b tɩrlmã. D segd n modga ne d sũur fãa tɩ d sẽn vɩ to-to wã zemsd ne Wẽnnaam noyã sẽn yaa tɩrsã la a saglsã. Bõe yĩnga? Bala, d sã n yãkd sẽn yaa sõma ne sẽn yaa wẽngã d toore, na n waa ne zu-loeese. (Yel-bũnã 16:25) La d sã n tũud Wẽnnaam noyã la a saglsã, d na n nooga a sũuri. La pa rẽ bal ye. Na n nafa tõnd mengã.—Ezayi 48:17, 18.

Bɩ d rengd n baood Wẽnnaam Rĩungã ne a tɩrlmã wakat fãa. A Zeezi pĩnd n keoogame tɩ neb kẽer na n basame tɩ bũmb wʋsg tiis-ba, tɩ b wa tagsdẽ tɩ yaa b sẽn na n bao ligd wʋsg la b na n paam koglgo. Sãnda na n basame tɩ vɩɩmã yɩɩrã loog-ba, hal tɩ b pa le tar sẽk n baood Wẽnnaam Rĩungã ye.—Matiye 6:19-21, 25-32.

La a Zeezi pʋlmame tɩ neb nins sẽn na n teel Wẽnnaam Rĩungã na n paama bũmb nins sẽn yaa tɩlɛ wã masã mengã, la b na n wa paama bark buud toor-toor wakat sẽn kõn sa yĩnga.—Matiye 6:33.

Baa ne pipi kiris-nebã sẽn da rengd n baood Wẽnnaam Rĩungã ne a tɩrlmã, toogã la namsgã pa sa b wakatẽ wã ye. La b paama koglgo. Wãn to?

B ra tũuda Wẽnnaam noyã sẽn yaa tɩrsã. Yaa rẽ n sõng-b tɩ b põs zu-loees nins sẽn da namsd neb nins sẽn pa tũud Wẽnnaam goamã. B sẽn da tẽed ne b sũur fãa tɩ Wẽnnaam Rĩungã na n waame wã sõng-b lame tɩ b tõog n mao ne zu-loe-kɛgems menga. Wẽnnaam kõ-b-la “pãng ning sẽn yɩɩd ninsaal rẽndã.” Rẽ n so tɩ b tõog n mao ne b zu-loeesã.—2 Korẽnt rãmbã 4:7-9.

Pipi kiris-nebã sak n tũu noor ning a Zeezi sẽn kõ, n yeel tɩ b reng n bao Wẽnnaam Rĩungã. B moona Rĩungã koe-noogã dũniyã gill zugu. (Kolos rãmbã 1:23) Neb n be n maand woto me rũndã-rũndã bɩ?

N-ye! A Zeova Kaset rãmbã miime tɩ ka la bilfu, Wẽnnaam Rĩungã na n sãama dũni-wẽn-kãnga. Rẽ n so tɩ b maand b sẽn tõe fãa n na n tũ gomd a Zeezi sẽn yeele. A ra yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.”—Matiye 24:14.

Yãmb sã n wʋm koe-noogã, y manesem na n yɩɩ wãna? D kot-y lame tɩ y modg n dɩk pĩnd wẽndẽ Beere nebã togs-n-taare. Yaa tẽng sẽn da be Masedoan soolmẽ wã. Beere nebã sẽn wʋm Rĩungã koe-noogã tʋm-tʋmd a Poll sẽn taas-bã, “b reega goamã ne b sũy fãa.” Rẽ poore, b ‘maaga b yĩns n vaees Gʋls-sõamyã’ n dat n bãng gom-kãens sã n yaa sɩda, la b tũ b sẽn wʋmã.—Tʋʋma 17:11, 12.

Yãmb me tõe n maana woto. Y sã n rengd n baood Wẽnnaam Rĩungã ne a tɩrlmã, y na n paama koglg masã menga, la y wa paam laafɩ la bãan wakat sẽn kõn sa yĩnga.