Pana hari sare amen ka doživina „jekh bari oluja“ koja o Isus vićinđa „bari nevolja“ (Matej 24:21). Amen našti te naša andi odija nevolja. Ama, već akana šaj te ćera diso te šaj tegani te ova zaštitime. Soj tano odova?

Ked ićerđa i Propoved ki gora, o Isus phenđa: „Odolese najangleder roden [e Devleso] Kraljevstvo hem e Devlesi pravednost“ (Matej 6:33). Sar šaj te ćera odova?

Najangleder roden e Devleso Kraljevstvo. Odova značini so e Devleso Kraljevstvo valjani te ovel amenđe považno ando bilo so aver (Matej 6:25, 32, 33). Sose ađahar valjani te dikha ko Devleso Kraljevstvo? Odolese so o manuša našti kokri te rešinen o problemija ko sveto. Samo e Devleso Kraljevstvo šaj te ćerel odova.

Roden e Devlesi pravednost. Valjani te da sa amendar te živina ađahar sar so o Devel mangela. Sose? Ako kokri odlučinaja soj tano amenđe šukar, a soj tano lošno, ka ana disave lošna odluke hem na ka nakha šukar (Poslovice 16:25). Ki aver strana, ako šunaja e Devle, ov ka ovel bahtalo hem amen ka ovel amen but šukar životi (Isaija 48:17, 18).

Najangleder roden e Devleso Kraljevstvo hem e Devlesi pravednost. O Isus upozorinđa amen so šaj te pera ki zamka te mislina so  o pare šaj te zaštitinen amen. A disave tane odobor opteretime pe problemencar so nane len vreme e Devlese (Matej 6:19-21, 25-32).

Ama, o Isus obećinđa so okola kola ćhivena e Devleso Kraljevsto ko prvo than, ka ovel len sa so valjani olenđe akana, a ki budućnost ka ovel len pana pobare blagoslovija (Matej 6:33).

Iako e Isusese učenikija ko prvo veko ćhivđe e Devleso Kraljevstvo ko prvo than hem šunđe e Devle, on na doživinđe te dikhen o sveto bizo muke hem bizi patnja. Ama, on hine zaštitime. Sar?

Sebepi so šunđe e Devle, on na doživinđe o problemija kola hine len avera manuša kola na šunđe e Devle. On hine len zorali vera so o Kraljevstvo jekh dive ka avel hem odova pomožinđa lenđe te istrajinen ko najphare problemija. Uzo odova, ko sa olenge pharipa o Devel dinđa len „but bari snaga“ (2. Korinćanima 4:7-9).

O hrišćanija ko prvo veko šunđe e Isusesi zapovest najangleder te roden e Devleso Kraljevstvo. On odova ćerđe ađahar so propovedinđe ando odova Kraljevstvo ki celo phuv (Kološanima 1:23). Da li neko odova avdije ćerela?

Ja! E Jehovase svedokija haljona so pana hari e Devleso Kraljevstvo ka cidel sa o lošnipe ki phuv. Odolese on dena sa pestar te ićeren pe ko Isusese lafija: „Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj“ (Matej 24:14).

Savi odluka tu ka ane? Podstakninaja tut te ove sar o hrišćanija ko prvo veko kola živinđe ki Verija. Ked on šunđe i šukar vest ando Kraljevstvo kotar apostol Pavle, on „celone vileja prihvatinđe e Devleso lafi“. On „svako dive pažljivo istražinđe o Lil te dikhen da li odova so šunđe tano ćaćipe“ hem ićerđe pe ko odova so sikljilje (Dela apostolska 17:11, 12).

Tu šaj isto odova te ćere. Ako ćhiveja e Devleso Kraljevstvo ko prvo than hem ako šuneja e Devle, već avdije ka ove zaštitimo, a ki budućnost ka uživine ko but baro mir.