Aman totech uajnonisiuijtiuj se “ajakakiyaujtli” tlen Jesús okitokayoti ken temojti tlajyouilistli (Mateo 24:21). Maski yejkos yejon ajakakiyaujtli, kema uelis tiaskej kampa xitlaj topan nochiuas. ¿Tlenon noneki tikchiuaskej?

Jesús okijto ika noneki tikchiuaskej yejuin: “Xtejtemojtiakan, tej, kachtopa iTekiuajyo toTajtsin niman imelajkayo” (Mateo 6:33, TNM). ¿Tlenon kijtosneki yejuin?

“Xtejtemojtiakan, tej, kachtopa iTekiuajyo toTajtsin”. Yejuin teasikamachiltia ika iTekiuajyo toTajtsin melak ueyi kijtosneki xijkon ken okseki tlemach (Mateo 6:25, 32; Mateo 6:33, TNM). ¿Tleka noneki ijkon tiknemiliskej? Pampa tejuamej xueli tikyektlaliaj tlen xkuajli panoua ipan tlaltikpaktli, san toTajtsin uelis kichiuas.

Xtejtemojtiakan “imelajkayo” toTajtsin. Yejon kijtosneki ika noneki tokojtiliskej tikintlakamatiskej itlanauatiluan toTajtsin. ¿Tleka? Pampa tla san tejuamej tikijtoua tlenon kuajli niman tlenon xkuajli, melak xkuajli tonkisaskej (Proverbios 16:25). San ika, tla tiktlakamatij Jehová, tikyolpaktiskej niman, noijki, kuajli tonkisaskej (Isaías 48:17, 18).

“Xtejtemojtiakan, tej, kachtopa iTekiuajyo toTajtsin niman imelajkayo”. ¿Tleka ijkon okijto Jesús? Pampa okijto ika sekimej xyejon tlen kachtopa kitejtemojtoskiaj niman kinemiliskej ika tla notomintiaj kuajli nemiskej. Noijki okijto ika sekimej xkitejtemoskiaj  iTekiuajyo toTajtsin pampa san kinemilijtoskiaj kenon notekipanoskej (Mateo 6:19-21, 25-32).

San ika, Jesús okijto ika akin kipaleuiskej iTekiuajyo toTajtsin xtlaj kinpolos niman melak kinteochiuaskiaj ika tlayekapan (Mateo 6:33, TNM).

Maski inomachtijkauan Jesús kachtopa okitejtemojkej iTekiuajyo toTajtsin niman imelajkayo, xokitakej tla opopoliuj tlen tetlajyouiltia. San ika, okinextijkej tlen okinpaleui. ¿Tlenon okinpaleui?

Pampa okitlakamatkej Jehová xotlajyouijkej ken otlajyouijkej akin xkitekichiuiliayaj Jehová. Yejuamej melak tlaneltokayaj itech iTekiuajyo toTajtsin niman yejon okinpaleui makixnamikikan tlen ouijtika. Niman toTajtsin okinmakak “on ueyi poder” tlen itech ualeua niman ijkon ouel otlaxikojkej (2 Corintios 4:7-9).

Akin kichiuayaj ken Cristo ipan kachtopa siglo okitejtemojkej iTekiuajyo toTajtsin ijkon ken otlanauati Jesús. Okiteijlikej tlen kualtsin kichiuaskiaj iTekiuajyo toTajtsin (Colosenses 1:23). ¿Yakaj nemi akin ijkon kichiua?

¡Kema! Iteixpantijkauan Jehová kimatstokej ika sa achijtsin poliui ika iTekiuajyo toTajtsin kipopolos tlen xkuajli. Ika yejon, nokojtiliaj kichiuaskej tlen Jesús okijto: “Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli” (Mateo 24:14, TNM).

¿Tlenon tikchiuas ijkuak tijkakis yejon kualtsin tlajtojli? Timitsyolchikauaj xchiua ken okichiujkej ipan kachtopa siglo akin chantiyaj Berea. Ijkuak Pablo okimijli itech iTekiuajyo toTajtsin, ika nochi “inyojlo okiselijkej on temachtijli, niman mojmostla kitejtemouayaj ipan on Yektlajkuilojli” pampa kinekiyaj kimatiskej tla yemelak tlen okimijlikaj niman okichiujkej ijkon ken onomachtijkej (Hechos 17:11, 12).

Tejua noijki ijkon uelis tikchiuas. Tla kachtopa tiktejtemoua iTekiuajyo toTajtsin niman imelajkayo, tiknextis tlen mitspaleuis aman niman ika tlayekapan nochipa tinemis ika moyojlo.