Mwakuyanana waka, tosi taja nge te pamalu ngo pachitikengi chimphepu chikulu chakunanga vinthu cho Yesu wanguchidana kuti “chisuzgu chikulu.” (Mateyu 24:21) Mphakusuzga kuti tichithaŵi chisuzgu chenichi. Kweni tikhumbika kuchita chinthu chinyaki kuti tivikiliriki. Ntchinthu wuli cho tikhumbika kuchita?

Pa Upharazgi waki wa Paphiri Yesu wanguchiska ŵanthu kuti: “Lutirizgani kupenja dankha Ufumu [waku Chiuta] ndi urunji waki.” (Mateyu 6:33) Kumbi tingachita wuli venivi?

Lutirizgani kupenja dankha Ufumu waku Chiuta. Fundu iyi ying’anamuwa kuti tiwonengi Ufumu waku Chiuta kuti ndiwu ngwakukhumbika ukongwa pa umoyu widu kuluska chinthu chinyaki chechosi. (Mateyu 6:25, 32, 33) Ntchifukwa wuli tikhumbika kuwuwona viyo? Veviyo chifukwa chakuti ulamuliru wa ŵanthu watondeka kumalisa masuzgu pacharu. Ufumu waku Chiuta pe wija ndiwu ugwirengi ntchitu yakusuzga yeniyi.

Penjani urunji waki. Tikhumbika kuyesesa ukongwa kugwiriskiya ntchitu marangu ngaurunji ngaku Chiuta ndipuso fundu zaki. Ntchifukwa tikhumbika kuchita viyo? Tikhumbika kuchita ivi chifukwa asani tingajisankhiya tija pakati pa chamampha ndi chiheni, tingakumana ndi masuzgu ngakulu pakumaliya paki. (Nthanthi 16:25) Kweniso asani tigwiriskiyengi ntchitu fundu zaku Chiuta tikondwesengi iyu pe cha kweni vinthu vitiyendiyengi umampha.​—Yesaya 48:17, 18.

Lutirizgani kupenja dankha Ufumu waku Chiuta ndi urunji waki. Yesu wangutcheŵeska kuti ŵanthu anyaki  azamutimbanyizgika ndipu azamuŵanaŵana kuti kusaniya ndalama zinandi ndiku kungaŵavikiliya. Anyaki amaliya nyengu ndi nthazi zawu pakulimbana ndi masuzgu ngo akumana nangu zuŵa lelosi, mumalu mwakupenja Ufumu waku Chiuta.​—Mateyu 6:19-21, 25-32.

Kweni Yesu wakulayizga kuti wo alutirizga kupenja Ufumu waku Chiuta asaniyengi vo akhumbika pa umoyu ndipuso kunthazi azamukondwa ndi vitumbiku vambula kumala.​—Mateyu 6:33.

Chinanga kuti akusambira aku Yesu ayesesanga kupenja Ufumu waku Chiuta kweni anguwona cha kumala kwa urwirwi ndipuso masuzgu ngo ŵanthu akumananga nangu mu nyengu yawu. Kweni yiwu ŵenga akuvikilirika. Munthowa wuli?

Yiwu agwiriskiyanga ntchitu fundu zaurunji zaku Chiuta ndipu fundu zenizi zaŵavikiliyanga ku masuzgu ngo ŵanthu wo alekanga kuvwiya Chiuta akumananga nangu. Chigomezgu chawu chanthazi chakuti Ufumu waku Chiuta uzengi chaŵawovyanga kuti akunthiyengepu mayeseru ngakulungakulu pa umoyu wawu. Chiuta wanguŵapaska “nthazi yakujumpha yo tituŵa nayu” kuti afiski kukunthiyapu.​—2 Akorinto 4:7-9.

Akhristu a mu nyengu yakali anguvwiya ulongozgi waku Yesu wakuti apenji dankha Ufumu. Yiwu apharazganga uthenga wamampha wa Ufumu mumalu nganandi nga muchigaŵa chawu pacharu chapasi. (Akolose 1:23) Kumbi alipu wo agwira ntchitu yeniyi mazuŵa nganu?

Hinya alipu! Mbakaboni aku Yehova. Yiwu aziŵa kuti kwaja kanyengu kamanavi ukongwa kuti Ufumu waku Chiuta utuzgepu mugonezi uheni uwu. Mwaviyo, ayesesa kuvwiya mazu ngaku Yesu ngakuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”​—Mateyu 24:14.

Kumbi yimwi muchitengi wuli asani ŵanthu ŵenaŵa atikupharazgiyani uthenga wamampha? Titikuchiskani kuti muchitengi nge ŵanthu a mu nyengu yakali aku Makedoniya mutawuni ya Bereya. Paulo wati ŵaŵapharazgiya uthenga wamampha wa Ufumu anguwulonde “mwakukhumbisiska.” Ndipu pavuli paki “afufuzanga Malemba mwakuphwere” kuti asimikizi vo anguvwa, mwakuti anguchitapu kanthu pa vo angusambira.​—Machitidu 17:11, 12.

Namwi mungachita so viyo. Asani mungayesesa kupenja dankha Ufumu waku Chiuta ndi urunji waki muvikilirikengi sonu ndipuso mwazamukondwa ndi chimangu chambula kumala kunthazi.