Wan gaan „ventu” seei dë a pasi ta ko miti u tu. Jesosi kai ën di „gaan fuka” (Mateosi 24:21). Kamian an dë fuu go tjubi u di gaan fuka aki an miti u. Ma u sa du wan soni u hogi an miti u, te di gaan fuka aki dou. Andi u sa du?

A di taki di Jesosi bi hoi a di kuun libi, a bi piki u andi u musu. A bi taki taa: „A di fosu kamian un musu biinga fuun ta dë a di Tii [Könuköndë] u Masa Gadu dendu ta libi kumafa a kë” (Mateosi 6:33). Unfa u sa du di soni dë?

Suku di Könuköndë u Gadu fosu. Hën da u musu kai di Könuköndë u Gadu gaan soni möön hii dee woto soni (Mateosi 6:25, 32, 33). Faandi mbei u musu si ën sö? Wë u di libisëmbë an sa puu dee fuka di de ta abi. Di Könuköndë u Gadu nöö sa du di gaan wooko dë.

Suku di leti fasi fa Gadu ta du soni. U musu mbei hii möiti fuu ta libi ku dee wëti u Gadu. Faandi mbei u musu du ën? U di ee u taki da useei andi bunu ku andi an bunu, nöö soni an o waka bunu da u (Nöngö 16:25). Ma ee u ta libi ku dee wëti u Gadu, nöö a o ta wai ku u, söseei woo feni wini fëën tu.​—Jesaaja 48:17, 18.

Mbei möiti u ta suku di Könuköndë u Gadu fosu ku di leti fasi fa Gadu ta du soni. Jesosi bi taki taa so sëmbë an bi o ta suku di Könuköndë fosu, u di de ta si kuma soni o waka bunu da de te de ta mbei möiti u abi hia möni. Wotowan sa mbei dee bookohedi  di de abi tapa de u de an feni ten u suku di Könuköndë u Gadu.​—Mateosi 6:19-21, 25-32.

Ma Jesosi bi taki taa dee sëmbë dee ta heepi di Könuköndë u Gadu o feni dee soni di de abi fanöudu nöunöu, söseei de o feni gaan bunu u teego a di ten di ta ko.​—Mateosi 6:33.

Hii fa dee fesiten bakama u Jesosi bi ta suku di Könuköndë u Gadu fosu ku di leti fasi fa Gadu ta du soni, tökuseei pena ku fuka bi dë a di ten di de bi dë a libi jeti. Ma de bi feni tjubi. Na un fasi?

De bi ta libi ku dee wëti u Gadu, nöö di soni dë bi heepi de u de an bi abi dee bookohedi, di dee sëmbë dee an bi sabi dee wëti u Gadu bi ta abi. Di taanga biibi di de bi abi taa di Könuköndë bi o ko, bi heepi de ku dee möön gaan bookohedi di de bi ta abi. Nöö Gadu bi da de „di gaan kaakiti” fëën u heepi de.​—2 Kolenti 4:7-9.

Dee fesiten Keesitu sëmbë bi ta suku di Könuköndë fosu kumafa Jesosi bi piki de u de du ën. De bi paaja di bunu buka u di Könuköndë ka de bi sa paajëën dou (Kolosën 1:23). Sëmbë ta du di soni aki a di ten aki ö?

Aai! Dee Jehovah Kotoigi ta fusutan taa ten an fika hia möön ufö di Könuköndë u Gadu ko seeka di goonliba aki. Fëën mbei de ta mbei hii möiti u hoi dee soni di Jesosi bi taki a pakisei. A bi taki taa: „Di bunu buka u di Njunjun Tii [nasö Könuköndë] u Gadu musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba.”​—Mateosi 24:14.

Andi joo du fa i ko jei di bunu buka aki? U ta da i taanga fii djeesi dee sëmbë dee bi ta libi a di foto u di pisiwata u Masadonia de kai Belia. Di de bi jei di bunu buka u di Könuköndë di Paulosu bi konda da de, hën de bi „haikëën ku piizii seei”. Baka di dë, hën ’de bi lesi Gadu Buku finifini ta wegi ta luku ee di soni Paulosu bi taki dë ee a ta kai ku di Buku’, nöö de bi du dee soni di de bi lei tu.​—Tjabukama 17:11, 12.

I sa djeesi de tu. Te i ta suku di Könuköndë u Gadu fosu ku di leti fasi fa Gadu ta du soni, nöö soni o waka bunu da i nöunöu kaa, söseei joo ta dë bööböö ta libi fiifii a di ten di ta ko.