Umhlaba esiphila kuwo uzahlaselwa “yisikhukhula” esingokomfanekiso ngoba uJesu wathi kuzakuba “lokuhlupheka okukhulu.” (UMathewu 24:21) Asingeke sikucatshele ukuhlupheka okukhulu nxa sekufikile kodwa kukhona esingakwenza ukuze sisinde. Kumele senzeni?

ENtshumayelweni yaseNtabeni, uJesu Khristu wasitshela okumele sikwenze. Wathi: “Qhubekani lifuna kuqala uMbuso [kaNkulunkulu] kanye lokulunga kwakhe.” (UMathewu 6:33) Sikwenza njani lokho?

Funa kuqala uMbuso kaNkulunkulu. Lokhu kutsho ukuthi kumele siqakathekise uMbuso kaNkulunkulu ukwedlula loba yini. (UMathewu 6:25, 32, 33) Yindaba kumele senze njalo? Ngoba abantu kabenelisi ukuqeda inhlupho zabo. NguMbuso kaNkulunkulu kuphela ozaqeda zonke inhlupho zabantu.

Funa ukulunga kwakhe. Kumele senze konke esikwenelisayo ukuze silalele imithetho kaNkulunkulu lakho konke asitshela khona. Kungani kumele senze njalo? Kungenxa yokuthi singakhetha ukuzenzela umathanda, sizazithela emanyaleni. (IZaga 16:25) Kodwa nxa singalandela okutshiwo nguNkulunkulu sizathokoza njalo sithokozise loNkulunkulu.—U-Isaya 48:17, 18.

Qhubeka ufuna kuqala uMbuso kaNkulunkulu lokulunga kwakhe. UJesu wathi abanye  bazaphanjaniswa yikucabanga ukuthi ukuba lemali enengi kuzabenza bavikeleke. Abanye bakhathazeka kakhulu ngezidingo zempilo baze baswele lesikhathi sokufuna uMbuso kaNkulunkulu.—UMathewu 6:19-21, 25-32.

Kodwa wathembisa ukuthi labo abasekela uMbuso kaNkulunkulu bazathola abakudingayo khathesi kanye lezibusiso ezingapheliyo ngesikhathi esizayo.—UMathewu 6:33.

Lanxa abafundi bakaJesu babefuna kuqala uMbuso kaNkulunkulu lokulunga kwakhe, abazange babone ubuhlungu lokuhlupheka kuqedwa. Kodwa babevikelekile. Njani?

Ukuphila ngendlela efunwa nguNkulunkulu kwabavikela ebunzimeni obabusehlela labo ababezenzela umathanda. Ukholo lwabo oluqinileyo lwabanceda ukuthi benelise ukubekezelela ubunzima bonke ababehlangana labo. UNkulunkulu wabanika “amandla amakhulu futhi angajayelekanga” ukuze baqinisele.—2 KwabaseKhorinte 4:7-9.

AmaKhristu okuqala awulalela umlayo kaJesu wokuthi afune kuqala uMbuso. Atshumayela izindaba ezinhle zoMbuso endaweni yonke ayehlala kuyo. (KwabaseKholose 1:23) Bakhona yini abatshumayela izindaba ezinhle zoMbuso lamuhla?

Ye bakhona! OFakazi bakaJehova bayakwazi ukuthi sekuseduze kakhulu ukuthi uMbuso kaNkulunkulu uqede umumo lo wezinto. Yikho bayawalalela sibili amazwi kaJesu athi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.”—UMathewu 24:14.

Uzakwenzani ngezindaba ezinhle? Siyakukhuthaza ukuthi ulingisele amaKhristu ayehlala edolobheni leBheriya eMakhedoniya. Ngemva kokuthi uPhawuli ebatshele izindaba ezinhle ezimayelana loMbuso, ‘babalesifiso esikhulu sokwemukela ilizwi.’ Bazimisela ‘ukuhlolisisa iMibhalo’ ukuze babone ukuthi ababekufundile kwakuliqiniso yini njalo abanengi babo baba ngamakholwa.—ImiSebenzi 17:11, 12.

Lawe ungenelisa ukwenza njengabo. Ungafuna kuqala uMbuso kaNkulunkulu lokulunga kwakhe, uzathokoza khathesi futhi ukholise ukuthula lokuvikeleka emhlabeni omutsha.