Olsem tasol, yumi olgeta i stap long hap i gat bikpela win, Jisas i kolim dispela olsem taim bilong “traipela hevi tru.” (Matyu 24:21) Yumi no inap ranawe i go long wanpela hap bilong abrusim dispela traipela hevi tru. Tasol yumi inap mekim samting bilong lukautim yumi yet. Yumi inap mekim wanem?

Long Bikpela Tok Long Maunten, Jisas Krais i tok: “Wok yet long painim Kingdom [Bilong God] pastaim na stretpela pasin bilong God.” (Matyu 6:33) Hau bai yumi mekim olsem?

Painim Kingdom Bilong God pastaim. Dispela i makim olsem yumi mas tingim Kingdom Bilong God i bikpela samting moa winim ol narapela samting. (Matyu 6:25, 32, 33) Bilong wanem yumi mas tingim olsem? Bikos ol man yet i no inap stretim ol hevi bilong ol. Kingdom Bilong God tasol inap mekim dispela bikpela wok.

Painim stretpela pasin bilong God. Yumi mas wok strong long bihainim ol stretpela lo na stiatok bilong God. Bilong wanem? Long wanem sapos yumi yet i laik makim wanem samting i stret na wanem samting i no stret, hevi bai kamap. (Provep 16:25) Tasol, sapos yumi bihainim ol lo bilong God, yumi amamasim God, na tu, dispela bai helpim yumi.—Aisaia 48:17, 18.

Wok yet long painim Kingdom Bilong God pastaim na stretpela pasin bilong em. Jisas i tok lukaut olsem sampela bai ting olsem ol  inap kisim gutpela sindaun long rot bilong kisim planti mani. Na ol narapela inap larim ol wari bilong laip i daunim ol tru na ol i no gat taim long painim Kingdom Bilong God.—Matyu 6:19-21, 25-32.

Jisas i tok promis olsem lain husat i sapotim Kingdom Bilong God bai kisim ol samting ol i nidim long nau na amamas long ol blesing we bai stap oltaim long bihain.—Matyu 6:33.

Maski ol disaipel bilong Jisas long taim bilong ol aposel i painim Kingdom Bilong God pastaim na stretpela pasin bilong em, ol i no bin lukim pen na hevi i pinis. Tasol ol i stap gut. Hau ol i stap gut?

Ol i bihainim ol stretpela lo bilong God, na dispela i banisim ol long ol hevi we ol man i sakim tok bilong God i karim. Strongpela bilip bilong ol olsem Kingdom bai kam i helpim ol long karim ol bikpela hevi. Na God i givim ol “strong i winim strong bilong yumi ol man” na bai ol inap karim hevi.—2 Korin 4:7-9.

Ol Kristen long taim bilong ol aposel i bihainim tok bilong Jisas long painim Kingdom pastaim. Ol i autim gutnius bilong Kingdom long ol hap ol i stap long en. (Kolosi 1:23) Yu ting i gat lain i mekim dispela wok long nau?

Yes! Ol Witnes Bilong Jehova i luksave olsem klostu nau Kingdom Bilong God bai pinisim pasin nogut bilong dispela taim. Olsem na ol i mekim olgeta samting bilong bihainim tok bilong Jisas: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Matyu 24:14.

Dispela gutnius bai kirapim yu long mekim wanem? Mipela i laik kirapim yu long bihainim pasin bilong ol manmeri long taim bilong ol aposel long taun Beria long Masedonia. Taim ol i harim gutnius bilong Kingdom long aposel Pol, ol “i gat laik tru” long kisim dispela tok. Bihain ol “i skelim gut ol Rait Holi” bilong save olsem ol tok ol i harim em i tru, na ol i bihainim samting ol i lainim.—Aposel 17:11, 12.

Yu tu inap mekim olsem. Taim yu painim Kingdom Bilong God pastaim na stretpela pasin bilong em, dispela bai lukautim yu long nau na bai yu stap gut na bel isi long bihain.