Ta melel, yak ta talel jun «huracán» ta jtojoltik. Te Jesús la yal te jaʼ jun «tulan wokolil» (Mateo 24:21). Manchukme ma xjuʼ ya x-anotik lokʼel ta tulan wokolil ini, ya xjuʼ ya jletik te banti ya jnakʼ jbatik. ¿Bin ya xjuʼ ya jpastik?

Ta jun buelta te Jesús jich la yal: «Jaʼ nail xa aleik te Wentainel yuʼun te Diose sok te bin toj ta pasel ya yil stukele» (Mateo 6:33). ¿Bin ya skʼan ya yal-abi?

«Jaʼ nail xa aleik te Wentainel yuʼun te Diose». Ya skʼan ya yal te jaʼuk mukʼxan skʼoplal ta koʼtantik te Wentainel yuʼun te Diose (Mateo 6:25, 32, 33). ¿Bin yuʼun te jich ya skʼan ya jnoptike? Jaʼ yuʼun te ma xjuʼ kuʼuntik schajpanel te kʼopetik te ay ta Balumilale. Jaʼnax ya xjuʼ yuʼun stukel te Diose.

Leaik te «bin toj ta pasel ya yil stukele». Ya skʼan ya yal-abi te ya jpastik tulan ta schʼuunel te mantaliletik sok te tojobteseletik yuʼun te Diose. ¿Bin yuʼun? Melel teme jtukeltiknax ya jtatik ta nopel te bin lek sok te bin ma lekuk ta pasele, ya jtatik bayal wokolil yuʼun (Proverbios 16:25). Yan teme ya jchʼuunbeytik te smantal te Jehová, ya kakʼbeytik stseʼelil yoʼtan sok lek ya xkʼootik ta lokʼel (Isaías 48:17, 18).

¿Bin yuʼun la yal te Jesús «jaʼ nail xa aleik te Wentainel yuʼun te Diose sok te bin toj ta pasel ya yil stukele»? Melel la yal te ay machʼatik ay bin ya xchʼaybot yoʼtanik yuʼun sok te ya skuyik te ya xkoltayotik teme bayal takʼin ya spasik ganar. Ay yantik te jkʼaxel ya smel yoʼtanik yuʼun te bin-utʼil ya staik te bin ya xtuun yuʼunik te jich maʼyukix tiempo yuʼunik ta sleel te Wentainel yuʼun te Diose (Mateo 6:19-21, 25-32).

 Pero te Jesús la yal te machʼatik ya yakʼ sbaik ta stojol te Wentainel yuʼun Dios ya staik te bin ya xtuun yuʼunik ta ora ini sok bayalxan bendicionetik ya yichʼik ta pajel chaʼbej (Mateo 6:33).

Manchukme te jnopojeletik yuʼun te Jesús nail la sleik te Wentainel yuʼun Dios sok te bin stojil ta spasele maba la yilbeyik slajibal te wokoliletike, pero la yichʼik kanantayel. ¿Bin-utʼil?

Te bitʼil la schʼuunbeyik smantal te Diose koltayotik swenta maba la staik te wokolil kʼax ta stojol te machʼatik ma la schʼuunbeyik smantal te Jehová. Te bitʼil mukʼ te schʼuunel yoʼtanik ta swenta te ya xtal te Wentainel yuʼun Dios, jaʼ koltayotik yuʼun ya xkujch yuʼunik te wokoliletik ta skuxlejalike. Sok akʼtiklanbotik te yipik talem «ta stojol Dios», yuʼun ya xkujch yuʼunik-a te wokoliletike (2 Corintios 4:7-9).

Te jchʼuunjeletik ta sbabial siglo la schʼuunik te mantalil la yal te Jesús te nail ya sleik te Wentainel yuʼun te Diose. La scholik te lek yachʼil kʼop te banti nainike (Colosenses 1:23). ¿Aybal machʼatik jich yakik ta spasel ta kʼajkʼal ini?

¡Ay!, te testigoetik yuʼun Jehová snaʼojik te nopolix te Wentainel yuʼun Dios ya slajin te bintik swenta balumilal. Jaʼ yuʼun ya spasik tulan ta schʼuunel te mantalil la yakʼ te Jesuse: «Yame xpujk ta alel ta swolol balumilal te lek yachʼil kʼop yuʼun te Wentainel yuʼun te Diose, jichme ya yaʼiyik te skʼop Dios spisil te ants winiketik, tey-abi ya xtal te slajibal kʼajkʼale» (Mateo 24:14).

¿Bin ya apas te kʼalal ya awaʼiy te lek yachʼil kʼop-abi? Yame jtijtik awoʼtan ta skʼayinbeyel stalel te ants winiketik ta sbabial siglo te ayik ta Berea, ta skʼinal Macedonia. Kʼalal la yaʼiyik te lek yachʼil kʼop te la schol te Pabloe, «spisil yoʼtanik la schʼuunik te skʼop te Diose» sok «jujun kʼajkʼal la yoʼtantayik ta yilel ta lek te sJun Dios teme yuʼun-nix jich-a te bin ya x-albot yaʼiyike» sok jajch spas ta skuxlejalik te bin la snopike (Hechos 17:11, 12).

Ya xjuʼ te jich ya apas-euke. Teme jaʼ nail ya awakʼ ta akuxlejal te Wentainel yuʼun Dios sok te bin toj ta pasele, yame ata kanantayel ta ora ini sok ta pajel chaʼbej, jaʼnix jich yame awaʼiybey yutsil te lamalkʼinal ta spisil-ora.