Wɔ adenle bie azo, yɛ muala yɛde mekɛ mɔɔ ɔnrɛhyɛ “ahumu kpole” bie badu, mɔɔ Gyisɛse hanle nwolɛ edwɛkɛ kɛ “anwongyelelɛ kpole” la anu. (Mateyu 24:21) Yɛnrɛhola yɛnrɛnriandi anwongyelelɛ kpole zɔhane. Noko yɛbahola yɛayɛ debie mɔɔ bamaa yɛanyia banebɔlɛ a. Duzu a yɛbahola yɛayɛ a?

Wɔ Gyisɛse Kelaese Boka Zo Ɛdendɛlɛ ne anu, ɔvale adehilelɛ ɛhye ɔmaanle: ‘Yemɔti, bɛhɔ zo bɛlimoa bɛkpondɛ Nyamenle Belemgbunlililɛ ne nee ye tenleneyɛlɛ ne.’ (Mateyu 6:33) Kɛzi yɛbayɛ zɔ ɛ?

Bɛlimoa bɛkpondɛ Nyamenle Belemgbunlililɛ ne. Ɛhye kile kɛ ɔwɔ kɛ yɛnwu Nyamenle Belemgbunlililɛ ne kɛ nwolɛ hyia tɛla debie biala. (Mateyu 6:25, 32, 33) Duzu ati ɔ? Ɔluakɛ alesama ɛnrɛhola ɛnrɛli yɛ ngyegyelɛ nwo gyima. Nyamenle Belemgbunlililɛ ne ala a bahola ayɛ gyima ɛsesebɛ ɛhye a.

Bɛkpondɛ ye tenleneyɛlɛ ne. Ɔwɔ kɛ yɛbɔ mɔdenle kɛ yɛbava Nyamenle tenlene mɛla ne yɛɛ ye ngyinlazo ne mɔ yɛabɔ yɛ ɛbɛla. Duzu ati ɔ? Ɔluakɛ saa yɛdayɛ mumua ne yɛsi mɔɔ le kpalɛ nee ɛtane la anwo kpɔkɛ a, mɔɔ bavi nu ara la bayɛ esiane. (Mrɛlɛbulɛ 16:25) Wɔ adenle fofolɛ zo, saa yɛfa Nyamenle tenlene ngyinlazo ne mɔ yɛbɔ yɛ ɛbɛla a, yɛbamaa Nyamenle anye alie na yɛdayɛ noko yɛ ɛbɛlabɔlɛ bayɛ kpalɛ.​—Ayezaya 48:17, 18.

Bɛhɔ zo bɛlimoa bɛkpondɛ Nyamenle Belemgbunlililɛ ne nee ye tenleneyɛlɛ ne. Gyisɛse bɔle kɔkɔ kɛ bie mɔ adwenle bahola ayɛ bɛ  kesee na bɛazuzu kɛ saa bɛkpondɛ ezukoa dɔɔnwo a bɛbanyia banebɔlɛ. Bie mɔ noko bahola amaa ɛbɛlabɔlɛ nu adwenleadwenle avo bɛ nwo zo mɔɔ bɛnrɛnyia mekɛ bɛnrɛmaa Nyamenle Belemgbunlililɛ ne a.​—Mateyu 6:19-21, 25-32.

Noko, Gyisɛse ɛbɔ ɛwɔkɛ kɛ menli mɔɔ bagyinla Nyamenle Belemgbunlililɛ ne anzi la asa baha ninyɛne mɔɔ bɛhyia nwo ɛnɛ la na banyia kenle bie nyilalɛ dɔɔnwo mɔɔ Belemgbunlililɛ ne bava ara la.​—Mateyu 6:33.

Gyisɛse ɛdoavolɛ ne mɔ limoale kpondɛle Nyamenle Belemgbunlililɛ ne nee ye tenleneyɛlɛ ne ɛdeɛ, noko bɛannwu nyane yɛɛ amaneɛnwunlɛ kɔsɔɔti awieleɛ wɔ bɛ mekɛ zo. Noko bɛnyianle banebɔlɛ. Adenle boni azo?

Nyamenle tenlene ngyinlazo ne mɔɔ bɛvale bɛbɔle bɛ ɛbɛla wɔ ewiade ye mɔɔ bɛkpo Nyamenle adehilelɛ anu la bɔle bɛ nwo bane. Anyelazo kpundii mɔɔ ɛnee bɛlɛ ye wɔ Belemgbunlililɛ ne anu la boale bɛ wɔ mekɛ bɔbɔ mɔɔ ɛnee bɛlɛyia ngyegyelɛ mɔɔ tɛla biala la. Yɛɛ Nyamenle maanle bɛ “tumi bedevinli ne” amaa bɛahola bɛagyinla ngyegyelɛ mɔɔ bɛyiale la anloa.​—2 Kɔlentema 4:7-9.

Ɛvoya mɔɔ limoa Kilisienema ne vale mɛla mɔɔ Gyisɛse vale maanle kɛ bɛlimoa bɛkpondɛ Belemgbunlililɛ ne la yɛle gyima. Bɛbɔle edwɛkpa ne nolo wɔ bɛ mekɛ zo. (Kɔlɔsaema 1:23) Asoo awie mɔ ɛlɛyɛ zɔ ɛnɛ ɔ?

Ɛhɛe! Gyihova Alasevolɛ ɛnwu ye kɛ yeha mekɛ ekyi bie na Nyamenle Belemgbunlililɛ ne arazɛkye ewiade ɛhye. Ɔti bɛbɔ mɔdenle bɛfa Gyisɛse edwɛkɛ ne bɛyɛ gyima: “Na bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”​—Mateyu 24:14.

Duzu a ɛbayɛ ye wɔ edwɛkpa ne anwo a? Yɛmaa wɔ anwosesebɛ kɛ sukoa menli mɔɔ ɛnee bɛwɔ Masidonea suakpole Bɛlia azo la neazo ne. Mɔɔ bɛdele Belemgbunlililɛ ne anwo edwɛkpa ne bɛvile ɛzoanvolɛ Pɔɔlo ɛkɛ la, “bɛvale bɛ adwenle amuala bɛliele.” Akee ‘bɛnleɛnleanle Ngɛlɛlera ne anu kpalɛ’ bɛnleanle kɛ mɔɔ bɛde la le nɔhalɛ a, na bɛvale bɛyɛle gyima.​—Gyima ne 17:11, 12.

Ɛbahola wɔayɛ zɔhane ala. Saa ɛdimoa ɛkpondɛ Nyamenle Belemgbunlililɛ ne nee ye tenleneyɛlɛ ne a, ɛbanyia banebɔlɛ nee anzodwolɛ ɛnɛ nee kenle bie.