Kusisanaho n’eki, omu busumi obutali bwa hara, abantu boona nibaija kuhikwaho “ekiyaga,” Yesu ekiyayesere “omuhito omwigi.” (Matayo 24:21) Busaho ekiikaro nambere tusobora kwirukira. Baitu nitusobora kugira ekitwakoraho kurora titwahikwaho kabi omu muhito gunu. Kiki ekitusobora kukora?

Omu Kwegesa kwe Okwa ha Rusozi, Yesu akatuhabura ati: “Mubanze muserre obukamabwe, nokuhikirrakwe.” (Matayo 6:33) Eki nitukikora tuta?

Mubanze muserre Obukama bwe. Kinu nikimanyisa ngu tusemeriire kwebembeza Obukama bwa Ruhanga kukira ekintu ekindi kyona omu bwomeezi bwaitu. (Matayo 6:25, 32, 33) Habwaki tusemeriire kukora ekintu kinu? Habwokuba abantu tibasobora kumaraho ebizibu ebiroho omu nsi. Obukama bwa Ruhanga bwonka nubwo busobora kuhikiriza ekintu eki ekigumire kukora.

Muserre okuhikirra kwe. Tusemeriire kukora kyona ekirukusoboka kuhondera ebiragiro bya Ruhanga n’emisingi ye. Habwaki? Habwokuba kakuba twecweramu ekihikire n’ekitahikire, nitwija kutunga ebizibu. (Enfumo 16:25) Baitu kakuba tuhondera ebiragiro bya Ruhanga, nitwija kusemeza Ruhanga kandi naitwe nitwija kutunga okusemererwa.​—Isaya 48:17, 18.

Mubanze muserre Obukama bwa Ruhanga n’okuhikirra kwe. Yesu akoleka ngu abamu nibasobora kuhuguka bakatekereza ngu nibaija kutunga obulinzi bwonyini kakuba bakora n’amaani kutunga sente nyingi. Abamu nibasobora kumarra obwire bwabo omu kwerolerra n’okurolerra amaka gaabo, kandi nibamalirra batakyaine  obwire obwokuserra Obukama bwa Ruhanga.​—Matayo 6:19-21, 25-32.

Baitu Yesu akaraganiza ngu abo boona abasagika Obukama bwa Ruhanga nibaija kutunga ebibarukwetaaga omu kasumi kanu, kandi batunge n’obwomeezi obutahwaho omu kasumi k’omu maiso.​—Matayo 6:33.

N’obukiraaba ngu abegeswa ba Yesu ab’omu kyasa eky’okubanza bakebembeza Obukama bwa Ruhanga n’okuhikirra kwe, omu kasumi kaabo batarole obusaasi n’okubonabona nibihwaho. Baitu bakatunga obulinzi. Omu mulingo ki?

Baahonderaga ebiragiro bya Ruhanga kandi eki kikabakonyera kutahikwaho ebizibu abantu abajeemeraga Ruhanga ebibaatungaga. Okwikiriza okugumire okubaali baine ngu Obukama bwa Ruhanga buliija kukabakonyera kugumira ebizibi eby’amaani. Kandi Ruhanga akabaha “amani agali amaingi muno” nukwo basobole kugumiisiriza.​—2 Abakolinso 4:7-9.

Abakristaayo ab’omu kyasa eky’okubanza bakorobera ekiragiro kya Yesu eky’okubanza kuserra Obukama. Bakatebeza amakuru amarungi ag’Obukama omu biikaro eby’ensi y’owabu bo. (Abakolosai 1:23) Haroho abantu abarukukora omulimo gunu kasumi kanu?

Ego! Abakaiso ba Yahwe bakimanyire ngu Obukama bwa Ruhanga buli haihi kumaraho obusinge bunu. Nahabweki bakora kyona ekirukusoboka kuhondera ebigambo bya Yesu ebirukugamba ngu: “Nenjiri enu eyobukama eritebezebwa omu nsi zona, okuba kaiso hali amahanga gona; nubwo empero erihika.”​—Matayo 24:14.

Orakora ki hanyuma y’okumanya amakuru amarungi? Nitukutererra kuhondera ekyokurorraho eky’abantu ab’omu kyasa eky’okubanza abaikaraga omu rubuga rwa Makedoni orurukwetwa Beroya. Paulo obuyabagambiire amakuru amarungi agarukukwata ha Bukama, bakagaikiriza “nomutima ogurukurahuka muno.” ‘Bakaseruliiriza omu Byahandiikirwe’ kugumya ngu eby’akaba nabegesa nibyo ebikaba biri omu Byahandiikirwe, kandi bakateeka omu nkora ebibayegere.​—Engeso Ezabakwenda 17:11, 12.

Naiwe n’osobora kukora ekintu nikyo kimu. Obworabanza kuserra Obukama bwa Ruhanga hamu n’okuhikirra kwe, noija kutunga obulinzi kasumi kanu kandi noija kwegwondeza omu businge n’obulinzi obutahwaho omu kasumi ak’omu maiso.