Maawẽn yũu avalanchate thakhwee ewmesa paꞌjana, Bibliayu “seena nxus eente” yase (Mateo 24:21, TNM). Txãjiiçxa Dxus yuwe weꞌwnĩsaꞌsyu nwẽseꞌjwaꞌj jiꞌphnetkhaꞌw, txaꞌwẽy salvacionaꞌs pakwen. ¿Salvaywẽeçxa kĩh yũuwaꞌj jiꞌphkxthaꞌw?

Jesús kaapiyaꞌjk salvaywẽete Dxus Gobiernos khwẽꞌy pakwewaꞌj jiꞌphnetkhaꞌw, saꞌ txaꞌwẽy Dxus justicias (Mateo 6:33). Nawa, yaꞌjxpaapẽy, ¿Jesús kĩh kikh ptaꞌsx?

Dxus Gobiernos pakwewaꞌj jiꞌphnetkhaꞌw. Jesús weꞌwnĩsayu kaapiyaꞌjak Dxus Gobierno kweꞌsxjĩi thakwee wala jxthuhthesana (Mateo 6:25, 32, 33). ¿Kweꞌsxjĩi kĩh yũuçxa wala jxthuhthesakx txãa Dxus Gobiernos? Dxus Gobierno yũuçxa naa kiwete thẽysas phewuꞌjya ãjaꞌna, kweꞌsxyu ãjaꞌmeenaꞌw.

Dxus justicias pakwewaꞌj jiꞌphnetkhaꞌw. Dxus yuwete jxkaahnĩsas nwẽseꞌjwaꞌj jiꞌphnetkhaꞌw. Ãçxh jiithaꞌw Dxusaꞌs nwẽseꞌjmeete pxthaa yũunĩsa paꞌjana (Proverbios 16:25). Dxus yuwe jxkaahnĩs nwẽseꞌjçxa wala ew fxiꞌzenaꞌw, Dxus weçx weçxa ũssuna (Isaías 48:17, 18).

 Jesús yuꞌkxpehene khwẽꞌy Dxus Gobiernos pakwekhan saꞌ justicias, ¿kĩh yũuçxa? Jesús jiineyu nasaweꞌsx nyaafxte vxuçxas thakwee pakweçxa Dxusaꞌs pakwewaꞌjyu een jiꞌphuçmeenetayu. Nasa txãwsayu salvacionaꞌs pakweçmeeneta (Mateo 6:19-21, 25-32).

Jesús kaapiyaꞌjne nasa Dxus yakh mjĩisayu ãçxh peejxnĩs jiꞌphuyã, saꞌ txaꞌwẽy paraisoteyu wejx thakwee bedesĩyna (Mateo 6:33).

Jesús discipulostxis Dxus yakh mjĩisatxis, ¿Dxusa maꞌw kikh puꞌçxh?

Dxus nweꞌwne Jesús discipulosweꞌsxtxis nwẽseꞌj paꞌka. Discipulosweꞌsxa kĩh yuhwa ũukhmeeneta thẽysa paꞌjatewaꞌj fe jiꞌphu paꞌka. Txãajiiçxane Dxus pees çxhãçxhasa wantaywaꞌj (2 Korintios 4:7-9).

Jesús discípulos nyaafxte pakweneta Dxus Gobiernos. Txãaweꞌsx Dxus yuwes naa kiwete jxukaneta ptaꞌsx (Kolosenses 1:23). Ãçxh eente, ¿kimweꞌsx ptaꞌsx ũstxki Dxus yuwes jxuka naa kiwete?

Jeuwa kaajiyuꞌjsaweꞌsxçxa naa kiwete jxuka Dxus yuwes ptaꞌsxna ũsyã. Txãaweꞌsx yũuçxa jiiyã Dxus Gobierno paꞌjwaꞌj txaçxhmee pejxtewaꞌj. Txãasayçxa wala çxhãçxha mjĩin ũsyã nasaweꞌsxtxis ptaꞌsxna nmeh een paꞌjmeeyna salvaĩyã ãjaꞌkhan (Mateo 24:14).

¿Idxa kĩh yũuguig maꞌwẽni Jeuwa kaajiyuꞌjsaweꞌsx Dxus yuwes ptaꞌsxte? Wẽseꞌjwe Dxus yuwes ptaꞌsxsaꞌs. Bereate discipulosweꞌsxa wala ew piyaneta saꞌ kxtey yũuneta txãaweꞌsx piyanitxis (Hechos 17:11, 12).

Idxwa txaꞌwẽy yũuyã ãjaꞌnega txãaweꞌsx naꞌwẽy. Idxa Dxus Gobiernos vxiteꞌ Dxus justicias khwẽꞌy pakweçxa weçx weçxa fxiꞌzewaꞌj uyuunega, saꞌ esyu bakaçxtewaꞌj paraisote fxiꞌzeya ãjaꞌnega.