Khu lisine, hatshavbo ho vbanya zonani yi na vetwago khu “gingulu” nya gikhongolo, Jesu a gu tshamuseya gingulu gyogyo nga “tshanisa nya yikhongolo.” (Matewu 24:21) Kha hi na nga duga basi khu zonani gi na vetago gingulo. Ganiolu hi na gira gilogyo gasi gu dzi vhikeya. Sa gu thula ginani isoso?

Avba nya Ganelo yaye ya Gigomoni, Jesu Kristo a di ningeya wusingalagadzi wowu: “Guphela dwanelani Mufumo wa Nungungulu ni gugola [mwendro gululama] gwaye.” (Matewu 6:33) Hi nga gira kharini isoso?

Vbwetedzeya Mufumo wa Nungungulu gupheya. Si thulago gu khiso hi yede gu ninga ngudzu lisima Mufumo wa Nungungulu gu vbindra ni gevbini womini wathu. (Matewu 6:25, 32, 33) Khu ginani hi yedego gu ninga ngudzu lisima Mufumo wa Nungungulu? Kholu mifumo nya vathu gima kha yi na si kodza gu lulamisa sigaradzo nya vathu. Mufumo wa Nungungulu khuwo basi wu na sigulago sigaradzo nya vathu khu khamba wakone.

Vbwetedzeya gululama gwaye. Mavbanyelo yathu ma yede gu thangedwa khu matshina nya milayo nyo lulame ya Nungungulu. Khu ginani? Khu gu, ha gu veta khu magata milayo ya Nungungulu ni gu bwe hi dzi hungeya habune esi nya sadi ni esi nyo vivbe hi na dzi dandza na hi vbide, sigaradzo si na gira khu gu guhugeyana. (Mavingu 16:25) Khu mambe maganelelo, ha gu vbanya khu milayo nyo lulame ya Nungungulu sa gu phasa ethu kamo na siri Nungungulu. — Isaya 48:17, 18.

Simama gu vbwetedzeya Mufumo wa Nungungulu gupheya ni gululama gwaye. Jesu gengedzide khuye vambe vathu va na pfhala va bwe va pimisa gu khavo va gu wungedzeya dzitsapawu nya dzingi va na vbanya womi nya wadi. Vambe va gu khala  na va pharegide khu gu landriseya dzithomba avba nya gu va si tshaledwi khu tepo nyo vbwetedzeye Mufumo wa Nungungulu. — Matewu 6:19-21, 25-32.

Ganiolu, Jesu tumbiside gu khuye vale va seketeyago Mufumo wa Nungungulu va na mana esi va si vbwetago olu nigu mindru wa tshigu va na ta dzi buza khu makategwa nya bagubagu. — Matewu 6:33.

Ambari vapizane va Jesu va lizana myaga nya gupheye, va thangiside Mufumo wa Nungungulu gupheya ni gululama gwaye, va di kala va yafa vathu na va ngo tshaniseka. Ganiolu avo va manide gu vhikedwa. Khu ndziya muni?

Gu vbanya khu milayo nya gululame ya Nungungulu si va vhikede avba nya sigaradzo si nga ba si manwa khu vale va nga ba va veta khu magata milayo ya Nungungulu. Gukhodwa gwawe avba nya Mufumo wa Nungungulu, gu va phaside gu emisana ni sigaradzo va tshanganidego naso. Nungungulu a va ningide ‘tshivba nya yikhongolo’ tshivba yoyo yi va tiyiside ngudzu. — 2 Vakorinto 4:7-9.

MaKristo nya lizana myaga nya gupheye ma engiside gileletelo gya Jesu nya gu vbwete Mufumo wa Nungungulu gupheya. Avo va di gu dzi garadzeya gu tshumayela mahungu nya yadi nya Mufumo wa Nungungulu ga malanga nya guhambanehambane. (Vakolosi 1:23) Ina womo tsawa nyo khaguri wu girago sasimweso muhuno?

Lisinelo! Dzifakazi dza Jehovha dzi ngu dziti gwadi gu khidzo tepo yi tshadego gasi gu Mufumo wa Nungungulu wu tshungunula litigo leli nyo hine yi dugwana kamo ngudzu. Khu kharato avo va gu gira ni gevbini gasi gu gira esi Jesu a rumidego: “Mahungu nya Yadi yaya nya Mufumo wa Nungungulu ma na huweledwa tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.” — Matewu 24:14.

U na ma hakha kharini mahungu nya yadi? Hi ngu gu kutsa gu pimedzeya giyeyedzo gya vathu va lizana myaga nyo pheye va Makedhoniya lidhoropa la Bhereya. Tepo va ngapwa mahungu nya yadi khiyo ga mupostoli Pawulo, va di dzegeya gu ma hakha “khu githawo.” Va di ‘khedza gwadi milovo’ gasi gu tiyisega gu khavo esi va si pwidego gu diri lisine gani. — Mithumo 17:11, 12.

Anuwe u nga gira sasimweso. Khu gu vbwetedzeya Mufumo wa Nungungulu ni gu lulama gwaye, u na mana wuthavelo ni gu vhikedwa olu, nigu u na ta dzi buza khu gurula ni gu khadzisega mindru wa tshigu.