Hi ndlela yo kari, hontlheni hi hanya ka wutshamu legi gi to welwa hi khombo ga hombe, legi Jesu a gi vitanileko ku “kuxaniseka ka hombe”. (Matewu 24:21) A ku na ndlela ya ku potsa a kuxaniseka loko. Kanilezvi hi nga maha cokari kasi hi ti vhikela. Zvini hi nga mahako?

Ka Kanelo yakwe ya le Citsungeni, Jesu Kristu i nyikile a cileletelo leci: “Simamani ku lava a Mufumo wakwe [Nungungulu] kuranga ni kululama kakwe.” (Matewu 6:33) Hi zvi mahisa kuyini lezvo?

Lava a Mufumo wa Nungungulu kuranga. Lezvo zvi wula ku wona a Mufumo wa Nungungulu kota wona wa lisima nguvhu a ku hundza ni cihi. (Matewu 6:25, 32, 33) Hikuyini hi faneleko ku wu wonisa lezvo? Hiku a vanhu a ve nge zvi koti ku mbheta a zvikarato zva vanhu. Ntsena a Mufumo wa Nungungulu hi wona wu nga mahako a ntiro lowu wo karata.

Lava kululama kakwe. Hi fanele ku zama ku maha zvontlhe hi zvi kotako kasi hi hanya hi milayo yo lulama ya Nungungulu ni matshinya ya milayo. Hikuyini? Hiku loku hi ti mahela zviboho ha hoce zva lezvi zvi bihileko ni lezvi zvi nga zvinene, a magumo ya kona ma tava ya hava. (Mavingu 16:25) Kanilezvi loku hi hanya hi milayo ya Nungungulu, a hi tsakisi Nungungulu basi kanilezvi hi tlhela hi vhuneka hina wutsumbu. — Isaya 48:17, 18.

Simama ku lava a Mufumo wa Nungungulu kuranga ni kululama kakwe. Jesu i tlharihisile lezvaku a vokari kuzvilava va wa nga ta chela kota na va alakanya lezvaku loku va hlengeletela a mali yo tala va ta kuma kutshamiseka. A van’wani kuzvilava  va wa ta tsika kukarateka ku va bindza laha ka kuza va vhumala ni cikhati ca ku lava a Mufumo wa Nungungulu. — Matewu 6:19-21, 25-32.

Hambulezvo, Jesu i tsumbisile lezvaku lava va seketelako a Mufumo wa Nungungulu va ta kuma lezvi va zvi lavako zvezvi va tlhela va ti buza hi makatekwa ya pindzukelwa cikhatini ci tako. — Matewu 6:33.

Hambu lezvi a vapizani va Jesu va zana ga malembe go sangula va nga lava a Mufumo wa Nungungulu kuranga ni kululama kakwe, a va ma wonangi a magumo ya kubayisa ni kuxaniseka kontlhe cikhatini cabye. Kanilezvi va vhikelwe. Hi ndlela muni?

Va wa hanya hi milayo yo lulama ya Nungungulu ni ku lezvo zvi va vhikele ka zvikarato lezvi zvi nga kumana ni lava va nga kanyisa lezvi Nungungulu a zvi wulako. A kukholwa kabye ko tiya ka lezvaku a Mufumo wu wa tata ku va vhunile a timisela hambu hi zvikarato zva hombe. Niku Nungungulu i va nyikile “ntamu wa hombe wo hundza wa munhu” kasi va zvi hlula. — 2 Va Le Korinte 4:7-9.

A maKristu ya zana ga malembe go sangula ma ingisile a cileletelo ca Jesu ca ku lava Mufumo kuranga. Va chumayele mahungu ya ma nene ya Mufumo matlhelweni wontlhe ya misava. (Va Le Kolosi 1:23) Va kona va ha mahako a ntiro lowu nyamutlha?

Ina! A Vakustumunyu va Jehovha va zvi tiva lezvaku a cikhati ci nga sala kasi a Mufumo wa Nungungulu wu lovisa a tiko legi go biha ci tsongwani nguvhu. Hikwalaho va maha zvontlhe va zvi kotako kasi va hanya hi kuya hi magezu ya Jesu yaku: “A mahungu lawa ya ma nene ya Mufumo ma ta chumayelwa misaveni yontlhe kasi mava wukustumunyu ka matiko wontlhe, hi kona ku to chikela a kugumesa.” — Matewu 24:14.

U ta ma amukela a mahungu ya ma nene? Ha ku kuca lezvaku u pimanyisa a vanhu va zana ga malembe go sangula va nga hanya va le Makedhoniya le dhoropeni ga Bhereya. A cikhati va ngazwa a mahungu ya ma nene ya Mufumo na mupostoli Pawule, va no ma amukela “hi kutsaka ka hombe”. Va guma va “hlola khwatsi Mitsalo” kasi va tiyiseka lezvaku lezvi va zvi zwako lisine va tlhela va hanya hi lezvi va zvi gondzileko. — Mitiro 17:11, 12.

Wenawu u nga maha zvo fana. Loku u lava a Mufumo wa Nungungulu kuranga ni kululama kakwe u ta kuma wuchavelo ni kuvhikelwa zvezvi niku u ta ti buza hi kurula ka pindzukelwa ni kutshamiseka cikhatini ci tako.