Mipadpara, amin tayo et manbibilay ed panaon ya walay onsabin makmaksil ya “bagyo,” ya deniskribe nen Jesus bilang say “baleg a kairapan.” (Mateo 24:21) Agtayo napaliisan itan ya kairapan. Balet, walay nagawaan tayo pian naprotektaan itayo. Anto itan?

Diad Sermon ed Palandey, oniay imbilin nen Jesu-Kristo: “Itultuloy yo sirin ya anapen nin unona so Panarian [na Dios] tan say inkatunong To.” (Mateo 6:33) Panon tayon nagawaan itan?

Anapen nin unona so Panarian na Dios. Labay ya ibaga na satan ya nepeg tayon ipasen ya mas importante so Panarian na Dios nen say antokaman a bengatla. (Mateo 6:25, 32, 33) Akin et nepeg ya ontan so panmoria tayo? Lapud agsarag na totoo ya solusyonan iray problema tayo. Say Panarian na Dios labat so makaresolbe ed saratan.

Anapen so inkatunong to. Gawaen tayo so anggaay nayarian tayo ya unoren iray matunong ya ganggan tan prinsipyo na Dios. Akin ey? Ta no ibaliwala tayo iratan tan sikatayoy mandesisyon no antoy duga tan aliwa, makapuy so pansumpalan tayo. (Proverbio 16:25) Balet, no unoren tayo iray estandarte na Dios, napaliket tayo so Dios tan mas maliket so bilay tayo.​—Isaias 48:17, 18.

Itultuloy ya anapen nin unona so Panarian na Dios tan say inkatunong to. Imbaga nen Jesus ya nabalang so pokus na arum tan isipen da ya onligen so bilay da no mas dakel so naalmo dan kuarta. Wala met so arum ya  akapokus ya maong ed saray kapagaan da ed bilay ya anggad anggapo lay panaon da ya anapen so Panarian na Dios.​—Mateo 6:19-21, 25-32.

Balet, impromisa nen Jesus ya saramay onsusuporta ed Panarian na Dios et nitarya iray pankaukolan da natan tan dakdakel ya bendisyon so manaalagar ed sikara diad arapen.​—Mateo 6:33.

Anggaman saray disipulo nen Jesus nen unonan siglo et inyuna day pananap ed Panarian na Dios, agda la anengneng ya naandi so amin ya sakit tan paniirap. Balet aprotektaan ira. Panon?

Lapud inunor da iray matunong ya estandarte na Dios, aprotektaan ira ed saray irap ya naeksperiensya na saramay angibaliwala ed imbaga na Dios. Say mabiskeg ya pananisia ra ed isabi na Panarian so tinmulong pian nasungdoan da anggan saray sankairapan ya problema ed bilay. Tan inikdan ira na Dios na ‘pakayari a mas mabiskeg nen say pakayari na too’ pian nasarag da iratan.​—2 Corinto 4:7-9.

Inunor na saray Kristiano nen unonan siglo so ganggan nen Jesus ya anapen nin unona so Panarian. Impulong day maong a balita na Panarian ed amin ya totoo ed lugar ya kawalaan da. (Colosas 1:23) Wala met kasi manggagawa na ontan natan?

On! Amta na Saray Tasi nen Jehova ya antiktikey lay nakekeraan ya panaon antis ya panganggaen na Dios iyan kaplesan a sistema na mundo. Kanian gagawaen da so anggaay nayarian da pian unoren iyan ganggan nen Jesus: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”​—Mateo 24:14.

Antoy gawaen mo ed naamtaan mon maong a balita? Mas maabig no aligen mo ray totoon tagad syudad na Berea diad Macedonia nen unonan siglo. Nen nadngel da ed si apostol Pablo so maong a balita nipaakar ed Panarian, “akaparaan a maong so nonot dan angawat” ed mensahe to. Insan ‘maalwar dan inusisa so Kasulatan’ pian naseguro ya saray nadngel da et talagan walad Salita na Dios, tan inyaplika da iray naaralan da.​—Gawa 17:11, 12.

Sarag mo met ya gawaen itan. No anapen mo nin unona so Panarian na Dios tan say inkatunong to, naprotektaan ka natan tan diad arapen et nawalaan kay andi-anggaan ya kareenan tan kaligenan.