Chay jatun wayra jinan “manchay ñak’ariy” p’unchaypas qayllaykamushan (Mateo 24:21). Manaña atisunmanchu ayqekuyta chaypas, atisunmanmi pakakuytaqa. Chaypaq, ¿imatan ruwasunman?

Orqo patapi Jesucristo yachachishaspan niran: “Diospa gobiernonta chanin kaynintawan ñaupaqtaqa maskhaychis”, nispa (Mateo 6:33). ¿Imaninantan nisharan?

“Diospa gobiernonta ñaupaqtaqa maskhaychis”. Diospa gobiernontan imamantapas ñaupaqman churananchis (Mateo 6:25, 32, 33). ¿Imaraykun chhaynata piensanchis? Runakuna kay pachapi llakikuykunata mana chinkachiyta atisqankuraykun. Diosllan chaytaqa ruwayta atinqa.

Diospa ‘chanin kayninta ñaupaqta maskhaychis’. Chaypaqqa Diospa kamachikuyninkunatan kasukunanchis. ¿Imarayku? Sichus noqallanchismanta allinkaqta mana allinkaqtapas ruwasun chayqa, mana allinpin tarikusun (Proverbios 16:25). Jehová Diostaqa kamachikuyninkunata kasukuspan kusichisun, chhaynapitaq allillan ima ruwasqanchispas kanqa (Isaías 48:17, 18).

¿Imaraykun Jesús niran: “Aswanpas Diospa gobiernonta chanin kaynintawan ñaupaqtaqa maskhaychis” nispa? Wakin runakunaqa qolqeta maskhaspan Diospa gobiernonta qhepaman churananku karan, chayraykun Jesusqa chayta nisharan. (Mateo 6:19-21, 25-32).

 Chaymantapas Jesusmi yachachiran sichus Diospa gobiernonta ñaupaqta maskhasun chayqa mana imanchispas faltananmanta, jamuq tiempopipas askha bendicionkunata chaskinanchismantawan (Mateo 6:33).

Jesuspa tiemponpi qatikuqninkunaqa Diospa gobiernonta chanin kaynintawan ñaupaqmanña churaranku chaypas, manan rikurankuchu ñak’ariy tukuchisqa kasqantaqa. Ichaqa imaymanamanta pakaykusqan karanku. ¿Imaynapi?

Jehová Diosta kasukuqkunaqa mana kasukuq runakunaq imaymanapi tarikusqankumantan pakaykusqa karanku. Paykunaqa Diospa gobiernon jamunanpin allinta iñiranku, chaymi yanaparan imaymana llakikuykunata atipanankupaq. Diosmi paykunamanqa qoran tukuy imatapas aguantanankupaq ‘runakunaq mana aypay atisqan atiyta’ (2 Corintios 4:7-9).

Jesusqa Diospa gobiernonta ñaupaqta maskhanamantan kamachikuran, chaytan ñaupaq cristianokunaqa kasukuranku. Chaymi Diospa gobiernonmanta tiyasqanku llaqtakunapi runakunaman willaranku (Colosenses 1:23). ¿Pikunan kunan tiempopi chayta ruwashanku?

Jehová Diospa testigonkunaqa yachankun pisi tiempollamanta Diospa gobiernon kay millay pachata tukuchinanta. Chaymi Jesuspa kay nisqanta kasukushanku: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa (Mateo 24:14).

¿Imatan ruwawaq chayta yachaspa? Yaqapaschá Berea llaqtapi iñiqkuna jina ruwawaq. Paykunaqa apóstol Pabloq willasqantan uyarikuranku, jinaspan ‘chay yachasqanku cheqaqpunichus kashan icha manachus chayta yachanankupaq sapa p’unchay Diospa simin qelqata allintapuni estudiaqku’, yachasqankuman jinataq kausarankupas (Hechos 17:11, 12).

Sichus Diospa gobiernonta ñaupaqta maskhanki chayqa pakaykusqan kanki, kunanpas jamuq tiempopipas, chhaynapin wiñaypaq thaj kausayta tarinki.