Mwandimomwene, ife tonsene tikukhala n’dziko inafuna kupita na “condzi,” Yezu alonga kuti condzi ceneci ndi “nyatwa ikulu.” (Mateu 24:21) Ife nee tinakwanisa kuthawa nyatwa ineyi. Mbwenye tinakwanisa kucita cinthu toera kutsidzikizika. Ndi cinthu cipi?

Pa Nkhani yace ya Paphiri, Yezu Kristu apereka citsogolero ici: “Pitirizani kuikha pa mbuto yakutoma Umambo wa Mulungu na ulungami wace.” (Mateu 6:33) Tinacita tani pyenepi?

Pakutoma sakani Umambo wa Mulungu. Pyenepi pisabveka kuti tisafunika kuona Umambo wa Mulungu ninga cinthu cakufunika kakamwe kupiringana pinthu pinango. (Mateu 6:25, 32, 33) Thangwi yanji? Thangwi anthu nkhabe kwanisa kumalisa nyatwa. Basi ene Umambo wa Mulungu ndi unafuna kukwanisa kucita pyenepi.

Sakani ulungami wace. Tisafunika kuwangisira toera kutowezera mitemo yakulungama ya Mulungu na pinalonga Bhibhlya. Thangwi yanji? Thangwi tingasankhula tekhene cadidi na cakuipa pinatibweresera nyatwa. (Misangani 16:25) Munjira inango, tingabvera pinalonga Mulungu, nee tisatsandzayisa basi ene Mulungu, mbwenye tisaphindulambo.​—Izaiya 48:17, 18.

Pitirizani kusaka pakutoma Umambo wa Mulungu na ulungami wace. Yezu acenjeza kuti panango anango anadzudzumika mbanyerezera kuti  anakhala akutsidzikizika angakhala na kobiri izinji. Panango anango anadzudzumika kakamwe thangwi yakutsalakana umaso wawo na wa banja yawo mbasowa ndzidzi wakusaka Umambo wa Mulungu.​—Mateu 6:19-21, 25-32.

Yezu apikira kuti ale anaphedzera Umambo wa Mulungu, anadzapaswa pinafuna iwo cincino, pontho anatsandzaya na nkhombo za ntsogolo.​—Mateu 6:33.

Ngakhale kuti anyakupfundza a Yezu a mu ndzidzi wa apostolo akhasaka pakutoma Umambo wa Mulungu na ulungami wace, iwo nee aona kumala kwa nyatwa zonsene mu ndzidzi wawo. Mbwenye iwo akhali akutsidzikizika. Munjira ipi?

Iwo akakhala maso mwakubverana na mitemo yakulungama ya Mulungu, pontho pyenepi pyaatsidzikiza ku nyatwa zikhathimbana na ale akhakhonda kubvera pinalonga Mulungu. Kukhulupira kwawo kuti Umambo wa Mulungu mbudabwera, kwaaphedza kupirira nyatwa zikulu. Mulungu aapasa “mphambvu yakupiringana yacibaliro” toera apirire nyatwa zawo.​—2 Akorinto 4:7-9.

Akristu a ndzidzi wa apostolo abvera ntemo wa Yezu wakusaka Umambo wa Mulungu pakutoma. Iwo amwaza mphangwa za Umambo m’makhundu onsene a dziko yapantsi. (Akolose 1:23) Kodi alipo anacita pyenepi lero?

Inde! Mboni za Yahova zisadziwa kuti ndzidzi udasala ndi wakucepa toera Umambo wa Mulungu ufudze makhaliro akuipa a dziko. Pontho zisacita pyonsene pinakwanisa iwo toera kubvera mafala a Yezu: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.”​—Mateu 24:14

Kodi imwe munatawira tani mphangwa zadidi? Tisakuphembani toera mutowezere Akristu a mu ndzidzi wa apostolo akakhala mu nzinda wa Bhereya ku Masedhonya. Pidabva iwo mphangwa zadidi za Umambo wa Mulungu kubulukira kuna mpostolo Paulu, iwo azitawira “na ntima onsene.” Buluka penepo iwo ‘apfundza Malemba mwacidikhodikho’ toera kuona khala pidabva iwo pikhabverana na Malemba, natenepa iwo acita pinthu mwakubverana na pidapfundza iwo.​—Mabasa 17:11, 12.

Imwe munakwanisa kucita pibodzi pyene. Mungasaka pakutoma Umambo wa Mulungu na ulungami wace, munakhala akutsidzikizika cincino, pontho munakhala na ntendere wakukhonda mala na akutsidzikizika ntsogolo.