Na hine hi kusuhi ni ku langutana ni “xidzedze” lexi honetelaka, Yesu a hlaye leswaku ku ta va ni ‘nhlomulo lowukulu’. (Mattheo 24:21, Testamente Ledrimpshwa ni Mapsalma, TLM) A hi nge na ku suketana hi tsrutsruma nhlomulo lowo lowukulu. Kambe hi nga yentxa xa ku kazri akuva hi tisizrelela. I yini?

Ka wukaneli byakwe bya le nhaveni, Yesu a hlaye leswi: ‘Kambe zrangani n’wi djula Mfumu wa Xikwembu Nkulukumba ni ku lulama kwakwe.’ (Mattheo 6:33) Hi nga swi yentxisa kuyini leswo?

Djula Mfumu wa Xikwembu Nkulukumba ku sungula. Leswo swi hlaya leswaku Mfumu wa Xikwembu Nkulukumba wu fanele wu va wa lisima a wuton’wini byezru. (Mattheo 6:25, 32, 33) Ha yini Mfumu wu fanele wu va wa ku sungula? Hikusa hi wone ntsena lowu nga lulamisaka swikazratu swa vhanu leswi mhunu a nga swi kotikiki ku swi lulamisa.

Djula ku lulama kwakwe. Hi fanela ku yentxa hinkwaswu leswi hi nga swi kotaka akuva hi hanya hi ku pfumelelana ni milawu ya ku lulama ya Xikwembu Nkulukumba. Ha yini? Hikusa ku ba milawu leyo hi makatla kumbe ku titsremela ha byezru leswinene ni leswi bihiki, swi tisa ntsrhovelo wa ku bava. (Amaproverbia 16:25) Hi tlhelo dzrin’wana, loko hi hanya hi milawu ya Xikwembu Nkulukumba, a hi mu yingiseti ntsena, kambe swi tlhela swi pfuna na hine.—Ezaya 48:17, 18.

Simama u djula Mfumu ni ku lulama ka Xikwembu Nkulukumba ku sungula. Yesu a hlaye leswaku vambeni a va ta womelela ka mintxhumu leyi vonekaka lakakuva va pimisa leswaku loko va ngo kuma  mali yinyingi, va nga kuma ku sizreleleka. Kasi vambeni va nga ha tsrhama na va hlatiyela ngopfu hi leswi va swi vilelaka a wuton’wini swi va yentxa va pfumala nkama wa ku djula Mfumu wa Xikwembu Nkulukumba.—Mattheo 6:19-21, 25-32.

Nambitanu, Yesu a dumbise leswaku lava seketelaka Mfumu wa Xikwembu Nkulukumba va ta kuma leswi va swi vilelaka swoswi, va tlhela va tikholisa hi matovoko lawa ma nga helikiki nkameni lowu taka.—Mattheo 6:33.

Nambi leswi vadondzrisiwa va Yesu va djuleke Mfumu wa Xikwembu Nkulukumba ku sungula ni ku lulama ka wone, a va byi vonanga wugamu bya ku vaviseka ni ku xaniseka a nkameni wavu. Kambe va sizreleliwile. Swi kotekise kuyini swoleswo?

Va hanye hi ku pfumelelana ni milawu ya Xikwembu Nkulukumba. Hi kola ka leswo va huluke ka swikazratu swinyingi leswi vhanu va nga naswu loko va nga yingiseti. A va ni lipfmelo ledzri tiyiki dzra leswaku Mfumu a wu ta ta, swoleswo swi va pfune ku langusana ni swikazratu leswikulu. Nangweso, Xikwembu Nkulukumba a va nyiki ‘wukulu bya ntamu’ akuva va lavisana ni xiyimu xini na xini lexi ntlhontlhaka.—2 Ba-le-Korinte 4:7-9.

Vakriste va ku sungula a va ma dzrelanga mazritu ya Yesu, ya ku djula Mfumu ku sungula. Va zrezre madzrungula lamanene ya Mfumu kwini na kwini lomu vhanu a va kumeka kone. (Ba-le-Kolosa 1:23) Xana va kone lava yentxaka ntizro lowu namunhla?

Ina! Timboni ta Yehovha ta swi tiva leswaku ke sala nkamanyana leswaku Mfumu wa Xikwembu Nkulukumba wu helisa xiyimu xa misava leyi ya ku biha. Xiswoswo va yentxa hinkwaswu leswi va nga swikotaka ku hetisisa mazritu ya Yesu lawa ma liki: ‘Kutani evhangeli ledzri dzra Mfumu dzri ta zrezriwa misaveni hinkwayu, byi va wumboni ku hinkwawu matiko, hi kone ku taka ta wugamu.’—Mattheo 24:14.

Xana u ta yentxa yini ntsrhaku ka ku yingela madzrungula lawo? Ha ku kutxa akuva u yentxa ku fana ni vhanu va le Bereya wa le Makedoniya a dzaneni dzra ku sungula. Loko mupostola Pawulo a va zrezrele madzrungula lamanene ya Mfumu va yamukele zritu ‘hi mbilu leyi swi navelaka’. Ku sukela kolanu, va ‘lavisise Matsralwa’ hinkwawu masiku akuva va tiyiseka leswaku timhaka leto kunene ti tanu, kutani ‘ka hanga ku pfumela lavanyingi ku vone’.—Amintiṛo 17:11, 12.

Na wene u nga yentxa hi la ku fanaka. Loko u zranga u djula Mfumu wa Xikwembu Nkulukumba ni ku lulama kwakwe, u ta kuma mbangu wa ku sizreleleka swoswi u tlhela u kuma ku zrula ka ntiyiso a nkameni lowu taka.