Jighilii yô, ica a kera gba ga tsô se nyôr ken shighe u lun er “ijeverahumbe” i vihin tsung i Yesu yange ôr kwagh u i ér, ka “zegecan” la. (Mateu 24:21) Se fatyô u yevese ijeverahumbe ne ga. Kpa se fatyô u eren kwagh u una kura se yô. Nyi kwagha?

Yesu yange wa kwagh ken Ityesen na i sha Uwo la, kaa ér: “Sha nahan yô, za nen hemen u keren Tartor u Aôndo hiihii kua perapera na.” (Mateu 6:33) Se er kwagh ne nena?

Ker Tartor u Aôndo hiihii. Kwagh ne tese ér gba u Tartor u Aôndo ua hemba gban se kwagh a hanma kwagh ugen cii. (Mateu 6:25, 32, 33) Gba u a lu nahan sha ci u nyi? Sha ci u uumace vea fatyô u sôron mbamzeyol vev ayolave ga. Ka Tartor u Aôndo tseegh ua fatyô u eren kwagh u a taver kpishi ne ye.

Ker perapera na. Gba u se nôngo sha afatyô wase cii se kuran atindi a Aôndo shi se dondon akaawan a na a perapera la. Sha ci u nyi? Sha ci u aluer se mba tsuan kwagh u dedoo shin kwagh u bo ayolase yô, kwagh u vihin tsung una due ker. (Anzaakaa 16:25) Kpa aluer se mba kuran atindi a Aôndo yô, se lu eren ishima i Aôndo tseegh ga, kpa shi se lu wasen ayolase kpaa.—Yesaia 48:17, 18.

Za hemen u keren Tartor u Aôndo man perapera na hiihii. Yesu yange fa ér alaghga mbagenev vea de akaa aa dan ve, vea hen ér aluer mba a inyaregh kpishi yô, ki a kura ve.  Mbagenev di, alaghga vea vihi shighe man agee a ve kpishi u nôngon ér vea sôr mbamzeyol vev je yô vea kera lu a shighe u keren Tartor u Aôndo ga. Nahan Yesu ta cin sha kwagh ne.—Mateu 6:19-21, 25-32.

Nahan kpa, Yesu tôndo zwa ér mba ve lu suen Tartor u Aôndo la cii, vea lu a kwagh u kwagh a gbe ve a mi hegen la shi vea va zua a averen a tsôron ken hemen.—Mateu 6:33.

Shin er mbahenen mba Yesu mba sha ayange a mbaapostoli la, lu keren Tartor u Aôndo man perapera na hiihii nahan kpa, sha shighe ve la i bee a mnyoon man ican i yan cii ga. Kpa yange i kura ve. Nena?

Yange ve kuran atindi a Aôndo a perapera la, nahan ve kera tagher a mbamzeyol mba ior mba ve kuran atindi a Aôndo ga tagher a mi la ga. Jighjigh u ve lu a mi taveraa ér Tartor u Aôndo ua va la, wase ve u nôngon a mbamzeyol mba vihin tsung mbara je kpaa. Shi Aôndo na ve “agee a a gande a orumace” la, sha er vea nôngo a mbamzeyol vev yô.—2 Mbakorinte 4:7-9.

Mbakristu mba sha ayange a mbaapostoli la, yange ve dondo kwaghwan u Yesu, u kaa ér i ker Tartor u Aôndo hiihii la. Yange ve pase loho u dedoo u Tartor la hen veghertar u ve lu her la cii. (Mbakolose 1:23) Ma or ngu eren kwagh ne nyian je kpa?

Een! Mbashiada mba Yehova fa je ér shi cuku tsô Tartor u Aôndo ua va kar a tar u hegen ne kera. Nahan mba nôngon sha afatyô ve cii u dondon mkaanem ma Yesu man, ér: “A pase loho u dedoo u Tartor ne a tser tar sha u u lu shiada hen akuraior cii, ka zum la mkur una va ye.”—Mateu 24:14.

Ka nyi i doo u u er shighe u u ongo loho u dedoo? Se mba wan we kwagh ser, dondo ikyav i ior i Masedonia mba ken geri u Berea, mba sha ayange a mbaapostoli la. Zum u ve ungwa loho u dedoo u Tartor la hen apostoli Paulu yô, ve ngohol u “sha gbashima tsung” je. Maa ‘ve ver ishima zulee ve time ken Ruamabera’ sha u vea fa aluer akaa shon aa lu nahan mimi yô, mba fe yô, ve na jighjigh.—Aerenakaa 17:11, 12.

We kpa u fatyô u eren nahan. Aluer u ker Tartor u Aôndo kua perapera na la hiihii yô, u zua a ijiir i yeren shi u lu ken mkor hegen, shi ken hemen u va zua a bem u tsôron shi u lu ken mkpeyol.