Sewo tasala patontho ngako kukumana na “chimphepo” chamene chuwononga. Yesu elaŵila kuti kuzaŵe “chisauso chikulu” Ufumu ukaliye wela. (Mateyu 24:21) Sikuti tingangothaŵa tyala “chisauso chikulu”, koma tingachite vinthu viyakine kuti tiliteteze. Tingachite tyani?

Pa ulaliki wapa lupili, Yesu enena kuti: “Tetyo pitilijani kusakila-sakila ufumu poyamba na chilungamo cha Mulungu.” (Mateyu 6:33) Kansi tingachite tyani vamene ivi?

Sakilani Ufumu poyamba. Ivi vutanthauza kuti tufunikila kuona kuti Ufumu wa Mulungu ni wofunika ngako kupambana chinthu chilichonse. (Mateyu 6:25, 32, 33) Kansi ndaŵa yanji tufunikila kuona teti? Chifukwa chakuti ŵanthu angakwanishe lini kusilija mavuto onse ŵatukumana nawo. Ni Ufumu wa Mulungu weka wamene ungakwanishe ntchito yovuta yamene iyi.

Sakilani chilungamo cha Mulungu. Chitani khama kuti mukonkhala mokatijana na mfundo zolungama za Mulungu. Chifukwa n’chinji? Chifukwa keno mwasalula mweka vochita viweme olo viipa, vokonkhapo vake vunkhala viipa. (Miyambo 16:25) Komalomba, keno tunkhala mokatijana na mfundo za Mulungu, tunkhalalini tukondwelesa Mulungu yeka yayi, koma sewo nase tupindula soti.​—Yesaya 48:17, 18.

Pitilijani kusakila-sakila Ufumu wa Mulungu poyamba na chilungamo chake. Yesu echenjeja kuti ayakine angasokonezeke, poganizila kuti angafwane chitetezo ponkhala na ndalama zinyinji.  Ayakine angalole kuti nkhaŵa za pa moyo ziŵakangishe kufwana nthawe yosakila-sakila Ufumu wa Mulungu.​—Mateyu 6:19-21, 25-32.

Komalomba, Yesu elonjeza kuti ŵanthu onse onkhala ku mbali ya Ufumu wa Mulungu ofwana vinthu vofunika palipano komasoti azalondele madaliso osasila kusogolo.​—Mateyu 6:33.

Ophunzila a Yesu esakila-sakila Ufumu wa Mulungu na chilungamo. Koma ove aliyewone kusila kwa mavuto ŵenzekumana nawo pa moyo wawo. Olo n’tetyo, ove efwana chitetezo. Motyani?

Ove enzenkhala mokonkheja malamulo olungama a Mulungu, ndipo ivi viŵateteza ku mavuto ŵenzekumana nawo ŵanthu ŵala enzemvwila lini Mulungu. Chikhulupililo chawo chotang’a chakuti Ufumu uzawele chiŵayavya kupilila mavuto ŵenzekumana nawo pa moyo wawo. Komasoti Mulungu eŵapasa mphamvu yopambana yechivyalika nayo.​—2 Akorinto 4:7-9.

Akhilisitu a vyaka va m’ma 100 voyambilila emvwila lamulo ya Yesu yakuti akosakila-sakila Ufumu poyamba. Ove elalikila za Ufumu pachalo chonse. (Akolose 1:23) Kansi alipo ochita vamene ivi masiku ŵano?

Inde! A Mboni za Yehova azindikila kuti nthawe yakuti Ufumu wa Mulungu uwononge ichi chalo chiipa yasala patontho kufwika. Tetyo ochita chilichonse changakwanishe kuti akokonkheja lamulo ya Yesu yakuti: “Uthenga uweme uyu wa Ufumu uzalalikiliwe pachalo chonse kuli ŵanthu, kuti unkhale umboni ku mitundu yonse, pamene apo mapeto azafwike.”​—Mateyu 24:14.

Kansi mwewo muulondele tyani uthenga uweme? Tukusengani mwewo kuchita mwechichitila ŵanthu am’tauni ya kale ya Bereya ku Makedoniya. Paulo pechiŵalalikila za uthenga uweme wa Ufumu, ove eulondela “mofunishisha”. Pavuli pake ‘eyamba kuphunzila mosamala ngako Malemba’ kuti asimikijile kuti vechiphunzila venze vachendi “pavuli pake enkhala okhulupilila”.​—Machitidwe 17:11, 12.

Mwewo namwe mungachite soti chimozi-mozi. Keno mwewo mungasakile-sakile Ufumu na chilungamo cha Mulungu, mufwane “malo otetezeka”palipano komasoti muzankhale na ntendele ngawo-ngawo kusogolo.