Din koté, nou tout nou lé an plin su le chemin ousa in « gro siklonn » i sar pasé, é le non ke Jézu la donn ali sé le « gran détrès » (Matieu 24:21). Na poin okin landroi pou alé, pou évit se gran maleur ke i sa tonm su nou. Mé, lé posib trouv in protéksion. Mé kosa i fo fé pou sa ?

Dan son Diskour li la fé su la montagn, Jézu la donn se konsèy la, pou ke nou protèj anou : « Kontinué rod dabor le Roiyom é la justis Bondieu » (Matieu 6:33). Koman nou suiv se konsèy la ?

Rod dabor le roiyom Bondieu. Sa i ve dir ke nou doi montré ke le roiyom Bondieu na plus linportans ke ninport kèl zafèr (Matieu 6:25, 32, 33). Poukosa nou doi voir ali komsa ? Parske bann zumin lé pa kapab dutou règ bann problèm ke néna partou su la tèr. Rienk le roiyom Bondieu i gingn niabout fé se gro travay difisil.

Rod dabor la justis Bondieu. Nou doi fé nout posib pour réspèk bann loi é bann zansègnman biblik ke lé jus, ke Bondieu la doné. Akoz nou doi fé sa ? Parske kan nou désid par nou mèm sak lé bien ou sak lé mové nou gingn bann gro problèm (Provèrb 16:25). Parkont, kan nou suiv bann zansègnman ke Bondieu i donn anou, dabor nou kontant son keur, mé nou gingn osi bann gran bienfé (Izai 48:17, 18).

Kontinué rod dabor le Roiyom é la justis Bondieu. Jézu la di ke désèrtin noré arèt mèt sa an premié parske zot na lidé ke zot i sré an sékurité  si zot i gingn plus larjan ankor. Dot noré lès bann sousi la vi kapar azot tèlman, ke zot na poin le tan « rod » le roiyom Bondieu (Matieu 6:19-21, 25-32).

Pourtan, Jézu la promèt ke sak va soutien le roiyom Bondieu va gingn koméla mèm sak zot la bezoin pou viv, é plutar dan lavnir in takon bénédiksion (Matieu 6:33).

Bann disip Jézu dann tan 1^é sièk, la rod dabor le roiyom é la justis Bondieu mé malgrésa de zot vivan zot la pa vu la soufrans domoun disparèt. Parkont, banna la gingn in protéksion. Par koman ?

Zot té réspèk bann zansègnman jus ke Bondieu té i donn, é sa la protèj azot kont bann difikulté ke bann domoun té i ékout pa Bondieu lavé. An plus ke sa, zot té vréman sur ke le Roiyom té sa vnir, é sa la èd azot sobat kont bann zépreuv, mèm le plu difisil. Anfin d’kont, Bondieu la donn azot la « puisans ki dépas in fors normal » pou ke zot i gingn sobat kont bann difikulté la (2 Korintien 4:7-9).

Bann krétien dann tan 1^é sièk la obéi lord ke Jézu la doné : zot la mèt an premié le Roiyom. Zot la prèch le gayar nouvèl le Roiyom partou dann landroi ousa zot té i viv (Kolosien 1:23). Èske néna domoun i fé sa osi zordi ?

Oui ! Bann Témoin Jéova i konpran ke i rès pu bonpe le tan avan ke le roiyom Bondieu i sa détrui se monn ke nou viv dedan. Alor zot i fé sak i fo pou donn paké dann laktivité prédikasion ke Jézu la doné pou fé : « Bonn nouvèl Roiyom la i sra préché su tout la tèr abité kom in témoiniaj pou tout bann nasion; é aprésa, la fin va arivé » (Matieu 24:14).

Kosa ou sar fé kan ou va antann se gayar nouvèl la ? Nou ankouraj aou vréman pou suiv légzanp bann domoun ke té abit Béré, inn ti vil dann réjion Masédoinn dann tan 1^é sièk. Kan lapot Pol la prèch le gayar nouvèl le Roiyom, banna « lété présé » aksèp son mésaj. Aprésa, zot la ‘étudié avèk sèryeu bann Zékritur’ pou asur azot ke tout sak zot lavé antandu lété vré. É apré, banna la aplik dan zot vi sak zot lavé aprann (Akt 17:11, 12).

Ou pe fé kom zot osi. Kan ou va mèt an premié le Roiyom é la justis Bondieu, depui koméla mèm ou sra protéjé é dan lavnir ou va viv an pé é ou sra an sékurité pou toultan.