Diosnintsikpa Gobiernunchö kawanapaqqa, ¿imatataq ruranantsik?
“¡SALVAKUYÄNËKIPAQ MARKËKIKUNAPITA YARQUYË!”. Shukukuy o wayrantin tamyam shamuykan nir willayäshuptikiqa, jinan hörachi yarqur ëwakunkiman y mëchö salvakunëkipaq kaqtachi ashinkiman.
Jesusmi nirqan shukukuy o wayrantin tamyapitapis mas mantsanëpaq “jatun sufrimientu” kanampaq kaqta (Mateu 24:21). Kë jatun sufrimientupitaqa manam pipis qeshpita puëdinqatsu, peru salvakuytaqa puëdintsikmi, ¿imataraq rurashwan?
“Diospa Gobiernunta y pëpa rikëninchö alli kaq rurëkunata puntata ashir sïguiyë” nirmi Jesusqa yachatsimarqantsik (Mateu 6:33). ¿Ima nitataq Jesusqa munëkarqan?
‘Diospa Gobiernunta puntata ashiyë’. Imëkapitapis mas puntataqa Diospa Gobiernuntam ashinantsik (Mateu 6:25, 32, 33). Musyanqantsiknöpis nunaqa manam problëmakunata altsëta puëdishqatsu, peru Diosnintsikqa llapantam altsamunqa.
“Diospa [...] rikëninchö alli kaq rurëkunata” ashiyë. Diosnintsik yachatsimanqantsikta y llapan mandamanqantsiktam ruranantsik. Yarpäshun, imatapis munanqantsikmannö rurashqaqa manam allitsu yarqunqa y mana allichömi ushashun (Proverbius 16:25). Diosnintsik mandamanqantsikta rurarqa, pëtam kushitsishun y ruranqantsikkunapis allim yarqunqa (Isaïas 48:17, 18).
Diospa Gobiernunta puntata ashinapaqmi, Jesusqa yachatsikurqan. Tsëtaqa nirqan qellëllaman mana yarparäkuyänampaq y familiankuna wanayanqanta o ministiyanqankunata tariyänampaq alläpa trabajarnin Diospa kaqta mana qonqariyänampaq (Mateu 6:19-21, 25-32).
Y änikurqanmi, Diospa Gobiernunta puntaman churayaptinqa imankunapis mana pishinampaq kaqta y shamoq tiempuchö atska bendicionkunata chaskiyänampaq kaqta (Jesuspa discïpulunkunaqa, yachatsinqannöllam Diosta sirwiyänampaq kallpachakuyarqan, peru manam rikäyarqantsu sufrimientukuna y mana allikuna ushakaqtaqa, tsënö kaptimpis Jehoväqa imëka mana allikunapitam cuidarqan.
Jehovä Dios ninqanta wiyakuyanqanmi yanaparqan, mana cäsukoq nunakunanö mana sufriyänampaq. Y Diospa Gobiernunman llapan shonqunkunawan creiyanqanmi, imëka problëmakunapa pasayaptimpis alli tsarakuyänampaq yanaparqan y Dios kënö ninqantam imëpis qonqayarqantsu, ‘nunakunapa kallpampita mas puëdeq kallpaqa Diospita kanqanta’ (2 Corintius 4:7-9).
DIOSPA GOBIERNUNTA ASHI
Jesuspa discïpulunkunaqa Diospa Gobiernuntam puntaman churayarqan, tsëmi Diospa alli willakuyninkunata më tsëchö yachatsikuyarqan (Colosensis 1:23). Kanan witsanqa pikunataq Diospa alli willakuyninkunata yachatsikuykäyan.
Jehoväpa testïgunkunam, pëkuna musyayanmi ichikllachöna Diosnintsikpa Gobiernun llapan mana allikunata ushakätsinampaq kaqta, tsëmi kallpachakuyan Jesus kënö ninqanta rurayänampaq: “Llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa” (Mateu 24:14).
Berëa markachö creikoqkunanötsuraq, qampis Diospa alli willakuyninta chaskikunki. Pëkunaqa, apostol Pablu Diospita yachatsikuptinmi ‘alli shonqunkunawan alli wiyakuyarqan’, y “llapan junaqkunam Diospa Palabranta alleq estudiayaq”, tsënöpa yachakuykäyanqankuna rasumpa o mana rasumpa kanqanta musyayänampaq y yachakuyanqankunamannö kawakuyänampaq (Hëchus 17:11, 12).
Pëkunanölla, Diospa Gobiernunta qampis puntaman churaptikiqa Jehoväqa cuidashunkim y Jesus patsata gobernar qallëkamuptinqa atska bendicionkunata chaskinki.