Moolikana, hiyo nihanle vakhaani ohoolela echeku etokotoko. Yesu aaloca eyo ntoko “wuukhuwa [naari yoohoosha; NN] otokotoko.” (Mateu 24:21) Hiyaano hiniwerya osepa yoohooxa yeeyo. Nyenya nnawerya weera echu wi niikhapelele. Echu taani yeeyo?

Mmwaha awe wa Vamwaakoni, Yesu aahivahererya miruku: “Hiihaa mpacerye waavya omwene wa Muluku ni wookololowa wawe.” (Mateu 6:33) Nni neereno hai?

Mpacerye Waavya Omwene wa Muluku. Eyo enataphulela wi nnaphwanela woonaka Omwene wa Muluku ntoko echu yoochuneyaxa opwaha echu eri yoothene. (Mateu 6:25, 32, 33) Ntakhara heeni nnaphwanelaahu woonaka hiiha? Nthowa nawi Omwene wa achu honawerya omaliha makacamiho a achu. Pahiru Omwene wa Muluku tonahaala owerya weerano yeeyo.

Mwaavye wookololowa wawe. Nnaphwanela opaka owetha wahu wi nikhale mwawiiwanana ni malamulo ni malakiheryo eekhaikhai a Muluku. Ntakhara heeni? Nthowa nawi wakhala wi nnalakelela mukhatiihu yeeyo eri yaphaama ni yoonanara, sookhumelela sene sinahaala okhala soonanara. (Masiposipo 16:25) Mmukhalelo mukina, wakhala wi ninnakhala mwawiiwanana ni malakiheryo a Muluku, tahi wi pahiru nnahaala omuhakalaliha yoowo, nyenya tho nnamukhalano mphurelo.—Isaiya 48:17, 18.

Mutitelele waavya omwene wa Muluku ni wookololowa waya. Yesu aalopola wi akina yaahaala okhala awaakanyeryeya, yuupuwelaka wi anahaala okhala ookhapeleleya moorweela wa okhalano ikhorowa sincipale. Akhweya akina anahala okhalaka awuukhuwa  ni ikumi saya ophiyerya wi ehinakhalano elukuluku ya waavya Omwene wa Muluku.—Mateu 6:19-21, 25-32.

Nyenya, Yesu aaroromeliha wi yaawo anahaala okhaviheryaka Omwene wa Muluku, soothowa saya sinahaala okhwaaniheryiwaka hiihaano, ni waakhela mareeliho oohakalaliha omwaahiyu.—Mateu 6:33.

Naamwi oohuserya a Yesu a nsana noopacerya yaakunhe woopaceryani Omwene wa Muluku ni ekhaikhai awe, wiicela ni makacamiho aya hiyaamanle mu elukuluku aya. Nyenya awo yaakhapeleliwa. Mwawiihai?

Awo yaakhala mwawiiwanana ni malakiheryo eekhaikhai a Muluku, nave eyo yaahaakhapelela wa makacamiho yaawo yaahooxa achu yahaachariha Malamulo a Muluku. Nroromelo naya noolipa wi Omwene wa Muluku waahaala orwa, naahaakhaviherya ovootha makacamiho oovila. Nave Muluku aahaavaha “owerya . . . woopwaha” wi ewerye ovilela.—2 Korinto 4:7-9.

Akristu a nsana noopacerya yaachariha nlamulo na Yesu na okuha woopaceryani Omwene. Awo yaalaleerya michaka saphaama sa Omwene makupa a elapo aya. (Kolosi 1:23) Apwanne aakhala aneerano yeeyo mmahiku ahu?

Aai! Anamoona a Yehova annasuwela wi elukuluku enahalela wi Muluku amalihe mukhalelo yoola wa ichu ti yavakhaani. Mwawiihiiha awo anneera yeeyo anaweryaaya wi ekhale mwawiiwanana ni masu a Yesu: “Michaka yeela ya omwene enamulaleiwa mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.”—Mateu 24:14.

Munahaala waakhulela hai michaka saphaama? Ninnooceenyeryaani waatakiherya Akristu a nsana noopacerya o Maketoniya muceche wo Pereya. Vaavaa yiiwalaaya michaka saphaama ni murummwa Paulo, awo yaaheemererya michaka sawe “ni okhwela.” Mwawiihiiha awo ‘yaaniichalela soorempwa’ wi yoone chiri ichu saari sawihiihaa nave yaaneera mwawiiwanana ni yeeyo yaahuseryaaya.—Saweriwa T’arummwa 17:11, 12.

Munanwerya okhala ntoko yaawo. Moorweela wa waavya voopacerya Omwene wa Muluku ni wookololowa waya, nyuwaano munahaala ophwanya nipuro noochawelavo ni nookhapeleleya hiihaano nave opuha murecele ni okhapeleleya woohimala omwaahiyu.