Ngdi osisiu, kid el rokui a di kmedu el mo chormii a mesisiich el “eolt” el Jesus a milsaod er ngii el “kloul ringel.” (Mateus 24:21, BT) Ngkmal diak lsebeched el chemiis er ngii. Engdi ngar ngii a sebeched el rullii me bo demukerreu. Tiang ngerang?

Ngar sel Cheldecheduch el Ngar er a Rois, e a Jesus Kristus a dilu el kmo: “Momuchel losiik ra rengedel a Dios ma llemeltel.” (Mateus 6:33, BT) Ngmekera doruul er tiang?

Mosiik er a Rengedel a Dios el kot. Tia belkul a kmo ngkired el nguu a Rengedel a Dios el mo ngaruchei er a ngii di el tekoi. (Mateus 6:25, 32, 33) E ngera uchul? E le rechad a kmal diak lsebechir el sumechokl a mondai er a klechad. Ngdi ta el Rengedel a Dios a sebechel.

Mosiik er a llemeltel. Ngkired el mora tkurrebab el sebeched el kiei loltirakl a melemalt el llechul a Dios me a omellach er Ngii. E ngera uchul? E le lsekum ngdi kid el melilt el kmo ngera ungil me a ngera mekngit, e ngdi mo uchul a chelebuled. (Osisechakl 16:25) Engdi a lsekum kede kiei loltirakl a llechul a Dios, e ngdiak di bo dodeuir a rengul, e ngdirrek el mo uchul a klungioled.​—Isaia 48:17, 18.

Molemolem losiik er a Rengedel a Dios me a llemeltel el kot. A Jesus a ulemeklatk el kmo a rebebil a locha mo mechesang e le te omdasu el  kmo a bo lebetok a ududir e ngmo omekerreu er tir. E a rekuk bebil a locha di mo suebek a rengrir er a mondai er tir me ngmo diak a temir losiik er a Rengedel a Dios.​—Mateus 6:19-21, 25-32.

Me nguaisei, engdi a Jesus tilbir el kmo tirke el olengeseu er a Rengedel a Dios a mo ngmai aike el lousbech er chelechang, e mo dmeu a rengrir er a diak a ulebengelel el klengeltengat el lebo lolai er a ngar mederir.​—Mateus 6:33.

A redisaiplo er a Jesus er a irechar a dirrek el ngiluu a Rengedel a Dios me a llemeltel el mo kot, engdi ngdimlak bo lesa ulebengelel a ringel me a ongarm. Me nguaisei, engdi te mle ulekerreu. Lokiu a ngera el rolel?

Te kiliei loltirakl a melemalt el llechul a Dios, e tiang a ulemekerreu er tir er aike el ringel el lechilarm tirke el dimlak loltirakl a tekingel a Dios. Tir el uluumerang el kmo a Renged a mei a ngilsuterir el outekangel a kmal meringel mondai. E a Dios a milsterir “a klou el klisiich” me ngmlo sebechir loutekangel.​—2 Korinth 4:7-9.

A Rekristiano er a irechar a ullengesenges a tekingel a Jesus e ulsiik er a Renged el kot. Te ulemerk er a ungil chais er a Renged el mora ike el beluu el ble lodengei er sel taem. (Kolose 1:23) Me te ngar ngii a remeruul uaisei er chelechang?

Ochoi! A Resioning er a Jehovah a medengei el kmo ngkmal di kmedung e a Rengedel a Dios a mo okngemedii tia el mekngit el blekeradel. Me te mora tkurrebab el sebechir el kiei loltirakl a tekingel a Jesus el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.”​—Mateus 24:14.

Nguangera uldesuem el kirel tia el ungil chais? Aki olengit me bo moukerebai er a Rekristiano er a irechar er a Beroea el mats er a Masedonia. Sera lerengesii a ungil chais el kirel a Renged el lulemerk er ngii a Paulus, e te kilengei er ngii el klumech e “mle blak a rengrir el orrenges a osisechakl.” E milsuub e “merriter” ngii el “Chedaol Llechukl” me bo lodengei el kmo aika el tekoi ngklemerang me a lechub e ngdiak, e sola e mlo oltaut aike lulsuub.​—Rellir 17:11, 12.

Ngdirrek el sebechem el meruul uaisei. Sel mosiik er a Rengedel a Dios me a llemeltel el kot, e ke mo metik a ulekerreu er chelechang, e mo dmeu a rengum er a diak a ulebengelel budech me a ulekerreu er a ngar medam.