Kwaamba choonzyo, toonse tulikupona muchiindi chiyoosya loko. Jesu wakapandulula chiindi eecho kuti “mapenzi mapati”. (Matayo 24:21) Tazilichitikili pe kuti tuchije mapenzi aaya mapati kakutakwe malayilile ngitwapegwa. Pesi tulakonzya kuchita chimwi chintu kuti tulikwabilile. Niinzi nzitweelede kuchita?

MuNkambawuko yakwe yakuChilundu, Jesu Kristu wakaamba kuti: “Aboobo, amuzumanane kusaanguna kuyandaula Bwami [bwaLeza] abululami bwakwe.” (Matayo 6:33) Kujana wazichita biyeni?

Saanguna Kuyanduula Bwaami bwaLeza. Eezi zyaamba kuti tweelede kusaanguna kubikka Bwaami bwaLeza mubusena bwakusaanguna muzintu zyoonse nzituchita. (Matayo 6:25, 32, 33) Nkamboonzi nitweelede kuchita oobo? Nkaambo Bwaami bwaLeza mbubo abulikke bukonzya kugwisya mapenzi akakachilwa kugwisigwa aamfulumende zyabantu.

Yanduula bululami bwakwe. Yezya kupona kweendelana amilawu anjiisyo zyaJehova. Nkamboonzi? Nkaambo kuti twalisyoma akuchita zintu zibi katubonaanga zili kabotu kumamanino ziyoobijila ndiswe. (Tusimpi 16:25) Kuti twasala kupona kweendelana aazyeelelo zyaLeza tatubotezyi Leza luzutu pesi ngatuli kuligwasya lwesu.—Isaya 48:17, 18.

Amusaangune kuyanduula Bwaami bwaLeza abululami bwakwe. Jesu wakatuchenjezya kuti bamwi bakali kuyooleya kabayeeyaanga kuba aamali nyingi kulakonzya kubakwabilila. Alubo bamwi balakonzya kulikataazya atala azintu zyabuzuba abuzuba zyakuti nga  babula chiindi chakubikka Bwaami bwaLeza mubusena bwakusaanguna.—Matayo 6:19-21, 25-32.

Jesu wakaamba kuti aabo babikka Bwaami bwaLeza mubusena bwakusaanguna, bayoojana zilongezyo lino amuchiindi chili kunembo.—Matayo 6:33.

Nikuba kuti basikwiiya baJesu bakapona mumwaanda wamunyaka wakusaanguna bakabikka Bwaami mubusena bwakusaanguna abululami bwakwe, bakafwa mapenzi kaachiliwo pesi bakali kwabililidwe. Ibiyeni?

Kupona kweendelana azyeelelo zyaLeza kwakabakwabilila kuti bataswaani mapenzi ngibakaswaana bamwi akaambo kakutaswiilila Leza. Kusyoma kuti Bwaami bwaLeza mbubo bwakali kuyoomaninsya mapenzi ngibakali kuswaana kwakabagwasya kuti balisimye nibakali muzyiimo ziyumu. Leza wakabapa “nguzu zigambya iziinda zyabantu” zyakali kuyoobagwasya kuti balisimye kumapenzi ngibakali kuyooswaana.—2 Bakorinto 4:7-9.

MaKristu bamumwaanda wamunyaka wakusaanguna bakabikkila maanu kumajwi aaJesu alubo bakakambawuka makani mabotu kubantu boonse. (Bakolose 1:23) Kuchili bantu bachikambawuka na mazubaano?

Iiyi! Bakamboni baJehova balizi kuti chiindi chayinka alubo balikubeleka kusikila mpubagolela kuti bazuzikizye malayilile aaJesu aakuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Uyoowaswiilila na makani mabotu aali atala aBwaami bwaLeza? Ulakonzya kutobelezya chikozyano chamaKristu bamumwaanda wamunyaka wakusaanguna bakuBberiya. Chiindi mwaapostolo Pawulu naakabakambawukila makani mabotu aali atala aBwaami “bakaliyandide kapati mumyoyo kutambula jwi.” Kuzwa waawo, ‘bakavuntawuzya Magwalo chakulomya’ kuti babone kuti nzibakali kwiiya zyakali nzizyo na alubo “bakaba basyomi.”—Milimo 17:11, 12.

Anduwe ulakonzya kuchita oobo. Kuti wasaanguna kuyanduula Bwaami bwaLeza abululami bwakwe, uyookwabililwa, kuba aaluumuno akujana aakuyubila lino amuchiindi chili kunembo.