Atuho tuatungila mondyila “yombila” ngo oyo. Sesusi weiluka okuti “ononkhumbi ononene.” (Mateusi 24:21) Namphila tuli apa mapaloko ombila, mahi tupondola okuholama. Ñgeni ngotyo?

Melongomona Sesusi alingilile komphunda, wapopile okuti: “Tualeiko okuovola tete Ouhamba nouviuki wa Huku.” (Mateusi 6:33) Oñgeni matutyilingi?

Ovola tete Ouhamba wa Huku. Otyo tyilekesa okuti Ouhamba wa Huku una okukala pomphangu yo tete momuenyo wetu. (Mateusi 6:25, 32, 33) Omokonda yatyi? Mokonda Ouhamba wa Huku, oo vala utyivila okumanako ovitateka viovanthu. Ovanyingi vahetekelele-ale okutyilinga, nii vala avehetyivili.

Ovola ouviuki wa Huku. Linga ononkhono mbokuendela movitumino vya Huku. Mokonda inkha ulinga vala etyi uhanda, mokala novitateka. (Provérbios 16:25) Inkha wendela movitumino vyo Mbimbiliya, kumahambukiswa vala Huku, mahi tupu mokala nomuenyo ukahi nawa. — Isaías 48:17, 18.

Tualako okuovola tete Ouhamba nouviuki wa Huku. Sesusi wapopile okuti ovanthu vamwe mavatalukwa. Otyo otyili umwe! Vamwe vasoka okuti omalumono maeveetela epamo liotyotyili. Ovakuavo vetupu omuvo wokuovola  Ouhamba wa Huku mokonda yomasuka-suka omuenyo, ngetyi okutekula ombunga. — Mateusi 6:19-21, 25-32.

Mahi Sesusi wapopia okuti vana vahula Kouhamba wa Huku, mavapewa etyi vesukisa opo velitekule pahetyino, novipuka ovinyingi oviwa komutwe wandyila. — Mateusi 6:33.

Ovalongwa va Sesusi ankho vaovola tete Ouhamba nouviuki wa Huku. No ngotyo ankho veli mouye mueyula ovitateka nononkhumbi. Mahi ankho vekahi ngatyina vaholama momphangu yapama. Ñgeni ngotyo?

Ankho vena omuenyo ukahi nawa mokonda vetavela ovitumino vya Huku. Ankho vetupu ovitateka ovanthu valinga ovivi vena. Ankho vena onthumbi yokuti Ouhamba wa Huku mauya. Onthumbi oyo, yevekuatesileko okukoleleya movitateka. Tyihe-otyo vala, Huku ankho uveavela “epondolo liavilapo” opo livekuateseko okulambela movitateka. — 2 Ova Kolindu 4:7-9.

Ovalanduli va Sesusi vetavelele etyi evetuma okuovola tete Ouhamba nouviuki wa Huku. Mongeleka, vaivisile onondaka onongwa kovanthu aveho. (Ova Kolosu 1:23) Iya hono? Okuti onondaka onongwa Mbouhamba mbukahi nokuiviswa umwe?

Yoo! Onombangi mba Siovaa vetyii okuti tukahi konthyulilo youye uno. Vetyii okuti apa katutu Ouhamba wa Huku mauya okuhanyako ouye uno. Otyo valingila ononkhono mbokulinga ngetyi Sesusi apopile okuti: “Onondaka ombu onongwa Mbouhamba wa Huku, mambukaiviswa kombanda yohi aiho, okuava oumbangi kovanthu vomalongo aeho iya konyima onthyulilo aiya.” — Mateusi 24:14.

Okuti motavela onondaka onongwa? Tukuavela ondundo opo ulinge ngetyi tyalingile ovanthu vamwe ankho vakala mepunda-umbo limwe litiwa o Beleia. Etyi apositolu Paulu evepopila onondaka onongwa Mbouhamba wa Huku, avetavela “nomutima auho.” Konyima, ‘avaovolola nawa Movihonekwa, opo vatale inkha ovipuka Paulu apopia oviotyotyili’ umwe. Okulinga ngotyo, tyevelundile okukala Ovakilisitau. — Ovilinga 17:11, 12.

No ove upondola okulinga ngavo. Inkha wovola tete Ouhamba nouviuki wa Huku, mokala nomuenyo ukahi nawa pahetyino. Tupu mokakala nehambu komutwe wandyila.